سەنبى, 20 تامىز 2022
انە، كوردىڭ بە؟ 2049 0 پىكىر 21 ماۋسىم, 2022 ساعات 13:12

لۋكاشەنكو تاۋەكەلگە بارا ما؟

بەلارۋس اسكەرى ۋكرايناعا باسىپ كىرۋى مۇمكىن دەيدى باتىستىق ساراپشىلار. وعان بىرنەشە فاكتى مەن بولجامدار بار.

بەلارۋس ۋكرايناعا سوعىس اشۋشى تاراپتىڭ ءبىرى. تىكەلەي اگرەسسياعا قاتىسپاسا دا، ۋكرايناعا شابۋىل جاساۋ ماقساتىندا ءوز اۋماعىن رەسەي اسكەرىنە بەرگەن ەل رەتىندە اتالمىش سوعىسقا تىكەلەي قاتىسى بار. ۋكراينا جەرىنە جاسالعان زىمىران سوققىلارى مەن اۋە شابۋىلىنىڭ ۇشتەن ءبىر بولىگى بەلارۋس اۋماعى ارقىلى جاسالعان.

ساراپشىلار ۋكرايناعا بەلارۋس اسكەرى اشىق سوعىس جاريالاپ، باسىپ كىرۋى مۇمكىندىگىن ايتادى. قاۋىپ سوڭعى اپتادا ارتقان. كرەملدىڭ مينسككە دەگەن قىسىمى كۇشەيىپ، لۋكاشەنكونى سوعىسقا ارالاسۋعا ۇگىتتەپ جاتىر. رەسەي بيلىگى بەلارۋس اسكەرىنىڭ سوعىسقا ارالاسىپ، ۋكراينانىڭ سولتۇستىك باعىتىنان باسىپ كىرۋىنە ءزارۋ. سەبەبى كيەۆ ەلدىڭ وڭتۇستىگىندە ءساتتى شابۋىلدار جاساپ، حەرسون وبلىسىن ازات ەتۋدى باستادى. رەسەي اسكەرى قولىنداعى حەرسون قالاسىنا جاقىنداپ، باسقىنشىلاردىڭ العاشقى قورعانىس شەبىن بۇزدى. تاراپتار اراسىنداعى ارتيللەريالىق سوققى الماسۋ قارقىنى ارتتى. رەسەي اسكەرى ۋكراين جاساقتارىن حەرسونعا كىرۋىنە كەدەرگى جاساۋدا.

ۋكراينا جاساقتارى مەليتوپول باعىتىندا دا ءساتتى شابۋىلدار جاساۋدا. سوڭعى اپتادا قالاعا ونداعان شاقىرىم جاقىنداعان. ەگەر ۋكراينا جاساقتارى باسقىنشى قولىنداعى حەرسون مەن مەليتوپول قالالارىن ازات ەتسە، وندا رەسەي قىرىمعا باراتىن قۇرلىق جولىنان ايىرىلادى. ال كيەۆ باتىس بەرگەن الىس قاشىقتىقتاعى نىساندى جويۋعا قابىلەتتى زىمىران كەشەندەرىنىڭ كومەگىمەن الداعى ۋاقىتتا قىرىم كوپىرىنە سوققى جاساۋ مۇمكىندىگىنە يە بولادى. ەگەر ماسكەۋ ءۇشىن قورقىنىشتى سانالاتىن اتالمىش ستسەناري ىسكە اسسا، وندا رەسەي قىرىمعا تەك قانا اۋە جانە سۋ جولىمەن بارماق. بۇل اسكەري تەحنيكا مەن جەكە قۇرامدى جەتكىزۋگە ۇلكەن كەدەرگى دەگەن ءسوز.

رەسەي ۋكراين اسكەرىنىڭ نازارىن باسقا باعىتقا بۇرۋ ماقساتىندا، ەكىنشى فرونت اشىلۋى ءتيىس دەپ سانايدى. سوندىقتان بەلارۋس اسكەرى ۋكرايناعا سوعىس اشىپ، كيەۆ وبلىسىنا قايتا قاۋىپ توندىرە السا، وندا ۋكراينانىڭ وڭتۇستىك باعىتتاعى شابۋىلى الدەقايدا باسەڭدەر ەدى. سەبەبى ەل استاناسىن قورعاۋ ماڭىزدى بولماق.

بەلارۋس اسكەرى رەسەيمەن بىرىگىپ 8 شىلدەگە دەيىن سوزىلاتىن اسكەري جاتتىعۋدى باستادى. وندا مينسك اسكەرى قالالاردى باسىپ الۋ، وزەننەن ءوتۋ، قورعانىس شەبىن بۇزۋ، تاكتيكالىق شەگىنىس، اۋە شابۋىلدارىن جاساۋ مەن زىمىران سوققىلارىن پىسىقتاماق. 2022 جىلدىڭ قاڭتارىندا باستالعان رەسەي-بەلارۋس اسكەري جاتتىعۋىنىڭ سوڭى رەسەي اسكەرىنىڭ ءۇش باعىتتا ۋكرايناعا باسىپ كىرۋىمەن اياقتالدى. اتالمىش جاتتىعۋ بەلارۋس اسكەرىنىڭ ۋكراينانىڭ سولتۇستىگىنە باسىپ كىرۋىمەن جالعاسىن تابۋى مۇمكىن.

الايدا لۋكاشەنكو بيلىگى ۋكرايناعا باسىپ كىرسە، بىرقاتار تاۋەكەلدەرگە تاپ بولماق. الەمدىك قاۋىمداستىقتىڭ بەلارۋستى قىسپاققا الۋى ارتادى جانە مينسك ەكونوميكالىق قيىندىقتى ەڭسەرە الماي، رەسەي قۇشاعىنا ەنۋدى جالعاستىرادى. بەلارۋس اسكەرى ۋكراينا جەرىندە ۇلكەن شىعىنعا ۇشىراسا، وندا مينسكتەگى لۋكاشەنكو تاعى شايقالا باستاۋى ابدەن مۇمكىن. سەبەبى رەجيمدى ۇستاپ تۇرعان اسكەر مەن رەسەي كەپىلدىگى. الايدا رەسەي بۇل جولى بەلارۋس كوشەلەرىنە ميلليونداعان ادام شىقسا، ءنوپىر حالىقتى توقتاتار نوكەر جىبەرە الماۋى مۇمكىن. اتالمىش فاكتورلاردى ەسكەرگەن لۋكاشەنكو تاۋەكەلگە بارا ما؟

اسحات قاسەنعالي

Abai.kz

0 پىكىر

ۇزدىك ماتەريالدار

الاشوردا

الاش-ارمان

بەيبىت قويشىباەۆ  2947
بىلگەنگە مارجان

حيلدا حۋكحەم جانە ۇلى قولباسشىلار

بەيسەنعازى ۇلىقبەك 2159
ادەبيەت

ءتۇس

ەرعالي باقاش 1818
انە، كوردىڭ بە؟

ارحيمەد كىمدى قورعاشتايدى؟

جايبەرگەن بولاتوۆ 2919