«BIR TOLQYNDA» الاڭىندا جاڭا قازاقستاننىڭ جاستارىنا ارنالعان باسىمدىقتار تالقىلاندى
«AMANAT» پارتياسىنىڭ ورتالىق اپپاراتىندا «جاستار رۋحى» جاستار قاناتى ىسكە قوسقان «BIR TOLQYNDA» ديالوگ الاڭىنىڭ وتىرىسى ءوتتى. ساراپشىلار جاڭا قازاقستان جاستارى ءۇشىن ءۇش باسىمدىق سانالاتىن بىلىمگە ۇمتىلۋ، ەڭبەكسۇيگىشتىك جانە پاتريوتيزم تاقىرىپتارىن تالقىلادى. مەملەكەت باسشىسى قاسىم-جومارت توقاەۆ وسى ءۇش باسىمدىقتى جاستار ۇيىمىنىڭ كەزەكتەن تىس VI سەزىندە دەلەگاتتارعا جولداعان بەينەۇندەۋدە ايقىنداپ بەردى.
ديالوگ الاڭىنىڭ وتىرىسىنا قاتىسقان «AMANAT» پارتياسىنىڭ حاتشىسى داۋلەت كارىبەك جاستار ءاردايىم وڭ وزگەرىستەردىڭ سەنىمدى سەرىگى سانالاتىنىن اتاپ ءوتتى.
«پرەزيدەنت ەل جاستارىنا ارناعان ۇندەۋىندە وسكەلەڭ ۇرپاقتىڭ باستى قۇندىلىعى ەڭبەكسۇيگىشتىك، تەرەڭ ءبىلىم، وتانشىلدىق بولۋى ءتيىس ەكەنىنە ەرەكشە توقتالدى. ەلدى كوزى اشىق، كوكىرەگى وياۋ ازاماتتار العا باستايدى. ايانباي ەڭبەك ەتىپ، ادال تابىس تاباتىن ءاربىر ادام قوعام، مەملەكەت دامۋىنا ۇلەس قوسادى. بۇل – اقيقات. وسى قۇندىلىقتاردى جاس بۋىننىڭ بويىنا ءسىڭىرىپ، ولاردىڭ جاڭا ترەندىنە اينالدىرۋ ماقساتىندا ەرتەڭنەن باستاپ ەلىمىزدىڭ تۇكپىر-تۇكپىرىندە ءتۇرلى جوبالاردى جۇزەگە اسىرامىز. ديالوگ الاڭدارىن ۇيىمداستىرامىز»، – دەدى داۋلەت كارىبەك.
ءوز كەزەگىندە، عىلىم جانە جوعارى ءبىلىم ءمينيسترى ساياسات نۇربەك وتاندىق عىلىمدى دارىپتەۋ وسى كۇننىڭ وزەكتى مىندەتى سانالاتىنىن اتاپ ءوتتى.
«پرەزيدەنت ءوز ۇندەۋىندە بىلىمگە دەگەن ۇمتىلىس تۋرالى ايتا كەلىپ، بولاشاقتىڭ كىلتى تسيفرلىق تەحنولوگيا مەن يننوۆاتسيادا ەكەنىن جەتكىزدى. سوندىقتان عىلىمدى جاستار ءۇشىن تارتىمدى ەتۋ، ال عىلىمي قىزمەتتى بيىك مانساپقا باستايتىن ترامپلينگە اينالدىرۋ – اسا ماڭىزدى»، – دەپ اتاپ ءوتتى مينيستر.
ءماجىلىس دەپۋتاتى، «AMANAT» پارتياسى فراكتسياسىنىڭ مۇشەسى يۋليا كۋچينسكايانىڭ ايتۋىنشا، ءومىردىڭ بارلىق سالاسى تەرەڭ ترانسفورماتسيادان ءوتىپ جاتقان داۋىردە ىرگەلى قۇندىلىقتار اسا ماڭىزدى ورىن الادى.
«بۇل تۋرالى مەملەكەت باسشىسى ءوزىنىڭ بەينەۇندەۋىندە دە ايتقان بولاتىن. پاتريوتيزم – بۇل ادامنىڭ ارقاۋى، ونىڭ ءوزىن-ءوزى تانۋى جانە الەمدە ءوز ورنىن تابا ءبىلۋى. ءبىلىم مەن ەڭبەكقورلىققا ۇمتىلۋ – ءوز جوسپارىڭدى جۇزەگە اسىرۋ مەن جەتىستىككە جەتۋدىڭ نەگىزى. مەملەكەتتىك ساياساتتىڭ بۇگىنگى مىندەتى – ەلىمىزدىڭ قالالارى مەن اۋىلدارىندا، وڭىرلەرىندە تۇرىپ جاتقان جاستاردىڭ جاعدايى مەن ءومىر ساپاسىنداعى سايكەسسىزدىكتەردى ازايتۋ», – دەپ اتاپ ءوتتى دەپۋتات.
اقپارات جانە قوعامدىق دامۋ ۆيتسە-ءمينيسترى الەكساندر دانيلوۆتىڭ ايتۋىنشا، قازىر پاتريوت ءارى بەي-جاي قاراۋدى بىلمەيتىن ۇرپاقتىڭ ۋاقىتى كەلدى.
«مەن ءۇشىن پاتريوتيزم دەگەنىڭىز ۇعىنىقتى، بۇلجىمايتىن، اۋقىمى كەڭ دۇنيە. بولىپ جاتقان جاعدايعا، ماسەلەن ادىلەتسىزدىكە نەمقۇرايلى قاراماۋ دەگەن ءسوز. ال بەي-جاي قاراي الماۋ – ءومىر شىندىعىنا اينالۋى ءتيىس جاستاردىڭ يدەياسى مەن ىستەرى», – دەپ قوستى سپيكەر.
كەزدەسۋ مودەراتورى بولعان «جاستار رۋحىنىڭ» توراعاسى نۇرجان جەتپىسباەۆ پارتيانىڭ جاستار قاناتى قازاقستاننىڭ بولاشاعىنا قاتىستى جاۋاپكەرشىلىكتى تولىق سەزىنەتىنىن مالىمدەدى.
«ءوزىن-ءوزى تۇراقتى دامىتۋ، ءبىلىم الۋعا ۇمتىلۋ – قازىرگى زامان ازاماتى ءۇشىن اسا قاجەت قاسيەتتەر. بۇگىندە وزگەرىستەر وتە جىلدام ءجۇرىپ جاتىر. سوندىقتان جاڭا زامان جاستارى الەۋمەتتىك تۇرعىدا يكەمدى بولۋى قاجەت. ياعني، قوسىمشا ءبىلىم الۋعا، جاڭا ماماندىقتى يگەرۋگە جىلدام بەيىمدەلۋ ماڭىزدى. ال «جاستار رۋحى» ەلىمىزدىڭ ەڭ ءىرى جاستار ۇيىمى رەتىندە وسكەلەڭ ۇرپاقتىڭ وزەكتى ماسەلەلەرىن شەشۋ ءۇشىن بار كۇش-جىگەرىن، الەۋەتىن جۇمسايدى»، – دەدى نۇرجان جەتپىسباەۆ.
تالقىلاۋعا پارلامەنت ءماجىلىسىنىڭ دەپۋتاتتارى، ۇكىمەت مۇشەلەرى، ۇكىمەتتىك ەمەس ۇيىمداردىڭ، جاستار ۇيىمدارىنىڭ كوشباسشىلارى جانە تاعى باسقالار قاتىستى.
Abai.kz
