9 مامىر پوستكەڭەستىك ەلدەردە ادەتتەگىدەي جىل سايىنعى قايتالانبالى ءىس-شارالارمەن ءوتتى. اسكەري شەرۋلەر، بايانداما جاساۋ، ەسكەرتكىشتەرگە گۇل شوقتارىن قويۋ جانە كەي ەلدەردە "بەسسمەرتنىي پولك" اتتى شەرۋلەردىڭ ۇيىمداستىرىلۋى بولدى. 

رەسەيدە پۋتين ءسوز سويلەپ، بايانداماسىنىڭ باسىم بولىگىن ۋكرايناعا نەگە سوعىس اشقانىنا ارنادى. "بىزدە امال قالمادى، قىرىمدى ناتو كۇشپەن تارتىپ الۋعا دايىندىق جاسادى", - دەگەن جاتتاندى جالعان اقپاراتىن تاعى دا ايتتى. الايدا الەم كۇتكەن، ساراپشىلار بولجاعان مالىمدەمە ايتىلمادى. پۋتين ۋكرايناعا سوعىس جاريالايدى دەگەن بولجام ىسكە اسپادى (ولار قازىرگى سوعىستى "ارنايى وپەراتسيا" دەپ اتايدى), جاپپاي موبيليزاتسيا دا جاريالانبادى، لۋگانسك پەن دونەتسك وبلىستارىن قوسىپ الۋ، پريدنەستروۆەنى تاۋەلسىز دەپ مويىنداۋ دا ىسكە اسپادى. ءتىپتى جىل سايىن بولاتىن اسكەري شەرۋدىڭ اۋە كۇشتەرى ءبولىمى دە بولمادى. پەسكوۆ شەرۋدىڭ اۋە كۇشتەرىنە قاتىستى ءبولىمى بولماۋىن اۋا-رايىمەن بايلانىستىردى.

الماتىدا "باتىرلارعا تاعزىم" اتتى شەرۋ ۇيىمداستىرىلدى. اتى "باتىرلارعا تاعزىم", ال زاتى سول "بەسسمەرتنىي پولك". سۋرەتتى كوتەرىپ، شەرۋگە شىعۋ، كەڭەس تۋىن جەلبىرەتۋ جانە گەورگي لەنتاسىن كەۋدە تۇسىنا تاعۋ سىندى ارەكەتتەر بيىل دا بولدى. ەكى جىل قاتارىنان كوروناۆيرۋسقا بايلانىستى وتپەگەن شارا، بيىل وفلاين رەجيمدە ءوتىپ، وعان كەي دەرەك بويىنشا 20 مىڭنان استام ادام قاتىسقان.

گەورگي لەنتاسىن تاعىپ شىعۋشىلاردىڭ قاراسى كوپ بولدى. گەورگي لەنتاسى ورتالىق ازيانى ورتالاۋ جورىقتارىنا قاتىسقان باسقىنشى رەسەي يمپەرياسىنىڭ جاساقتارىنا، ارتىنشا قىزىلدارعا قارسى سوعىسقان اقتاردا كەڭىنەن قولدانىلىپ، كەيىننەن پۋتين بيلىگى بارىنشا ناسيحاتتاپ كەلە جاتىر. بۇل باسقىنشىلىقتىڭ نىشانى سانالاتىن لەنتانى قازاقستاننىڭ ءوز لەنتاسى بارىنا قاراماستان تالاي ادام تاعىپ شىقتى.

قان تۇستەس كەڭەس وداعىنىڭ قىزى تۋىن جەلبىرەتىپ شىققاندار دا بارشىلىق بولدى. حالىق كەڭىنەن تالقىلاپ، بارىنشا ايتقان جايت رەتىندە ستالين مەن بەريانىڭ سۋرەتىن الىپ شىعۋشىلاردىڭ بولعانىن ايتساق بولادى. ميلليونداعان قازاقتى اشتىقتان قىرىپ، مالىن تاركىلەپ، شارۋالىعىن تالقانداپ، كونبەگەنىن اتىپ، زيالىسىن اتىپ، ءوز جەرىنەن ميلليونداعان قازاقتى بوسقىن ەتىپ جىبەرگەن ءستاليننىڭ سۋرەتىن كوتەرىپ شىعۋ ناعىز ۇلتقا دەگەن قيانات. ال لاۆرەنتي بەريانىڭ سۋرەتىن الىپ شىققاندار شە؟ بەريا كسرو داۋىرىندە ساياسي قۋعىن-سۇرگىندى ۇيىمداستىرۋشىنىڭ ءبىرى بولدى، ارتىنشا ول كسرو-نىڭ اتوم قارۋىن جاساۋ باعدارلاماسىن باسقاردى. ونىڭ سۋرەتىن الىپ شىعۋ اتىلعان ارىستاردىڭ، رادياتسيادان ۋلانعان حالىقتىڭ رۋحىنا تۇكىرۋ، ساتقىندىقپەن تەڭ.

بۇل شارا بارىسىندا نەگە اكىمدىك جات ەلدىڭ يدەولوگياسىن ناسيحاتتاپ، جوق ەلدىڭ نىشانىن كوتەرۋگە جول بەرگەنىن تۇسىنبەدىك. وسىنىڭ ءوزى يدەولوگيا سالاسىنداعى ۇلكەن كەمشىلىكتى اڭعارتىپ تۇر ەمەس پە؟!

كا مىرزا 

Abai.kz