سەنات توراعاسى ماۋلەن اشىمباەۆ بۇرىنعى پرەزيدەنت نۇرسۇلتان نازارباەۆپەن كەڭەسپەيتىنىن ايتتى.

«قازاقستاننىڭ تۇڭعىش پرەزيدەنتى نۇرسۇلتان نازارباەۆ بۇگىندە ساياساتقا ارالاسپايدى. وزدەرىڭىز كورىپ جۇرگەن شىعارسىزدار. ارينە، رەفەرەندۋم، سايلاۋ سياقتى اۋقىمدى شارالارعا ول ەلدىڭ ازاماتى رەتىندە قاتىسا الادى. بارلىق ماسەلەلەر زاڭدا كورسەتىلگەندەي شەشىلەدى. كونستيتۋتسياعا سايكەس ۇكىمەتتىڭ، سەناتتىڭ، ءماجىلىستىڭ قۇقىقتارى بار. مۇنىڭ ءبارىن ءبىز زاڭناما اياسىندا جۇزەگە اسىرامىز. نۇرسۇلتان ءابىشۇلى رەفەرەندۋمدا داۋىس بەردى، بۇل ءار ازاماتتىڭ قۇقىعى. بىراق ساياساتكەر رەتىندە ءارى تۇڭعىش پرەزيدەنت رەتىندە قازاقستاننىڭ ساياساتىنا ارالاسپايدى»، - دەدى ماۋلەن اشىمباەۆ.

بۇرىنعى پرەزيدەنت نۇرسۇلتان نازارباەۆ «قاڭتار وقيعاسىنان» ەكى اپتا وتكەندە ەلگە جولداعان ۇندەۋىندە 2019 جىلى پرەزيدەنتتىكتى توقاەۆقا تاپسىرعانىن، سودان بەرى زەينەتكەر ەكەنىن جەتكىزگەن بولاتىن. بىراق ەكس-پرەزيدەنتتىڭ لاۋازىمدارى «قاڭتار وقيعاسىنان» كەيىن عانا الىنا باستادى.

ول بيىلعى قاڭتاردا قازاقستان رەسپۋبليكاسى قاۋىپسىزدىك كەڭەسىنىڭ توراعاسى قىزمەتىن توقاەۆقا تاپسىردى.  اقپان ايىندا «تۇڭعىش پرەزيدەنت – ەلباسى» تۋرالى كونستيتۋتسيالىق زاڭعا وزگەرىستەر ەنگىزىلىپ،  ەلباسىنىڭ قاۋىپسىزدىك كەڭەسىنە جانە قازاقستان حالقى اسسامبلەياسىنا ءومىر بويى توراعالىق ەتۋ قۇزىرەتى توقتاتىلدى.

كەيىن پارلامەنت «ەلدىڭ ىشكى جانە سىرتقى ساياساتىنا بايلانىستى باستامالارى ەلباسىمەن كەلىسىلۋگە ءتيىس» دەگەن نورمانى الىپ تاستادى. ءساۋىر ايىندا كونستيتۋتسيادان «ەلباسى» ءسوزى الىنىپ تاستالدى.

ال، 5 ماۋسىمدا وتكەن رەفەرەندۋم بويىنشا كونستيتۋتسيانىڭ 42-بابىنداعى نازارباەۆقا قاتارىنان ەكى رەت پرەزيدەنت بولىپ سايلانۋعا مۇمكىندىك بەرەتىن باپ جويىلدى، 46-بابىنداعى ءبىرىنشى پرەزيدەنتتىڭ مارتەبەسى كونستيتۋتسيا جانە كونستيتۋتسيالىق زاڭدار ارقىلى انىقتالادى دەگەن سوزدەر مەن  91-باپتاعى  ءبىرىنشى پرەزيدەنت جايىندا - تاۋەلسىز قازاقستاننىڭ نەگىزىن قالاۋشى جانە ونىڭ تاۋەلسىز مارتەبەسى جونىندەگى سوزدەر الىنىپ تاستالدى.

سونداي-اق رەفەرەندۋمدا داۋىس بەرۋ ناتيجەسىندە نازارباەۆتىڭ مارتەبەسى جانە ونىڭ تۋىستارى زاڭمەن قورعالاتىن «ءبىرىنشى پرەزيدەنت — ەلباسى تۋرالى» زاڭ كۇشىن جويدى. بۇل تۋرالى Sputnik قازاقستانعا بەرگەن پىكىرىندە ادىلەت ۆيتسە-ءمينيسترى الما مۇقانوۆا ايتتى.

ونىڭ سوزىنشە نازارباەۆتىڭ تۋىستارىن جاۋاپقا تارتۋعا بولادى، الايدا بۇرىنعى پرەزيدەنتتىڭ ءوزىن جاۋاپقا تارتۋ مۇمكىن ەمەس. «سەبەبى، «پرەزيدەنت تۋرالى» زاڭدا بۇرىنعى مەملەكەت باسشىلارىن پرەزيدەنت بولىپ تۇرعانداعى قىزمەتتەرى ءۇشىن جاۋاپقا تارتۋعا بولمايدى دەگەن باپ بار»،- دەدى ۆيتسە-مينيستر.

Abai.kz