.

قازاقستاننىڭ ەڭبەك سىڭىرگەن ءارتيسى حابيبا ەلەبەكوۆا قىركۇيەك ايىنىڭ ورتاسىندا ءبىزدىڭ باسىلىمعا ارنايى سۇحبات بەرىپ، «ەلباسىعا ايتار ەكى اماناتىم بار» دەگەن تاقىرىپتا كولەمدى ماقالا جاريالانعان ەدى.

وندا توقساننىڭ التاۋىنان اسقان ساحنا ساڭلاعى باسىنان وتكەن نەبىر ناۋبەت جىلدار مەن وتكەن عاسىردىڭ بۇكىل شىندىعىن بۇكپەسىز، بۇرمالاۋسىز بايانداعان «عاسىر قاسىرەتتەرى» دەرەكتى ءفيلمىن ەلباسىنا جەتكىزە الماي وتىرعانىن ايتقان بولاتىن. سونداي-اق ءاليا بوپەجانوۆا جازىپ شىققان ءوزى تۋرالى كىتاپتىڭ جانە قازاق­ستاننىڭ حالىق ءارتيسى، اباي اندەرىنىڭ شەبەر ورىنداۋشىسى جۇسىپبەك ەلەبەكوۆ پەن تۋعان اپاسى، تەاتر ءارتيسى ءداليلا وڭ­عاربەكوۆا جايلى دا تاريحي ەڭبەكتەردىڭ باسپا بەتىن كورمەي وتىرعانىنا قىنجى­لىس ءبىلدىرىپ، پرەزيدەنتتەن كومەك سۇراعان. كەشە رەداكتسيامىزعا قايتا حابارلاسقان حابيبا اپا ماقالا جارىق كورگەلى تەلە­فون تۇبىندە وتىر­عانىمەن، ءتيىستى ورىن­داردان ەشكىم قوڭىراۋ شال­ماعانىن ايتىپ، ماسەلەنى اياقسىز قالدىرماۋىمىز­دى ءوتىندى. «ەگەر نۇر­سۇلتان ءابىشۇلى مەنىڭ اماناتىمدى وقىعان بولسا، ءسوز جوق تاپسىرما بەرەر ەدى. گازەت ەلباسىنىڭ قولىنا تيمەي قالدى-اۋ دەيمىن» دەپ، تاعى ءبىر قۇ­لاققاعىس جاساۋىمىزدى سۇرادى.
ەستەرىڭىزگە قىسقاشا سالا كەتسەك، ول ماقالادا حابيبا اپا:
- قاراعىم، نۇرسۇلتان!
مەنىڭ اشارشىلىق، قۋعىن-سۇرگىن قۇرباندارى مەن پوليگون زاردابىن شەككەندەر تۋرالى تۇسىرىلگەن «عاسىر قا­سىرەتتەرى» دەگەن دەرەكتى ءفيلمىمدى قان­شا تالپىنىس جاساسام دا وزىڭە جەتكىزە الماي-اق قويدىم. حاتىمدى وقىساڭ، اياقاستى قالدىرمايتىنىڭا، جەكە فيلم ەتىپ شىعاراتىنىڭا سەنەمىن. وعان كوزىم جەتەدى، قۇلىنىم. كوزىمنىڭ تىرىسىندە ءوزىم جايلى، ءجۇ­سىپبەك پەن ءداليلا جايلى جوعارىدا ايتىپ وتكەن ءۇش كىتاپتى قولىما ۇستاپ، كورىپ كەتسەم دەپ ويلايمىن. ارمانىم سول مەنىڭ. ونى شىعارۋعا مەندە شاما جوق. قۇرىعان مىناۋ جاسىمدا، بەيشارا بولعان باسىمدا توسەكتە عانا جاتىپ، اركىمگە ءبىر تەلەفون سوعامىن. بىراق بۇعان ءوزىڭ كىرىسپەسەڭ، ءوز بەتىمەن تۇك شىعاتىن ەمەس. مەنى تۇسىنەدى دەپ وزىڭە ءۇمىت ارتامىن.
بالام، اركىمنىڭ ولەر الدىنداعى اقىرعى تىلەگى، اقتىق ءسوزى بولادى. مەنىڭ سوڭعى تىلەگىم - وسى. وزىڭە دەگەن شەكسىز قۇرمەتپەن، ءسوزىمدى جەرگە تاستامايدى دەگەن ۇلكەن سەنىممەن سالەم جولداپ وتىرعان - حابيبا اپاڭ» دەگەن ەدى.
ءبىز ماقالا جارىق كورگەن سوڭ ءوز تاراپىمىزدان مادەنيەت جانە اقپارات مينيسترلىگىنىڭ مينيستر حاتشىلىعى مەڭگەرۋشىسى قويلىباەۆ ءازىمحان سەرىكۇلىنان سۇراپ بىلگەنىمىزدەي، ءاليا بوپەجانوۆا جازعان حابيبا اپا تۋرالى كىتاپ «ونەر» باسپاسىنا بەكىتىلگەنى بەلگىلى بولدى. قالعان ەكى ەڭبەكتىڭ تاعدىرى نە بولاتىنى ازىرگە بەلگىسىز. لاۋازىمدى قىزمەتكەر ول تۋرالى ناقتى ەشتەڭە ايتا المادى. ال حابيبا اپا بولسا، ءۇش جيناق وقىرمان قولىنا ءتيىپ، «عاسىر قاسىرەتتەرى» دەرەكتى ءفيلمىن جەكە فيلم ەتىپ تۇسىرىلسە دەپ ارمانداپ، جوعارى جاقتان جىلى حابار كۇتۋمەن كۇن وتكىزىپ جاتىر. سوندىقتان كەيۋانانىڭ تىلەگىن جەرگە تاستاماي تاعى ءبىر نا­زار­لارىڭىزعا ۇسىنۋدى ءجون كوردىك.

قانشايىم بايداۋلەت

"ايقىن" گازەتى