قازاقستان باسشىسى قاسىم-جومارت توقاەۆ پەتەربۋرگ قالاسىندا وتكەن ەكونوميكالىق فورۋمعا قاتىستى. ءپۋتيننىڭ شاقىرتۋىمەن بارعان توقاەۆ حالىقارالىق جانە مەملەكەتارالىق قاتىناستارعا قاتىستى ويىن اشىق ءبىلدىردى.

توقاەۆ قازاقستان حالقىنىڭ كوكەيىندە جۇرگەن رەسەيلىك ساياساتكەرلەردىڭ نەگىزسىز ايىپتاۋىنا جاۋاپ بەردى.

"مۇمكىن بۇل ىڭعايسىزداۋ بولار، بىراق، مەن وسى ءبىر تريبۋنانى پايدالانا وتىرىپ، قازاقستانعا قاتىستى كەيبىر رەسەيلىك دەپۋتاتتاردىڭ نەگىزسىز سوزدەرىنە نارازىلىق تانىتقىم كەلەدى. ولاردىڭ ىشىندە جۋرناليست، مادەنيەت قايراتكەرلەرى دە بار.

ءبىزدىڭ ارامىزدا قانداي دا ءبىر ۇلكەن ماسەلەلەر جوق. بارلىق ىرىتكى سالۋ ارەكەتتەرى ءبىزدىڭ حالىقتارىمىز بەن رەسەيدىڭ وزىنە زياندى. وسى ءبىر مالىمدەمەلەر (قازاقستانعا قاتىستى نەگىزسىز سوزدەر) ماعان مۇلدە تۇسىنىكسىز. قازاقستان باسشىسىنىڭ شەشىمدەرىن نەمەسە ەلىمىزدەگى جاعدايعا نەگىزسىز پىكىر ءبىلدىرۋ ارقىلى، ولار نەنى كوزدەپ ءجۇر؟!", – دەدى پرەزيدەنت توقاەۆ.

اتالمىش مالىمدەمە رەسەيلىك ارانداتۋشى سيمونياننىڭ كوزىنشە ايتىلدى. سيمونياننىڭ كۇيەۋى تيگران كەوسايان جاقىندا عانا قازاقستانعا قارسى مالىمدەمەلەر جاساعان بولاتىن.

توقاەۆ لۋگانسك جانە دونەتسك سەپاراتيستەرىنىڭ مەملەكەت جاريالاعانىنا قاتىستى دا جاۋاپ بەردى.

توقاەۆتىڭ ايتۋىنشا، ەگەر ۇلتتىڭ ءوزىن-ءوزى انىقتاۋ قۇقىعى شىن مانىندە جۇزەگە اسىرىلاتىن بولسا، وندا بۇۇ قۇرامىنا كىرەتىن 193 مەملەكەتتىڭ ورنىنا جەر بەتىندە 500 نەمەسە 600 مەملەكەت پايدا بولار ەدى، بۇل ءوز كەزەگىندە ۇلكەن حاوسقا اكەلىپ سوعۋى مۇمكىن.

“وسى سەبەپتى ءبىز تايۆاندى دا، كوسوۆونى دا، وڭتۇستىك وسەتيانى دا، ابحازيانى دا مويىندامايمىز ءارى بۇل پرينتسيپ، ءبىزدىڭ ويىمىزشا، كۆازيمەملەكەتتىك تەرريتوريالارعا دا قاتىستى قولدانىلادى، ال لۋگانسك پەن دونەتسك سول ساناتتا بولىپ تابىلادى. مىنە، بۇل ءسىزدىڭ سۇراعىڭىزعا اشىق جاۋاپ”، – دەدى توقاەۆ.

وسىلايشا توقاەۆ سەپاراتيستەردىڭ ارەكەتىن قولدامايتىنىن اشىق كورسەتتى.

توقاەۆ سانكتسيالارعا قاتىستى دا جاۋاپ بەردى.

“قازاقستانعا كەلەتىن بولساق، ءبىزدىڭ ەلگە تىكەلەي قىسىم كورسەتىلىپ جاتىر دەپ ايتپاس ەدىم. شىنىندا دا بۇل - كەلىسسوزدەر ماسەلەسى. سانكتسيالار بار. ءبىز بۇل سانكتسيالاردى، ءسوزسىز، ءبىزدىڭ ساۋدا-ەكونوميكالىق ستراتەگيامىزدا ەسكەرەمىز. بىراق، سونىمەن قاتار، رەسەيمەن اراداعى بۇدان بۇرىنعى كەلىسىمدەرىمىزگە بايلانىستى قازاقستان الدىنداعى مىندەتتەمەلەر دە بار”،- دەدى ول.

بۇعان دەيىن توقاەۆ قازاقستان اۋماعى ارقىلى سانكتسيالاردى بۇزۋعا جول بەرمەيتىنىن ايتقان بولاتىن.

پەتەربۋرگ فورۋمى 4,5 ساعاتقا سوزىلدى. اۋقىمى جاعىنان بۇل فورۋم ساراپشىلار مەن شەتەلدىك باسشىلار از قاتىسقان جيىن سانالادى.

توقاەۆ رەسەيدەن كەيىن يرانعا ساپارمەن بارماق.

Abai.kz