مەملەكەتتىك باسقارۋدى جاڭعىرتۋ، ەكونوميكانى دامىتۋ جانە ينۆەستيتسيا تارتۋ – بۇگىنگى پرەزيدەنت جولداۋىندا كوتەرىلگەن نەگىزگى باعىتتاردىڭ ءبىرى.

الايدا رەفورمالاردىڭ ناتيجەسى قابىلدانعان شەشىمدەرمەن عانا ەمەس، ولاردىڭ ەل ەكونوميكاسىنا قانشالىقتى اسەر ەتەتىنىمەن دە ولشەنەدى. قۇرىلىس سالاسى ەكونوميكالىق ءوسىمنىڭ قوزعاۋشى كۇشىنە اينالا الا ما؟ ينۆەستيتسيا تارتۋ مەن لوگيستيكالىق ينفراقۇرىلىمدى دامىتۋداعى باستامالار قازاقستان ەكونوميكاسىنا قانداي مۇمكىندىك بەرەدى؟

وسى ماسەلەلەر جونىندە ەكونوميست ايبار ولجاەۆتىڭ پىكىرىن بىلدىك.

— ەكونوميكالىق ماسەلەلەر وسى جولى نەگىزگى وزەگى بولدى دەپ ويلايمىن. جانە ادام كاپيتالىن دامىتۋ. ەكونوميكانى الاتىن بولساق، ەڭ باستى ماسەلەلەر — بىزدەگى ەكونوميكالىق بەلسەندىلىكتى ارتتىرۋ، وعان جاڭا مەملەكەتتىك-جەكە ينۆەستيتسيالىق ستيمۋل بەرۋ. قۇرىلىس كەلەسى جىلدان باستاپ ءبىزدىڭ ەكونوميكانىڭ لوكوموتيۆىنە اينالاتىن سياقتى. سەبەبى ۇلكەن اۋقىمدى مەملەكەتتىك ينۆەستيتسيالار بار، مەملەكەتتىك قوردان. ونىمەن قاتار جەكە ينۆەستيتسيالاردى تارتۋ كوزدەلگەن. وتە ۇلكەن تاپسىرما بەرىلدى. ينۆەستيتسيا جۇمىسىنىڭ كۋراتورى رەتىندە «بايتەرەك» حولدينگى تاڭدالدى. ويتكەنى ءدال وسى «بايتەرەك» حولدينگىنىڭ ينۆەستيتسيا تارتۋدا باسقا ورگاندارعا قاراعاندا تاجىريبەسى وتە مول دەپ ايتۋعا بولادى.

ونىمەن قاتار، مەنىڭ ويىمشا، لوگيستيكا، جولدار سالۋ جانە مەملەكەتارالىق وتكىزۋ بەكەتتەرى — تۋرا وسى لوگيستيكانىڭ تىرەلىپ تۇرعان ماسەلەسى. وسى ىشىمىزگە جۇك كولىكتەرى، جۇك اعىندارى اعىپ كەلسە دە، شەكارادا تۇرىپ قالادى. بىرنەشە كۇنگە كەزەك سوزىلىپ كەتەدى. وسى ماسەلەنى شەشۋ تاپسىرىلدى.

بۇل دا — لوگيستيكانى، ءبىزدىڭ ەكونوميكانى دامىتاتىن بەلگىلى ءبىر ساياسي شەشىم. بۇگىن ايتىلدى، ەندى ونى جاساۋعا ەشقانداي كەدەرگى جوق. جولدار بويىنشا ناقتى تاپسىرمالار بەرىلدى. ەش نارسەگە قاراماي جولداردىڭ ءبارىن سالۋ، ونى بەلگىلى ءبىر ءتۇرلى ورگاندار اراسىندا كەلىسىپ جۇرەتىن ۇزاق بيۋروكراتيالىق كەدەرگىلەر الىنىپ تاستالدى. ءبىر عانا مينيسترلىككە تاپسىرىلدى. ءبىر عانا مينيسترلىك ەشكىممەن اقىلداسپاي، ءوزى عانا، ەشكىمنىڭ شەشىمىن كۇتپەي، تولىق اينالىسا بەرەتىن بولدى.

مەنىڭ ويىمشا، جاڭا جولداردىڭ سالىنۋى، بار جولداردى مودەرنيزاتسيالاۋ، جوندەۋ جۇمىستارى پروتسەدۋرالىق جاعىنان اناعۇرلىم تەزدەتىلەدى دەپ ويلايمىن.

توميريس ماراتقىزى

Abai.kz