ءتىلدى دامىتۋدىڭ تىكەلەي جولى - ءتىلدى زامان تالابىنا ساي ترانسفورماتسيا جاساي ءبىلۋ. ءتىل وزگەرىپ، جاڭا تەرميندەر ەنىپ، دامىپ وتىرۋى ءتيىس. ءتىلدى دامىتۋدىڭ ءبىر جولى دا وسى. قازاق ءتىلى ءبىر عاسىردىڭ ىشىندە بىرنەشە مارتە وزگەرىسكە ۇشىرادى. اراب ارپىنە نەگىزدەلگەن ءالىپبي، ارتىنشا لاتىن الىپبيىنە كوشىپ، اراعا ون جىل ۋاقىت سالىپ كيريلليتساعا كوشتى. بۇل كسرو كەزەڭىندە ىسكە استى جانە اكىمشىلىك-ءامىرشىل جۇيەنىڭ ارەكەتىنەن جۇزەگە استى.

قازاقستان بىرنەشە جىل بويى لاتىن الىپبيىنە كوشۋدى تالقىلاپ جاتىر. بىرنەشە نۇسقاسى دا ۇسىنىلدى. لاتىن الىپبيىنە كوشۋدە جان-جاقتى، تەرەڭ تالداۋ جاساپ بارىپ، تۇبەگەيلى شەشىم قابىلداعان ابزال. بۇل تۋرالى ۇلىتاۋ وبلىسىندا ءوتىپ جاتقان ۇلتتىق قۇرىلتايدىڭ وتىرىسىندا قر پرەزيدەنتى قاسىم-جومارت توقاەۆ ايتتى.

«تىلگە بايلانىستى تاعى ءبىر ماڭىزدى ماسەلە. بۇل – لاتىن الىپبيىنە كوشۋ تۋرالى. كەيبىر قوعام وكىلدەرى ءبىز ءالى كۇنگە دەيىن كيريلليتسادان ارىلا الماي جاتىرمىز دەپ، الاڭداۋشىلىق بىلدىرۋدە. بىراق، ەڭ الدىمەن، بۇل لينگۆيستيكالىق تۇرعىدان وتە كۇردەلى ماسەلە. وسىنى جاقسى تۇسىنگەن ءجون»، - دەدى قاسىم-جومارت توقاەۆ.

وسى ورايدا پرەزيدەنت بۇعان دەيىن ءبىز 2 رەت لاتىن گرافيكاسىنا كوشۋگە تىرىسقانىمىزدى ەسكە سالدى.

«الايدا، سوڭى ءساتتى بولعان جوق. سوندىقتان، بۇل ماسەلەگە جان-جاقتى، تەرەڭ تالداۋ جاساپ بارىپ، تۇبەگەيلى شەشىم قابىلداعان ابزال. كيريلليتسادان لاتىن الىپبيىنە جاساندى تۇردە، تەك سايكەس ارىپتەردى وزگەرتۋ ارقىلى كوشۋگە بولمايدى. ايتپەسە، بۇل ۇلكەن قاتەلىككە اپارىپ سوعادى. ەڭ باستىسى، ازاماتتار، اسىرەسە، جاستارىمىز قازاق تىلىندەگى بارلىق سوزدەردىڭ لاتىن گرافيكاسىنداعى جازىلۋ ءتارتىبىن انىق ءبىلۋى كەرەك. ياعني، تىلىمىزگە ارنالعان ورفوگرافيالىق قاعيدالاردى قايتا قاراعان ءجون»، - دەدى مەملەكەت باسشىسى.

Abai.kz