ابايمەن سىرلاسۋ بولماسا حات جازدىم قالام الىپ...
و، اباي! قاسيەتتى اباي! قۇدىرەتتى اباي!!! تاعى دا تىعىرىققا تىرەلدىم. تاعى دا " ءىشىم تولعان ۋ مەن ءورت، سىرتىم دۇردەي". وسىندايدا سىرلاساتىن، مۇڭىمدى بولىسەتىن ادام تاپپايمىن... «مولاسىنداي باقسىنىڭ.. جالعىز قالدىم تاپ شىنىم.." دەپ ءوزىڭ ايتپاقشى ويىم دا، جانىم دا جارادار جۇدەۋ حالدە.
و، اباي! قاسيەتتى اباي! قازىر سەنىڭ ۋاقىتىڭ ەمەس ءبارى-ءبارى وزگەرگەن. قازىر بىزدە نە كوپ شەندىلەر كوپ، شەكپەندىلەر ول دا جەتەدى. ايتپاقشى، قازىر قوعام كولىن ۇيقىدان وياتقان، تاس لاقتىرىپ تاسقىنىن تۋلاتقان «عاجاپ» ءبىر جاڭالىق بولدى. ول تاعى دا شەندىگە بايلانىستى. ول كىم دەيسىز عوي..؟ ول كونستيتۋتسيالىق كەڭەستىڭ اپپارات جەتەكشىسى باقىت نۇرمۇحانوۆ. ول كوسەگەڭ كوگەرگىر كونستيتۋتسياعا-ياعني اتا زاڭىمىزعا «پرەزيدەنتتەن باسقا تۇلعانى كىرگىزۋدىڭ ءجونى جوق» دەپتى.

و، قاسيەتتى اباي! ايىپ ەتپە...نۇرمۇحانوۆ مىرزانىڭ ءسوزىن تىڭدايىن...تاعى دا...ستوپ، ستوپ...توقتاڭىز... ءسال سابىر، نۇرمۇحانوۆ مىرزا...ءتۇسىندىرىڭىزشى... سوندا پرەزيدەنتتەن باسقا تۇلعالاردى كونستيتۋتسياعا كىم كىرگىزگەلى جاتىر؟ ايتىڭىزشى...تەلەفونىن بەرمەي-اق قويىڭىز، قايدا جۇمىس ىستەيتىنىن جاريا ەتپەسەڭىز دە باسقا تۇلعالاردى كونستيتۋتسياعا ەنگىزگەلى جاتقان كىم ەكەن؟ ايتا المايسىز با؟ ءيا...ايتا المايسىز... قازىر بىرەۋدى الداۋ دەگەن تۇك بولمايتىن زامان بولدى عوي... بىرەۋ، ەكەۋ، ءتىپتى، مىڭ، ميلليونداردى الداۋ ونشا قيىنعا تۇسپەيتىن كەزەڭ بولدى... ءسىز مەنىڭ «موزگامدى» قانشا ۇگىتتەگەنمەن... مەنىڭ ىشكى ويىمدى قايتەسىز..؟ياعني ول مەنىڭ ارىم، ازاماتتىلىعىم... مەنىڭشە، كونستيتۋتسيا ەشقاشان وزگەرمەيتىن، قايتا-قايتا شيمايلاپ جازىلمايتىن قاسيەتتى زاڭ-كىتاپ... ونى وزگەرتۋگە ەشكىمنىڭ قاقى دا، قۇقى دا جوق. اگاراكي، بولعان كۇندە دە ونى حالىق، ياعني رەفەرەندۋم شەشۋى ءتيىس. جانە اتا زاڭعا ءبارى-ءبارى ،ءتىپتى، پرەزيدەنتتىڭ ءوزى دە باعىنۋى قاجەت. ەكىنشى ماسەلە-تۇڭعىش پرەزيدەنت-ن.نازارباەۆ وتكەن جولى ءوز اۋزىمەن: «مەن قاتارداعى زەينەتكەر-پەنسيونەرمىن» دەگەن جوق پا؟ سوسىن وسى ماسەلەنى كوتەرگەن مىرزالار-سىزدەر نازارباەۆتى تاعى دا وتقا تاستاپ جىبەرگەن جوقسىزدار ما؟ تىپ-تىنىش قانا ۇيىندە وتىرعان اقساقالدى تاعى دا جامان اتتى، جەك كورىنىشتى ەتىپ وتىرسىزدار. نەگە؟ ۇلكەن كىسىگە دەگەن شىنايى، ادامي سىيلاستىق قايدا؟ مەنىڭشە، ول كىسى جاسارىن جاسادى. قولىنان كەلگەنشە جۇمىسىن اتقاردى. «بەينەتتىڭ دە زەينەتى بار» دەپ ەندى عانا دەم الىپ، قازاقشا ايتقاندا «ەسىن جيىپ، ەتەگىن جابا بەرگەنى» سول ەدى، تاعى دا اقساقالدى وتقا تاستاي سالدىڭىزدار...

و، اباي! بىزدە قازىر ۇلكەنگە، قاريا، اقساقالعا دەگەن قۇرمەت تە، سىيلاستىق تا قالمادى... «اتىمدى ادام قويعان سوڭ قايتىپ نادان بولايىن؟ حالقىم نادان بولعان سوڭ قايدا بارىپ وڭايىن؟» دەپ ەدىڭ-اۋ...

و، اباي! قاسيەتتى اباي! قازاق حالقى جەر بەتىندە بولسا (cوعان اللام جەتكىزسىن...) تالاي-تالاي پرەزيدەنتتەر كەلەر دە كەتەر. بىراق، مەنىڭ ويىم – بولاشاقتا كەلەتىن پرەزيدەنتتەر سەنى بىلمەسە، سەنىڭ ويىڭدى، سەنىڭ فيلوسوفياڭدى، سەنىڭ پوەزياڭدى، سەنىڭ ءسوزىڭدى ۇقپاسا ول قازاق ەلىنىڭ شىن پەرزەنتى بولا قويماس. جانە سەنىڭ اتىڭ كىرمەگەن اتا زاڭعا باسقا پەندەلەردىڭ كىرگەنى سەنىڭ ارۋاعىڭنىڭ الدىندا كەشىرىلمەس كۇنا ما دەيمىن...

و، اباي! سەن كوكتەسىڭ...ءبىز جەردە...كوكتە دەپ مەن سەنىڭ ورەڭدى ايتىپ تۇرمىن... ادام بولعان سوڭ عوي، پەندەشىلىك قوي كەيدە اللاعا جالىناسىڭ...سۇرايسىڭ...قايتەم ەندى..؟ ءوز-وزىممەن كۇبىرلەپ : «ە، قۇداي كونستيتۋتسيامىزدى وزگەرتە كورمە» دەگەنىمدى بىرەۋ ەستىسە كۇلىپ جۇرەر...ال، بىراق ءبىز بۇل دۇنيەدە اللادان- اماندىق، ساۋلىق، باق، بەرەكە، تىنىشتىق، بەيبىت ءومىر سۇرايىق... جاماندىقتىڭ بەتى اۋلاق...

و، اباي! قاسيەتتى اباي! قادىرلى اباي!قايتەم ەندى... ءوزىڭ ايتپاقشى قاتتى ساستىم، بەتتى باستىم، تۋرا قاشتىم جالما-جان.

تالعات تەمەنوۆ

Abai.kz