«CNPC-اقتوبەمۇنايگاز» قىتايلىق كومپانيانىڭ قازاقستانداعى كەن ورنىن جالعا الۋ مەرزىمى اياقتالدى. كومپانيا جەر قوينىن بۇرعىلاۋ كەلىسىمشارتىن تاعى دا 25 جىلعا سوزدىرۋدى سۇراپ وتىر.

قازىرگى كۇنى «CNPC-اقتوبەمۇنايگاز» كومپانياسىنا قاتىستى 5 كەلىسىمشارت بار ەكەن. ونىڭ بىرەۋىنىڭ مەرزىمى بيىل اياقتالعان.

«بىلتىردان باستاپ كومپانيا تاراپىنان بۇل كەلىسىمشارتتى 25 جىلعا ۇزارتۋ ماسەلەسى كوتەرىلدى. ۇسىنىستاردى قاراۋ ءۇشىن كەلىسىمشارت مەرزىمى تەك 3 جىلعا سوزىلدى. وسى ۋاقىت ىشىندە قوسىمشا تالاپتار قاراستىرىلادى. ءۇش جىلدىڭ ىشىندە جۇمىسشىلاردىڭ الەۋمەتتىك جاعدايىن جاقسارتۋ، جالاقى ماسەلەسىن كوتەرۋ تالاپتارى قويىلادى»، – دەيدى وبلىستىق يندۋستريالىق- يننوۆاتسيالىق دامۋ باسقارماسى باسشىسىنىڭ ورىنباسارى ازامات قۇدايبەرگەنوۆ.

مۇنايشىلاردىڭ ايتۋىنشا كومپانياداعى ەڭبەك داۋى 25 جىلدان بەرى جالعاسىپ كەلەدى. جۇمىسشىلار جالاقى از، الەۋمەتتىك جاعداي ناشار ەكەنىن ايتادى. ولار ءبىر اي بۇرىن وبلىس اكىمدىگىنە، ۇكىمەت باسشىسىنا شاعىمدانىپ، ارىز جازعان، بىراق ەشقانداي جاۋاپ الماعان.

قىتاي ۇلتتىق مۇناي-گاز كورپوراتسياسى 63 ەلدە مۇناي-گاز ءوندىرۋ جۇمىستارىن جۇرگىزەدى. الپاۋىت كومپانيا قازاقستانداعى ينۆەستيتسيالىق قىزمەتىن 1997 جىلى باستادى. «CNPC-اقتوبەمۇنايگاز» اق -نىڭ رەسمي سايتىنداعى اقپاراتتارعا سۇيەنسەك، شيرەك عاسىر ىشىندە قازاقستاننىڭ مۇناي-گاز كەشەنىن دامىتۋ ءۇشىن 50 ملرد دوللاردان اسا ينۆەستيتسيا سالدى. تەك سوڭعى ءۇش جىلدىڭ وزىندە كومپانيا 7 ملن توننا مۇناي وندىرگەن.

«CNPC-اقتوبەمۇنايگاز» اق وڭىردەگى مۇناي ءوندىرىسىنىڭ 67, گازدىڭ 88 پايىزىن قامتىپ وتىر.

Abai.kz