جەتىسۋ وبلىسىندا پرەزيدەنتتىڭ اۆتوجول ينفراقۇرىلىمىن جاڭعىرتۋ جونىندەگى تاپسىرماسىن ىسكە اسىرۋ اياسىندا «الماتى – وسكەمەن» رەسپۋبليكالىق ماڭىزى بار اۆتوجولدىڭ مۇقىرى اسۋىنداعى 21 شاقىرىمدىق ۋچاسكەسى (213–234-كم) جوسپارلانعان مەرزىمنەن ءبىر جىل بۇرىن پايدالانۋعا بەرىلدى.

نىساننىڭ رەسمي تولقۇجاتىنا سايكەس، جول ۋچاسكەسىن پايدالانۋعا بەرۋ مەرزىمى 2027 جىلعى جەلتوقسانعا بەلگىلەنگەن بولاتىن. الايدا جول قۇرىلىسىن جۇرگىزۋشىلەر ءتورت جولاقتى نەگىزگى جولدىڭ قۇرىلىسىن مەرزىمىنەن بۇرىن اياقتادى.

ماڭىزدى جول ۋچاسكەسىن ىسكە قوسۋ راسىمىندە ءسوز سويلەگەن وبلىس اكىمىنىڭ ورىنباسارى اسەت قاناعاتوۆ:

– جەتىسۋ وبلىسىنداعى اۆتوجولداردىڭ ساپاسىن ارتتىرۋ ماقساتىندا سوڭعى ءۇش جىلدا وبلىس اكىمىنىڭ باقىلاۋىمەن اۋقىمدى جوبالار جۇزەگە اسىرىلدى. ولاردىڭ ىشىندەگى ەڭ ماڭىزدىلارى – «تالدىقورعان – ءۇشارال» رەسپۋبليكالىق ماڭىزى بار اۆتوجولى جانە «ءۇشارال – دوستىق» رەسپۋبليكالىق ماڭىزى بار اۆتوجولىن رەكونسترۋكتسيالاۋ. سونداي-اق بىلتىر «سارىوزەك – قورعاس» باعىتىنداعى جولدىڭ جوندەۋ جۇمىستارى اياقتالدى. بيىل سارىوزەك اۋىلىنىڭ اينالما جولىنىڭ 7 شاقىرىمدىق ۋچاسكەسى پايدالانۋعا بەرىلدى. بۇدان بولەك، «الماتى – وسكەمەن» اۆتوجولىنىڭ الماتى وبلىسىنىڭ شەكاراسىنان باستاپ تالدىقورعان قالاسىنىڭ اينالما جولىنا دەيىنگى بولىگىندە، سونداي-اق قالانىڭ اينالما جولدارىندا جالپى ۇزىندىعى 159 شاقىرىم بولاتىن ورتاشا جانە كۇردەلى جوندەۋ جوبالارى جۇزەگە اسىرىلۋدا. ونىڭ 103 شاقىرىمى بيىل تولىق جوندەلدى. قالعان بولىگى كەلەسى جىلى اياقتالادى. وسى باعىتتاعى ماڭىزدى ۋچاسكەلەردىڭ ءبىرى – مۇقىرى اسۋى ارقىلى وتەتىن جولدىڭ كولىك قوزعالىسى ءۇشىن اشىلۋى وسى اتقارىلعان جۇمىستاردىڭ ناتيجەسى دەۋگە بولادى، – دەدى ءا. قاناعاتوۆ.

ارينە، جوبانىڭ ءساتتى جۇزەگە اسىرىلۋىندا جول سالاسى ماماندارىنىڭ ەڭبەگى وراسان.

ۇزىندىعى 21 شاقىرىم بولاتىن جول ۋچاسكەسى جۇمىس كۇشى مەن رەسۋرستاردى جۇمىلدىرۋدىڭ ناتيجەسىندە مەرزىمىنەن بۇرىن پايدالانۋعا بەرىلدى. قۇرىلىس جۇمىستارىنا 514 جولشى، 231 ارنايى تەحنيكا تارتىلىپ، جىلجىمالى اسفالت-بەتون زاۋىتى جۇمىس ىستەدى. قۇرىلىسشىلار 551,4 مىڭ تەكشە مەتر جەر قازىپ، جولدىڭ كەشەندى نەگىزىن توسەدى، 42 سۋ وتكىزۋ قۇبىرىن ورناتتى، كوپىر سالىپ، جولعا بەرىكتىگى جوعارى قيىرشىق-ماستيكالىق اسفالت توسەلدى.

جولدىڭ اشىلۋىنا وراي جەرگىلىكتى تۇرعىندار پىكىر ءبىلدىردى. سولاردىڭ ءبىرى – كوكسۋ اۋدانىنىڭ تۇرعىنى مالىك بەيسەن:

– بۇل جول – ماڭىزدى كۇرەتامىر. وسى جول ارقىلى جۇكتەر تاسىمالدانىپ، ادامدار ءار قيلى باعىتقا قاتىنايدى. ەندى جول كىم-كىمگە دە ىڭعايلى، جايلى ءارى قاۋىپسىز بولادى. ءبىز، اۋدان تۇرعىندارى، اتقارىلعان جۇمىستى ءوز كوزىمىزبەن كورۋ ءۇشىن جولدىڭ اشىلۋ راسىمىنە ارنايى كەلدىك. ناتيجەسىنە كوڭىلىمىز تولدى، – دەدى ول.

اتاپ وتسەك، جىل قورىتىندىسى بويىنشا جەتىسۋ وبلىسىنداعى اۆتوموبيل جولدارىنىڭ جاقسى جانە قاناعاتتانارلىق جاعدايداعى ۇلەسى 96%-دى قۇرايدى.

Abai.kz