الماتى «قارجى ورتالىعىنىڭ» وكىلدەرى قالادا ستۋدەنتتەرگە ارنالعان 1696 ورىندىق 3 جاڭا جاتاقحانا پايدالانۋعا بەرىلەتىنىن ايتتى.

بۇگىندە ەل بويىنشا 84 مىڭنان استام ستۋدەنت جاتاقحاناعا مۇقتاج. سونىڭ تەڭ جارتىسىنا جۋىعى الماتىدا. قارجى ورتالىعىنىڭ وكىلى اينۇر ساعىندىقوۆا بۇل ماسەلەنى شەشۋ ءۇشىن جەكە كاسىپكەرلەرگە الداعى 8 جىلعا مەملەكەتتىك تاپسىرىستى ورنالاستىرۋدىڭ ورنىنا ستۋدەنتتەر ءۇيىن سالۋدى ۇسىنعانىن ايتادى. سونىڭ ناتيجەسىندە قالامىزدىڭ 3 جەكەمەنشىك وقۋ ورنى اۋماعىندا جاتاقحانا قۇرىلىسى ءجۇرىپ جاتىر.

«ءبىزدىڭ مەحانيزمگە سايكەس كەز كەلگەن جوو، كەز كەلگەن كاسىپكەر ءوز قاراجاتى ەسەبىنەن جاتاقحانانى پايدالانۋعا ەنگىزەدى. ءارى قاراي ءار ستۋدەنتكە مەملەكەتتىك تاپسىرىس ورنالاستىرىلادى. مەيلى ول مەملەكەتتىك بولسىن، جەكە بولسىن»، – دەدى «قارجى ورتالىعى» اق دەپارتامەنت ديرەكتورى اينۇر ساعىندىقوۆا.

ال الماتى تەحنولوگيالىق ۋنيۆەرسيتەتىنە قاراستى جاتاقحانادا رەكونسترۋكتسيا جۇمىستارى ءجۇرىپ جاتىر. ەسكى عيمارات قايتا جوندەلىپ، تامىز ايىندا پايدالانۋعا بەرىلەدى. سونداي-اق كاسىپكەر كەلىسىمشارتقا سايكەس 20 جىل بويى جاتاقحانانى باسقا ماقساتتا قولدانا المايدى. تەك ونى كەپىلگە، جالعا بەرۋ مۇمكىندىگى بار.

«ەگەر ءبىز ساۋاتتى، ءبىلىمدى، باسەكەگە قابىلەتتى ستۋدەنتتەردى ەڭبەك نارىعىنا شىعارامىز دەسەك، ولارعا ءتيىستى جاعداي جاساۋىمىز قاجەت. پاتەر جاعالاپ، كۇندەلىكتى ناپاقاسىن تابا الماي، ۇيدەن-ۇيگە كوشىپ جۇرگەن ستۋدەنتتەن ءبىز بىلىكتى مامان شىعارا المايمىز. ءبىز وسىنى جەتكىزگىمىز كەلەدى. جانە مۇنى مىندەتتى تۇردە باقىلاۋدا ۇستايمىز. نەگىزگى مىندەتىمىز دە، ماقساتىمىز دا وسى»، – دەدى قر پارلامەنتى ءماجىلىسىنىڭ دەپۋتاتى ءمادي احمەتوۆ.

ايتا كەتەيىك، وسى جوبانىڭ ارقاسىندا ەلىمىزدە 2019 جىلى 9 مىڭ 166 ورىندىق 10, 2020 جىلى 20 مىڭ 266 ستۋدەنتكە ارنالعان 75 جاتاقحانا، بىلتىر 30 مىڭ 630 ورىنعا ارنالعان 124 ستۋدەنتتەر ءۇيى سالىنىپتى.

Abai.kz