قر اۋىل شارۋاشىلىعى ءمينيسترى ەربول قاراشوكەەۆ قانت باعاسىنىڭ شارىقتاپ كەتۋىنە قانتتى يمپورتتاۋداعى قيىندىقتار اسەر ەتكەنىن ايتتى.

ونىڭ ايتۋىنشا، قانت ءونىمى برازيليا مەن ءۇندىستاننان تاسىمالدانادى. ولاردىڭ قانت ءوندىرۋ كولەمى  800 ملن توننانى نەمەسە الەمدىك نارىقتىڭ شامامەن 60%-ىن قۇرايدى. برازيليا قانت زاۋىتتارى قانتتى الدىن-الا تولەم ارقىلى ۇلكەن كولەمدە ساتادى. ەلىمىز ەۋرازيا ەكونوميكا وداعىنان تىس جەردەن ءونىم ساتىپ الۋ ءۇشىن Louis Dreyfus Company سياقتى ءىرى ترانسۇلتتىق كومپانيالاردىڭ دەلدالدىعىنا جۇگىنەدى.

«ترانسۇلتتىق كومپانيالار برازيليادان قانتتى 60 مىڭ توننادان ساتىپ الىپ، قارا تەڭىز پورتتارىنا اپارادى. سودان كەيىن عانا قارا تەڭىز ايلاعىنان تمد ەلدەرىنە قانتتى از كولەمدە جەتكىزەدى. كورشى ەلدەردەگى گەوساياسي جاعدايعا بايلانىستى تۋىنداعان لوگيستيكالىق پروبلەمالار وسى قانتتىڭ ءوزىنىڭ كەشىگىپ جەتۋىنە تۇرتكى بولدى. ەگەر بۇرىن رەسەي فەدەراتسياسى مەن بەلارۋس رەسپۋبليكاسىنان يمپورت كەزىندە اق قانتتى جەتكىزۋ مەرزىمى 4-10 كۇنتىزبەلىك كۇنگە دەيىن بولسا، قازىرگى ۋاقىتتا رەسەي فەدەراتسياسى قانت اكەتۋگە تىيىم سالعاننان كەيىن ءۇشىنشى ەلدەردەن قانت جەتكىزۋ مەرزىمى 90 كۇنگە ۇزاردى»،-دەدى ەربول قاراشوكەەۆ.

مينيستر بۇرىننان قالىپتاسقان لوگيستيكانىڭ بۇزىلۋى قانت باعاسىنىڭ قىمباتتاۋىنا اسەر ەتكەنىن اتاپ ءوتتى.

«برازيليادان قانت پەن قۇراق شيكىزاتىنىڭ يمپورتى قارا تەڭىزدەگى گرۋزيا پورتتارى ارقىلى جەتەدى. گرۋزيا پورتتارىنىڭ وتكىزۋ قابىلەتىنىڭ شەكتەۋلىلىگى، ينفراقۇرىلىم مەن كولىك كەمەلەرىنىڭ جەتكىلىكسىزدىگى كەپتەلىسكە اكەلىپ سوقتىرۋدا. ءۇندىستاننان قانت يمپورتى كەزىندە حايراتون اۋعان شەكارا وتكەلىندە جۇكتەردىڭ جينالۋى بايقالادى. بۇل تاۋارلاردى رەسىمدەۋ مەن تيەۋ راسىمدەرىنىڭ سوزىلۋىنا اكەلەدى. وسىلايشا، بۇرىن ورنىققان بۇكىل لوگيستيكالىق بايلانىس بۇزىلعان. بۇل لوگيستيكانىڭ جانە قازاقستانعا قانت پەن شيكىزاتتى جەتكىزۋ مەرزىمىنىڭ ۇزارۋىنا اكەپ سوقتى. قالىپتاسقان جاعداي قانت باعاسىنىڭ وسۋىنە اكەلدى. وسىلايشا، قانت شيكىزاتى قۇنىنىڭ، كولىك شىعىندارىنىڭ، سونداي-اق وڭدەۋ شىعىندارىنىڭ قىمباتتاۋى بايقالادى»، - دەپ ءتۇسىندىردى ەربول قاراشوكەەۆ.

Abai.kz