رەسەيدىڭ اسكەري پروپاگانداسى تەك رەسەي اۋماعىندا ەمەس، سونىمەن قاتار وزگە ءورىستىلدى ورتاسى بار مەملەكەتتەردە دە كەڭ ەتەك جايعان. ماسكەۋ ءتۇرلى مەديا قۇرالدار ارقىلى "رەسەيدىڭ ادىلەتتى سوعىس جولىنداعى جاۋىنگەرلەرى" جايلى ايتۋدى ءبىر ءسات توقتاتقان ەمەس. "ۋكراينادا نەوناتسيزمدى تالقانداپ، ازات ەتىپ جاتىرمىز" دەگەنگە كەي قازاقتىڭ سەنەتىنى دە بار. 

ۋكرايناعا رەسەي سوعىس اشقان ساتتەن باستاپ، رەسەيلىكتەر جاپپاي پوستكەڭەستىك ەلدەرگە كەتە باستادى. بۇل باتىس سالعان سانكتسيادان ساقتانۋ جولدارى بولاتىن. رەسەي ازاماتتارى ءۇشىن بانكتىق اۋدارىمدار جاساۋعا تىيىم سالىنىپ، ءتۇرلى الەمدىك كومپانيالار رەسەي نارىعىنان كەتۋدە. الەۋمەتتىك جەلىلەر بۇعاتتالىپ، ينتەرنەت جىلدامدىعى دا ناشارلاعان. ال رەسەي ازاماتتارى وركەنيەتتى الەمنىڭ بارلىق يگىلىكتەرىن قولدانۋ ءۇشىن وزگە ەلگە كەتۋدە. كەي ساراپشىلاردىڭ پىكىرىنشە ارنايى ماقساتپەن كەلىپ جاتقان، ارنايى قىزمەت وكىلدەرى دە ولۋى ىقتيمال دەيدى. ولار بارعان ەلدىڭ قوعامىن زەرتتەپ، باقىلاۋ جۇرگىزىپ، ارانداتۋمەن اينالىسۋى دا بەك مۇمكىن.

ارانداتۋ دەمەكشى، كۇنى كەشە عانا ەل استاناسىندا ەلەڭ ەتكىزەرلىك جايت بولدى. ەسىلدىڭ جاعالاۋىندا قوناقتارعا ءان ايتۋ ماقساتىندا اشىق كاراوكە ۇيىمداستىرىلعان. اشىق كاراوكەگە كەز كەلگەن ادام قاتىسىپ، ءانىن ايتا الادى. بۇل قالا قوناقتارى مەن تۇرعىندارىنا كوتەرىڭكى كوڭىل-كۇي سىيلاۋ ماقساتىندا جاسالعان بولاتىن. مىنە، سول اشىق كاراوكە ايدارىندا ءبىر توپ جىگىت رەسەيدى ۇلىقتايتىن، ونىڭ جەكە اسكەري كومپانيالارىن ماقتايتىن ءان ايتقان. ءاننىڭ سوزىنە ءمان بەرەتىن بولساق، "جاساسىن رەسەي", "ۆاگنەر كەلەدى، ادىلەتتىلىك ورناتادى" دەگەن جولدار بار. بۇل تازا رەسەي سوعىسى مەن اگرەسسياسىن جاقتاۋ دەگەن ءسوز. ءاندى ورىنداعان ساتتە، ەكراندا "ۆاگنەر" جەندەتتەرىنىڭ سيريا مەن ليۆيادا سوعىسقان اسكەري ارەكەتتەرى كورسەتىلىپ تۇرعان.

بۇل قوعام تارابىنان ۇلكەن نارازىلىق تۋدىردى. حالىق "قۇقىق قورعاۋ ورگاندارى نە قاراپ تۇرعان، نەگە توقتاۋ سالماعان" دەپ پىكىرىن بىلدىرۋدە. ال قوعام بەلسەندىلەرى الەۋمەتتىك جەلىدە قۇزىرلى ورگاندارعا ءوز ساۋالدارىن قويىپ، نارازىلىقتارىن تانىتۋدا.

قوعام قايراتكەرى مۇرات ابەنوۆ بىلاي دەپ جازدى: "سەپاراتيزمدى ناسيحاتتايتىن رەسەي ازاماتتارى استانادا نەگە اشىق ءجۇر ءان ايتىپ
استانا ورتاسىندا، قوعامدىق ورىندا ءبىر توپ جاس سەپاراتيزمدى ناسيحاتتايتىن ءان ورىندادى. دەرەككوز: استانا، ەسىل جاعالاۋىندا 24 شىلدەدە ءبىر توپ جاس رەسەيلىك "ۆاگنەر" جەكە اسكەري كومپانياسى (چۆك ۆاگنەر) دەگەن اتپەن تانىمال جالدامالى جەندەتتەر تۋرالى ءاندى ورىندادى".  

بۇل جازباعا سارىارقا اكىمدىگى بىلاي دەپ پىكىر جازدى: "سارىارقا اۋدانى اكىمى اپپاراتى مەن بەلسەندى تۇرعىن اراي ورداباەۆا كومەگىمەن ارباتتا بارلىق تىلەك بىلدىرۋشىلەر ءۇشىن تەگىن كاراوكە ۇيىمداستىرىلعان بولاتىن.
كاراوكەدە اندەردىڭ بەلگىلى ءبىر كاتالوگى بار، ال ارباتتىڭ ءاربىر قوناعى كەزەك تارتىبىمەن اندەردى ورىنداي الادى. وكىنىشكە وراي، كەيبىر قوناقتار جالپى قابىلدانعان ەرەجەلەرگە قايشى، وزگە تاراپ قىزمەتىنەن ارانداتۋشىلىق مۋزىكانى قوستى. وسى وقيعا ءۇشىن ەلوردا تۇرعىندارى مەن قوناقتارىنان كەشىرىم سۇرايمىز! جاۋاپتى قىزمەتكەرلەرمەن قوسىمشا نۇسقاۋلىق وتكىزىلدى. كاراوكە جەكە ساياسي كوزقاراستاردى ناسيحاتتاۋ قۇرالى رەتىندە ەمەس، تەك ويىن-ساۋىق ماقساتىندا ۇيىمداستىرىلعانىن ايتا كەتەيىك".

بۇل جاۋاپقا قاراپ، ارانداتۋشىلىق سيپاتتا ءان ايتقان ازاماتتار قانداي دا ءبىر جاۋاپكەرشىلىككە تارتىلاتىنى بايقالمايدى.

رەسەيدىڭ جەكە اسكەري كومپانياسى سانالاتىن "ۆاگنەر" جەندەتتەرى بۇعان دەيىن الەمدىك قاۋىمداستىقتىڭ نازارىنا ۇشىراپ، سانكتسيا سالىنعان بولاتىن. ەۋروپا ەلدەرى مەن اقش ادام قۇقىعىن بۇزىپ، قيناۋ فاكتىلەرى بويىنشا ولاردى قارا تىزىمگە ەنگىزگەن. بۇگىنگى كۇنى ۆاگنەرلىكتەر ۋكراينادا سەپاراتيستەرمەن بىرگە كيەۆكە قارسى سوعىسۋدا. قاندى تاريحى بار ۆاگنەرلىكتەردى انگە قوسۋ سوعىستى، بۇلىكتى، سەپاراتيزمدى جاقتاۋ ەمەس پە؟!

ال اشىق كاراوكەدە ۆاگەر مەن رەسەيدى ۇلىقتاپ، سوعىس جايلى ءان ايتقان كىمدەر ەكەنى ءالى بەلگىسىز. قۇزىرلى ورگاندار ارنايى اقپاراتتى ءالى بەرمەدى. ءان ايتۋشىلار قازاقستان ازاماتتارى ما، الدە وزگە ەل تۇرعىندارى ما دەگەن سۇراققا دا ءالى جاۋاپ جوق...

كا مىرزا

Abai.kz