دۇيسەنبى, 3 قازان 2022
دەي سالدىم-اۋ 2405 19 پىكىر 31 مامىر, 2022 ساعات 17:19

ساپارباەۆ تاعى دا اكىم بولماق پا؟

پرەزيدەنت قاسىم-جومارت توقاەۆ جامبىل وبلىسىنىڭ بۇرىنعى اكىمى بەردىبەك ساپارباەۆتى قابىلدادى. بۇل تۋرالى اقوردا سايتى جاريالادى. ساپارباەۆ پرەزيدەنتتىڭ باستامالارى مەن ساياسي رەفورمالارىن حالىقتىڭ كەڭىنەن تالقىلاپ جاتقانى تۋرالى مالىمەت بەرىپتى.

«بەردىبەك ساپارباەۆ ءوزى قىزمەت اتقارعان جامبىل وبلىسىندا ورىندالىپ جاتقان پرەزيدەنت تاپسىرمالارىنىڭ ناتيجەلەرىن كەڭىنەن باياندادى. اتاپ ايتقاندا، ازاماتتاردىڭ تۇرمىس ساپاسىن ارتتىرۋعا، قوعامنىڭ ىنتىماعى مەن بىرلىگىن نىعايتۋعا باعىتتالعان «اسار»، «تۋعان جەرگە تاعزىم»، «جومارت تۇلەك» جانە «بەيبىتشىلىك پەن كەلىسىم» اتتى جوبالار جايلى ايتىلدى. سونىمەن قاتار جامبىل وڭىرىندە جۇزەگە اسىرىلعان پيلوتتىق جوبا تۋرالى مالىمەت بەرىلدى. بۇل باستامالار ءاربىر وتباسىنىڭ ءوزىن-ءوزى اسىراۋىنا جاعداي جاساۋعا نەگىزدەلگەن.

كەزدەسۋ بارىسىندا جاستار اراسىنداعى جۇمىسسىزدىقتى شەشۋ ماسەلەسى دە تالقىلاندى»، - دەلىنگەن پرەزيدەنتتىڭ رەسمي سايتىندا.

جالپى، الەۋمەتتىك جەلىلەردە بەردىبەك ماشبەكۇلى جاڭادان قۇرىلعان اباي وبلىسىن باسقارۋى مۇمكىن دەگەن اقپاراتتار دا ءجۇر. ساپارباەۆتىڭ بۇل جولعى پرەزيدەنتپەن كەزدەسۋى نەنى بىلدىرەدى؟

«جاڭادان قۇرىلماق اباي وبلىسىنا اكىم بولادى دەگەندەردىڭ ىشىندە بەردىبەك ساپارباەۆتىڭ دا اتى اتالىپ قالاتىن. كەشە توقاەۆ اقوردادا ساپارباەۆتى قابىلداپتى. ەشقانداي جەردە قىزمەتتە جوق ماشبەكۇلىن پرەزيدەنت قال سۇراۋ ماقساتىندا قابىلداسا جۇمىستان تىس ۋاقىتتا رەسمي ورىننان بولەك جەردە قابىلدار ەدى عوي. جوعارىداعى سىبىس راسقا اينالا ما دەپ ويلايمىن.

كولوداداعى 36 كارتانى ساپىرا بەرمەي جاستارعا دا سەنىم ارتار ۋاقىت كەلدى عوي»، - دەپ بولجام ءبىلدىرىپتى جۋرناليست وڭعار قابدەن.

69 جاستاعى بەردىبەك ساپارباەۆ بيىل ءساۋىر ايىندا جامبىل وبلىسى اكىمى قىزمەتىنەن بوساتىلدى. ول ەلىمىزدەگى جاسى ۇلكەن وبلىس اكىمدەرىنىڭ ءبىرى بولاتىن. ساپارباەۆ ۇزاق جىلدارعا سوزىلعان ساياسي قىزمەت جولىندا قىزىلوردا، وڭتۇستىك قازاقتان، شىعىس قازاقستان، اقتوبە، جامبىل وبلىستارىنىڭ اكىمى بولىپ قىزمەت ىستەگەن. ول ەكى رەت قر ەڭبەك جانە حالىقتى الەۋمەتتىك قورعاۋ ءمينيسترى بولدى. سونىمەن قاتار، قارجى مينيسترلىگىنىڭ ۆيتسە-ءمينيسترى ، ەكونوميكا جانە بيۋدجەتتىك جوسپارلاۋ ۆيتسە-ءمينيسترى، پرەمەر-ءمينيسترىنىڭ ورىنباسارى سياقتى لاۋازىمدى قىزمەتتەردى اتقاردى.

Abai.kz

19 پىكىر