سەنات «قازاقستان رەسپۋبليكاسىنىڭ ۇكىمەتى مەن تۇركى اكادەمياسى اراسىنداعى تۇركى اكادەمياسىن ورنالاستىرۋدىڭ شارتتارى مەن ءتارتىبى تۋرالى كەلىسىمدى راتيفيكاتسيالاۋ تۋرالى» زاڭ جوباسىن قابىلدادى.

تۇركى اكادەمياسىن قۇرۋ قازاقستاننىڭ باستاماسىمەن 2009 جىلى وتكەن تۇركىتىلدەس مەملەكەتتەر باسشىلارىنىڭ 9-شى سامميتىندە كوتەرىلگەن.

تۇركى اكادەمياسى 2010 جىلى تۇركى الەمىن زەرتتەۋ عىلىمي ورتالىعى رەتىندە جۇمىسىن باستادى. كەيىن حالىقارالىق مارتەبەگە يە بولدى. اكادەميانىڭ باستى ماقساتى – تۇركى تىلدەرىن، ادەبيەتىن جانە مادەنيەتىن ساقتاۋعا، دامىتۋعا جانە تانىمال ەتۋگە باعىتتاعان تۇركولوگيا سالاسىنداعى زەرتتەۋلەردى ۇيلەستىرۋ، - دەپ ءتۇسىندىردى ايماعامبەتوۆ.

ءبىلىم ءمينيسترى بايانداعانداي، بۇگىندە اكادەمياعا مۇشەلىككە قازاقستاننان باسقا، قىرعىزستان، ازەربايجان جانە تۇرىك ەلدەرى قول قويعان.

بۇگىنگى قاراستىرىلىپ وتىرعان كەلىسىمگە 2020 جىلدىڭ 16 قاراشاسىندا قول قويىلعان.

اكادەميانىڭ شتاب پاتەرى نۇر-سۇلتاندا ورنالاسقانىنا بايلانىستى كەلىسىمنىڭ ماقساتى - ەلىمىزدە جۇمىس ىستەۋ كەزەڭىندەگى تۇركى اكادەمياسىنىڭ مارتەبەسىن، ونىڭ ارتىقشىلىقتارىن ايقىنداۋ. اكادەميادا بۇگىنگى كۇنى 17 ادام جۇمىس ىستەيدى. ونىڭ ىشىندە 2 قىزمەتكەر شەتەل ازاماتى. كەلىسىم كۇشىنە ەنگەننەن كەيىن اكادەميانىڭ جەرگىلىكتى جانە شەتەلدىك قىزمەتكەرلەرى سىرتقى ىستەر مينيسترلىگىندە اككرەديتتەۋدەن ءوتۋى ءتيىس بولادى، - دەدى ول.

سوزىنشە، اكادەميا عىلىمي زەرتتەۋ جۇمىستارىمەن، كىتاپتارمەن، جۋرنالدار شىعارۋمەن، تۇركى ەلدەرىنىڭ اتاقتى عالىمدارىنا حالىقارالىق فورۋمدار مەن كونفەرەنتسيالار وتكىزۋدە جانە تۇركولوگيا بويىنشا عىلىمي جۇمىستار جۇرگىزۋدە ۇلكەن بەلسەندىلىك تانىتىپ كەلەدى.

اكادەميا نەگىزى قالانعان ساتتەن باستاپ قازاقستان، رەسەي، قىتاي، اقش، ەۋروپا، جاپونيا، وڭتۇستىك كورەيا، ءۇندىستان جانە باسقا مەملەكەتتەردىڭ جەتەكشى عالىمدارىنىڭ قاتىسۋىمەن عىلىمي جوبالاردى ىسكە اسىرىپ جاتىر. سونىڭ ىشىندە ارحەولوگيا، تاريح سالاسىندا اۋقىمدى جۇمىس جۇرگىزىلىپ جاتىر. مىسالى، موڭعوليادا الدىڭعى جىلداردان باستاپ قازبا جۇمىستارى جۇرگىزىلدى. قازىرگى ۋاقىتتا كىتاپ قورىن تولىقتىرۋ بويىنشا جۇمىس جالعاسىپ جاتىر. كىتاپحانا جانىنان سيرەك كىتاپتار مەن قولجازبالار مۇراعاتى قۇرىلدى.2016-2021 جىلدار ارالىعىندا اكادەميا تاراپىنان اعىلشىن، ازەربايجان، قازاق، قىرعىز، ۆەنگر، موڭعول تىلدەرىنە، سونداي-اق ءتۇرلى تۇركى تىلدەرىنە 100-دەن استام جاڭا عىلىمي كىتاپتار جارىق كوردى، - دەپ ءتۇسىندىردى اسحات ايماعامبەتوۆ.

دەپۋتاتتار قۇجاتتى تالقىلاپ بولعاننان كەيىن ءتيىستى قاۋلىنى داۋىسقا قويىپ، زاڭ جوباسىن قابىلدادى.

Abai.kz