ءماجىلىس توراعاسى ەرلان قوشانوۆ تۇركىتىلدەس ەلدەر پارلامەنتتىك اسسامبلەياسىنىڭ (تۇركپا) باس حاتشىسى مەحمەت سۇرەيا ەردى قابىلدادى.

كەزدەسۋ بارىسىندا ەرلان قوشانوۆ ەلىمىز تاۋەلسىزدىك تاريحىندا جاڭا كەزەڭگە قادام باسىپ وتىرعانىن اتاپ ءوتتى.

ءبىزدىڭ پرەزيدەنتىمىز كونستيتۋتسيالىق وزگەرىستەرگە بايلانىستى رەفەرەندۋم وتكىزۋ تۋرالى باستاما كوتەردى. بۇل ۋاقىت تالابىنان جانە قوعام سۇرانىسىنان تۋىنداپ وتىرعان تاريحي شەشىم. وسىعان بايلانىستى ەلىمىزگە تۇركپا-نىڭ بايقاۋشىلارى دا كەلدى. بۇل جۇمىسقا ءوزىڭىز دە اتسالىسىپ وتىرسىز، – دەدى ءماجىلىس توراعاسى.

ءوز كەزەگىندە س.ەر الداعى رەفەرەندۋمنىڭ ءساتتى وتەتىنىنە تىلەكتەستىك ءبىلدىرىپ، بۇل  قازاقستاننىڭ ودان ءارى دامۋى جولىنداعى ماڭىزدى كەزەڭ بولاتىنىنا سەنىم ءبىلدىردى.

ءبىز قازاقستاندى ەۋرازيانىڭ جارقىراعان جۇلدىزى دەپ بىلەمىز. قازاقستان پرەزيدەنتى قاسىم-جومارت توقاەۆتىڭ حالىققا جولداۋىنا ءوزى اتاپ وتكەن رەفورامالار نەگىزىندە اتا زاڭعا وزگەرىستەر ەنگىزىلگەلى وتىر. سوندىقتان الداعى رەفەرەندۋمنىڭ ءساتتى وتۋىنە شىن جۇرەكتەن تىلەكتەسپىن، – دەدى  تۇركپا-نىڭ باس حاتشىسى.

ءماجىلىس توراعاسى ەرلان قوشانوۆ مەحمەت ەرگە رەسپۋبليكالىق رەفەرەندۋم جۇمىسىنا قاتىسۋعا بەلسەندىلىك تانىتقانى ءۇشىن ريزاشىلىق ءبىلدىردى.

سونىمەن قاتار كەزدەسۋدە تاراپتار قىرعىزستاندا وتەتىن تۇركپا-نىڭ ءحى كەڭەسى مەن جالپى وتىرىسىنا قاتىستى ماسەلەلەردى تالقىلادى. اتالعان جيىندا ۇيىمنىڭ 2023-2028 جىلدارعا ارنالعان ستراتەگيالىق جول كارتاسىن بەكىتۋ جوسپارلانعان.

Abai.kz