شۆەيتساريانىڭ لۋگانو قالاسىندا 40 ەلدىڭ وكىلدەرى، ونىڭ ىشىندە كاسىپكەرلەر، حالىقارالىق ۇيىمدار بار ۋكراينانى سوعىستان كەيىن قالپىنا كەلتىرۋ ماسەلەسىن تالقىلاپ جاتىر.

فرانس پرەسس اگەنتتىگىنىڭ حابارلاۋىنشا، كونفەرەنتسيا اقشا جيناۋعا ارنالماعان. ونىڭ قاتىسۋشىلارى ۋكراينانى قالپىنا كەلتىرۋ جولدارىن ۇسىنىپ جاتىر. اتاپ ايتقاندا، ەكىنشى دۇنيەجۇزىلىك سوعىس اياقتالعاننان كەيىن ەۋروپانى قالپىنا كەلتىرۋگە قاتىستى "مارشالل جوسپارى" سەكىلدى باعدارلامانى جۇزەگە اسىرۋ كەرەك.

جيىنعا ۋكراينا اتىنان ەلدىڭ ۇكىمەت باسشىسى دەنيس شميحال مەن سىرتقى ىستەر ءمينيسترى دميتري كۋلەبا قاتىسىپ جاتىر. پرەزيدەنت ۆلاديمير زەلەنسكي فورۋمعا ونلاين بايلانىسقا شىعادى. جيىنعا ەۋروكوميسسيا ءتورايىمى ۋرسۋلا فون دەر ليايەن دە قاتىسىپ جاتىر.

فرانس پرەسس اگەنتتىگىنىڭ دەرەككوزىنشە، ۋكراينانى قالپىنا كەلتىرۋ ءۇشىن ارنايى قور قۇرىلماق. وعان ەۋروپالىق وداق جانە وزگە ەلدەردەن 100 ملرد دوللارعا جۋىق اقشا جيناماق.

كيەۆ ەكونوميكالىق مەكتەبىنىڭ ەسەبى بويىنشا، ۋكراينانىڭ 45 ملن شارشى مەتر عيماراتى بۇزىلعان. اتاپ ايتقاندا، 256 كاسىپورىن، 656 مەديتسينالىق مەكەمە، 1177 وقۋ ورنى زىمىران سوققىسىنان تالقاندالعان. بۇلاردىڭ ءبارىن قايتا سالۋ ءۇشىن 600 ملرد دوللار كەرەك ەكەن.

اقش جانە ەو ەلدەرى ۋكراينانى قالپىنا كەلتىرۋدى رەسەيدىڭ ەسەبىنەن جۇرگىزۋ كەرەك دەگەن ۇسىنىس ايتىپ جاتىر. دالىرەك ايتقاندا، رەسەيدىڭ تسەنتروبانكتىڭ 300 ملرد دوللارى بۇعاتتالعان. سونىمەن بىرگە "قارا تىزىمگە" ەنگەن رەسەيدىڭ شەنەۋنىكتەرى مەن كاسىپكەرلەرىنىڭ اقشاسى دا وسى ۋكراينانى قايتا قالپىنا كەلتىرۋگە جۇمسالۋى قاجەتتىگى تالقىلانىپ جاتىر.

Abai.kz