شىمكەنتتىڭ بۇرىنعى اكىمى عابيدوللا ءابدىراحىموۆ پەن ۇقك-ءنىڭ بۇرىنعى توراعاسى كارىم ءماسىموۆتىڭ ۇستىنەن «ءىرى كولەمدەگى الاياقتىق» بابى بويىنشا تەرگەۋ جۇرگىزىلىپ جاتىر. بۇدان بۇرىن ولار «رەيدەرلىك» بويىنشا كۇدىككە ءىلىندى دەگەن اقپارات پايدا بولعان ەدى. بۇل تۋرالى ميحايل كوزاچكوۆ ءوزىنىڭ تەلەگرام-ارناسىندا جازدى.

كوزاچكوۆ نە دەيدى؟

«20-مامىردا تەلەگرام-كانالىمدا شىمكەنت قالاسىنىڭ ەكس-اكىمى عابيدوللا ءابدىراحىموۆ پەن ۇقك-ءنىڭ بۇرىنعى باسشىسى كارىم ماسىموۆكە قاتىستى قوزعالعان قىلمىستىق ءىس تۋرالى ايتقان بولاتىنمىن. باس پروكۋراتۋرا «ينفورمبيۋروعا» بەرگەن ابدىراحىموۆقا قاتىستى «رەيدەرلىك» بابى بويىنشا ءىس جوق دەگەن جاۋابىن تۇسىندىرەتىن كەز كەلدى.

ماسەلەن، 19 مامىردا Forbes جۋرنالىنىڭ نۇسقاسى بويىنشا ەڭ تابىستى 50 بيزنەسمەن تىزىمىندە 49-ورىندا تۇرعان بەلگىلى كاسىپكەر سايدۋللا قوجاباەۆ قۇقىق قورعاۋ ورگاندارىنا جۇگىندى.

ونىڭ تۇسىنىكتەمەسىندە ءابدىراحىموۆ پەن ءماسىموۆ بار، جالپى بەس ادام ودان ءىرى كولەمدە جانە زاڭسىز اقشا العانى ايتىلعان.

ولار نە سۇراپ، اقشانى كاسىپكەر نە ءۇشىن تولەگەنى ءالى جۇمباق. وكىلىنە حابارلاستىم، كەيىن كەزدەسەمىز دەپ ۋادە بەردى. بىراق ارىز تىركەلىپ، ەردر ءنومىرى الىنىپ، ءىس الماتى قالالىق پوليتسيا دەپارتامەنتىنە بەرىلدى. ءىس 190-باپتىڭ 4-بولىگى – اسا ءىرى كولەمدەگى الاياقتىق بويىنشا تەرگەلۋدە. اقپاراتتى پودپولكوۆنيك ازىربەك رەسمي تۇردە راستادى»، - دەپ جازادى، ميحايل كوزاچكوۆ.

كوزاچكوۆ ايتىپ وتىرعان قازاقستاننىڭ ەڭ باي كاسىپكەرىنىڭ ءبىرى سايدۋللا قوجاباەۆ – «كەنتاۋ ترانسفورماتور زاۋىتى» اق، «ورال ترانسفورماتور زاۋىتى» جشس، «اقتاۋ ترانسفورماتور زاۋىتى» جشس، «الماتى ەلەكتر مەحانيكالىق زاۋىتى» جشس، «ەلەكترومونتاج» اق، شىمكەنتتەگى جانە Asia Trafo جوعارى كەرنەۋلى ترانسفورماتورلىق جابدىق وندىرەتىن زاۋىت پەن «پرومەنەرگو» جوبالاۋ ينستيتۋتى كىرەتىن Alageum Group كورپوراتسياسىنىڭ ماجوريتارلىق يەسى.

پوليتسيا شىمكەنتتىڭ ەكس-اكىمى، بۇرىنعى مادەنيەت جانە سپورت ۆيتسە-ءمينيسترى عابيدوللا ءابدىراحىموۆ پەن قر ۇقك بۇرىنعى توراعاسى كارىم ماسىموۆكە قاتىستى قىلمىستىق ءىستىڭ قوزعالعانىن راستادى.

پوليتسيانىڭ رەسمي اقپاراتى نە دەيدى؟

«ازامات ك. ءوتىنىشى قر قك-ءنىڭ 190-بابى، «الاياقتىق» بولىگى بويىنشا سدتبت-دە تىركەلدى. قىلمىستىق ءىس بويىنشا ءىس جۇرگىزۋدى الماتى قالاسى پد تەرگەۋ باسقارماسى جۇزەگە اسىرادى»، - دەلىنگەن پوليتسيا حابارلاماسىندا.

بىراق عابيدوللا ءابدىراحىموۆتىڭ ءوزى بۇل اقپاراتتى جوققا شىعارىپ وتىر. وعان قۇقىق قورعاۋ ورگاندارىنان ەشقانداي حابارلاما كەلمەگەن كورىنەدى.

ءابدىراحىموۆ نە دەيدى؟

«شىنىمدى ايتسام، ەشقانداي ءىس تۋرالى حابارىم جوق. ەشكىم ەشقايدا شاقىرعان جوق، ماعان ەسكەرتپەدى. الەۋمەتتىك جەلىدە جازىلعاندار بوس ءسوز. بۇعان مەنىڭ ەش قاتىسىم جوق. بۇل نە ءۇشىن جاسالعانىن بىلمەيمىن. ول ادام (ارىز جازعان ادام-رەد.) - قاراپايىم كاسىپكەر، قازاقستاندا وندايلار كوپ. مەن كوپ كاسىپكەردى بىلەمىن. بىراق ول اداممەن ەشقانداي قاتىسىم بولعان ەمەس جانە جوق. ونىمەن مۇلدەم بايلانىستا بولعان جوقپىن. ارينە، ءومىر بويى، دالىرەك ايتساق، 22 جىل مەملەكەتتىك قىزمەتتە بولدىم. مەن دە باسقالار سياقتى بۇل بيزنەسمەندەردى مەملەكەتتىك قىزمەتكەر رەتىندە عانا ءبىلۋىم مۇمكىن»، - دەدى ءابدىراحىموۆ.

ءابدىراحىموۆ اقپارات كوزىنىڭ «قىلمىس جاسادى دەپ ايىپتاعانىنىڭ ءوزى قىلمىسقا جاتادى» دەيدى.

«نەگە ادامدار مۇندايعا جول بەرەدى. بۇل اقپاراتتى جاريالاعان كوزاچكوۆ مىرزا ماعان حابارلاسپادى. كەشە باس پروكۋراتۋرا دا اقپاراتتى تەرىسكە شىعاردى. بىراق ولار ءالى تىنىشتالماي وتىر. ماعان بىرەۋ «تاپسىرىس» بەرگەن سياقتى. بىراق مۇنىڭ نە ءۇشىن جاسالىپ جاتقانىن بىلمەيمىن»، - دەيدى ول.

Abai.kz