ۋكراينا رەسەيلىك يمپەريالىق جوبا تابىسىنىڭ ماڭىزدى بولىگى جانە سولاي بولىپ قالا بەرمەك. مۇنى ءى پەتر دە، ءىى ەكاتەرينا دا، باسقا ورىس پاتشالارى دا جاقسى تۇسىنگەن. لەنين دە مۇنى وتە جاقسى ءبىلدى، ول ۋكراينانى بولشەۆيكتەردىڭ يمپەريالىق جوباسىنا قوسۋعا بارىن سالدى.

لەنيننىڭ ويى ۋكرايندىقتاردىڭ كومەگىنسىز ىسكە اسۋى مۇمكىن ەمەس ەدى. كسرو بيلەۋشىلەرىنىڭ اراسىندا كوپتەگەن ەتنيكالىق ۋكرايندار بولعان. ولار شىن مانىندە بولشەۆيكتەر يمپەرياسىنداعى اكىمشىلىك ەليتانىڭ، تەحنيكالىق جانە شىعارماشىلىق ينتەلليگەنتسيانىڭ ەلەۋلى بولىگىن قۇرادى.

بۇگىندە رەسەي يمپەريالىق جوباسىن جانداندىرۋ ءۇشىن سوعىس باستادى. 1918 جىلعى لەنين سياقتى پۋتين دە ۋكرايناسىز يمپەريا قۇرىلمايتىنىن جاقسى تۇسىنەدى. ەگەر پۋتين ۋكراينانى باسىپ الىپ، رەسەيگە قوسپاسا، ونىڭ كسرو-نى قايتا ءتىرىلتۋ تۋرالى ارمانى جۇزەگە اسپاي قالادى. بەلارۋسكە جاساعانداي اننەكسيا ناتيجە بەرمەدى، رەسەي ۋكراينداردى باعىندىرىپ، كۇشپەن باسىپ-جانشۋ ءۇشىن بارلىق ارەكەتتى جاسايدى.

ۋكراينا بولسا يمپەريالىق جوباعا قايتا ورالعىسى كەلمەيدى. ۋكراينا ەۋروپاعا ورالۋ ءۇشىن، تاۋەلسىزدىگى ءۇشىن يمپەريا مەن ديكتاتۋراعا قارسى سوعىسىپ جاتىر. ۋكراينا ديكتاتۋرانىڭ نە ەكەنىن جاقسى بىلەدى. پولشاعا، بالتىق جاعالاۋىنداعى ەلدەرگە، گرۋزياعا، مولدوۆا مەن فينلياندياعا قانداي قاۋىپ ءتونىپ تۇرعانىن ءتۇسىنىپ وتىر. ۋكراينانىڭ رەسەيمەن سوعىسى – ازاتتىق سوعىسى، ۋكراينا ءوزى ءۇشىن عانا سوعىسىپ جاتقان جوق، ورىس ەزگىسىنەن ارەڭ قۇتىلىپ، ول جاققا قايتا ورالعىسى كەلمەيتىندەردىڭ بارلىعى ءۇشىن شايقاسىپ جاتىر دەپ ايتۋعا بولادى.

ۋكرايناسىز ءپۋتيننىڭ يمپەريالىق جوباسى ىسكە اسپايدى. ۋكراينانىڭ بۇل سوعىستا جەڭۋى نەمەسە جەڭىلۋى ونىڭ تاعدىرىنا عانا ەمەس، حالىقارالىق قاۋىپسىزدىك جۇيەسى ىدىراعاننان كەيىنگى الەمدىك ءتارتىپتىڭ قالاي بولاتىنىنا، سوعىستان كەيىنگى الەمدە قانداي قاۋىپ-قاتەرلەردىڭ بولاتىنىنا اسەر ەتپەك.

كەرىمسال جۇباتقانوۆ

Abai.kz