ءماجىلىس دەپۋتاتتارى وڭىرلەردە جۇمىسىن جالعاستىرىپ، وبلىس، اۋدان ورتالىقتارىن ارالاپ، ەڭبەك ۇجىمدارىمەن، اۋىل تۇرعىندارىمەن كەزدەسۋلەر وتكىزۋدە. وندا حالىقتى الەۋمەتتىك قولداۋ شارالارىنا، مەملەكەتتىك باعدارلامالاردى جەرگىلىكتى جەرلەردە جۇزەگە اسىرۋ ماسەلەلەرىنە باسا نازار اۋدارۋدا.

بۇگىن ءماجىلىس دەپۋتاتى جاناربەك ءاشىمجانوۆ الماتى وبلىسىنىڭ ەسىك قالاسىندا  «AMANAT» پارتيانىڭ سايلاۋالدى باعدارلاماسىنىڭ ورىندالۋىن جۇزەگە اسىرۋدىڭ جول كارتاسى شەڭبەرىندە سالىنىپ جاتقان 60 پاتەرلى 2 تۇرعىن ءۇيدىڭ قۇرىلىسىمەن تانىستى. كەزدەسۋدە ج.ءاشىمجانوۆ قازاقستاندىقتاردىڭ ءومىر ءسۇرۋ دەڭگەيىن ارتتىرۋ جونىندەگى مەملەكەتتىك شارالار تۋرالى، ونىڭ ىشىندە دەپۋتاتتاردىڭ الەۋمەتتىك ماسەلەلەردى شەشۋگە باعىتتالعان زاڭنامالىق باستامالارى تۋرالى ايتتى.

سونىمەن قاتار نىسانداعى قۇرىلىس جۇمىستارىنىڭ ساپاسى ۋاكىلەتتى ورگانداردىڭ قاتاڭ قاداعالاۋىندا بولۋى ءتيىس ەكەنىن دە اتاپ ءوتتى. ءوز كەزەگىندە قۇرىلىس كومپانياسىنىڭ وكىلى بولات يشنازاروۆ قازىرگى ۋاقىتتا قۇرىلىس جۇمىستارى 95%-عا اياقتالعانىن، اباتتاندىرۋ جۇمىستارى بىتكەننەن كەيىن تۇرعىن ۇيلەر مەرزىمىندە پايدالانۋعا بەرىلەتىنىن ايتتى.

جالپى ەسىك قالاسىندا كەزەكتە تۇرعان تۇرعىندارعا بيىلعى جىلدىڭ ءتورتىنشى توقسانىندا 120 پاتەر پايدالانۋعا بەرىلەدى دەپ جوسپارلانعان.

Abai.kz