Cاياساتتانۋشى، ەۋروپالىق قۇقىق پەن ادام قۇقىعى ساراپتامالىق ينستيتۋتىنىڭ ديرەكتورى مارات ءباشىموۆ كونستيتۋتسياعا وزگەرىستەر مەن تولىقتىرۋلار ەنگىزۋگە قاتىستى پىكىرىمەن ءبولىستى. ونىڭ ويىنشا، حالىق وزگەرىستەردى كۇتىپ وتىر. بۇل تۋرالى BAQ.KZ سايتى جازدى.

بۇگىنگى تاڭدا ەلىمىزدە ۇلكەن تاريحي وقيعالار بولىپ جاتىر. اتاپ ايتقاندا، ادام قۇقىقتارى جونىندەگى وزگەرىستەر. ياعني ءبىز پرەزيدەنتتىڭ جولداۋىندا ايتىلعان تاپسىرمالاردى ىسكە اسىرىپ، ەكى جاقتى تالقىلاۋ بولماۋى ءۇشىن ارنايى جۇمىس توبى ءوز ۇلەسىن قوستى. ويتكەنى ءبىز قاراعان ماسەلەلەردىڭ قاتارىندا ادام قۇقىقتارى جونىندەگى نورمالار، پارلامەنت ءماجىلىسىنىڭ قۇزىرەتتەرىن كۇشەيتەتىن نورمالار، كونستيتۋتسيالىق زاڭ، ادام قۇقىعى جونىندەگى ۋاكىل، باس پروكۋرور تۋرالى بار، - دەدى ساياساتتانۋشى.

ءباشىموۆتىڭ سوزىنشە، پرەزيدەنتتىڭ ءوزى اتاپ وتكەندەي، ادام قۇقىعى جونىندەگى كەپىلدىك ول كونستيتۋتسيانىڭ ۇستەمدىگىن ۇستاپ تۇرعان. سول ءۇشىن كونستيتۋتسيالىق ورگانداردىڭ باسشىلارى ساياساتقا ارالاسپاۋى كەرەك، پارتياعا كىرمەۋى كەرەك دەگەن نورمالار، اكىمدەردى سايلاۋ قالاي جۇرگىزىلەتىنى تۋرالى پرينتسيپتەردىڭ بارلىعى دەموكراتيانى جوعارى دەڭگەيگە كوتەرەدى.

وزگەرىستىڭ بارلىعى حالىققا كەرەك، ولار ونى كۇتىپ وتىر. كونستيتۋتسياعا ەنگىزىلگەن وزگەرىستىڭ بارلىعى تاريحي دۇنيە. ول قۇقىقتىق، ساياسي جاعدايدىڭ ءبارىن وزگەرتەدى. باستىسى ونىڭ حالىققا پايداسى بولادى، - دەيدى ساياساتتانۋشى.

ەسكە سالا كەتەيىك، 22 ساۋىردە پرەزيدەنت قاسىم-جومارت توقاەۆ كونستيتۋتسياعا وزگەرىستەر مەن تولىقتىرۋلار ەنگىزۋ جونىندە كەڭەس وتكىزدى. مەملەكەت باسشىسى ءوز سوزىندە جولداۋدا ايتىلعان ساياسي باستامالاردى جۇزەگە اسىرۋ ءۇشىن اتا زاڭىمىزعا وزگەرىستەر مەن تولىقتىرۋلار ەنگىزۋ كەرەك ەكەنىن ايتتى.

Abai.kz