ءۇش كۇن بۇرىن رەسەيدە پۋتين رەجيمىنىڭ باستى يدەولوگتارىنىڭ ءبىرى سانالعان داريا دۋگينا قازا تاپتى. كولىگىنە قويىلعان جارىلعىش زات قاشىقتىقتان باسقارۋ ارقىلى ىسكە قوسىلعانى بەلگىلى بولدى. 

داريا دۋگينا اتىشۋلى الەكساندر دۋگيننىڭ قىزى. الەكساندر دۋگين رەسەيدە ەكى يدەيانى العا جىلجىتۋشى جانە جاساقتاۋشى بولدى. ول "ورىس الەمى" جانە "ەۋرازيالىق يدەيانى" رەسەي بيلىگىنىڭ ءبىر باعىتى ەتۋگە بارىن سالۋدا. جاڭا عاسىردىڭ باسىنان باستاپ "ورىس الەمى" كونتسەپتسياسى رەسەيدىڭ سىرتقى ساياساتتاعى باستى باعىتتارىنىڭ ءبىرى بولىپ كەلەدى. ال "ەۋرازيالىق يدەيا ارقىلى رەسەي پوستكەڭەستىك ەلدەرگە ۇستەمدىك جۇرگىزۋى ءتيىس" دەيدى دۋگين. ول 90-جىلدارى ارانداتۋشى ليمونوۆپەن بىرلەسىپ پارتيا دا قۇرعان بولاتىن.

رەسەيدىڭ ۋكرايناعا اگرەسسياسىن اشىق جاقتاپ، "باسىپ كىرىپ، قارسى بولعاننىڭ بارلىعىن ءولتىرۋ كەرەك" دەپ مالىمدەگەنى ءۇشىن 2014 جىلى ول ۋنيۆەرسيتەتتەگى قىزمەتىنەن قۋىلادى. ونىڭ قىزى داريا دۋگينا ۇزاق جىلدار بويى فيلوسوفيامەن اينالىسىپ، پلاتون ەڭبەكتەرىن زەرتتەيدى. كەي ماقالاسىن پلاتونوۆا دەگەن لاقاپ اتپەن جازادى. رەسەيدىڭ قىرىمدى وتارلاپ العانىنان باستاپ، دۋگينا پروپاگانديست سولوۆەۆ، سكابەەۆانىڭ باعدارلامالارىنا كوبىرەك شىعا باستايدى. ول 2022 جىلى رەسەيدىڭ ۋكرايناعا باسىپ كىرۋىن قۋانا قارسى الىپ، "يمپەريا وياندى" دەپ جازادى. ازوۆستالعا بارىپ، سيۋجەت تۇسىرەدى. بۋچا قىرعىنى بولماعان دەپ مالىمدەپ، ۋكراينا ويدان شىعارعان قويىلىم دەيدى.

ول كۇزدە تانىستىرىلىمى بولاتىن "Z كىتاپتى" جازۋشىلاردىڭ ءبىرى بولاتىن. وندا ۋكراينا اسكەرىنىڭ "جاۋىزدىعى" جايلى باياندالىپ، "قۇتقارۋشى رەسەي اسكەرى" جايلى ايتىلماق. دۋگينانى كىم جاردى دەگەن سۇراق وتكىر تۇر. رەسەي بيلىگى كىم ولتىرگەنىن بىلەمىز دەپ، اقپاراتتى جاريالادى.

رەسەي فەدەرالدى قاۋىپسىزدىك قىزمەتى دۋگينانى جارعان ۋكراينا ازاماتى ناتاليا پاۆلوۆنا دەيدى. ول 1979 جىلى ومىرگە كەلگەن، رەسەيگە 23 شىلدە كۇنى 12 جاستاعى قىزىمەن بىرگە كەلگەن. رەسەي اۋماعىنا كىرگەن ساتتە دحر سەپاراتيستەرىنىڭ ءنومىرىن قولدانعان، ال ماسكەۋدە ول قازاقستاندىق كولىكپەن ءجۇرىپ، ەستونيا شەكاراسىنا ءوتۋ ساتتە ۋكراين ءنومىرىن قولدانعان دەيدى. وسىلايشا ول كولىگىنىڭ ءنومىرىن ءۇش مارتە اۋىستىرعان. بۇل ارينە فقق جاريالاعان اقپارات. ادام سەنۋى قيىن، قيسىنسىز نۇسقا. "قالايشا ول جىلدام ارادا رەسەي اۋماعىنان شىعىپ ۇلگەردى، رەسەيدەن شىعۋ ساتىندە سوعىسىپ جاتقان ەلدىڭ ءنومىرىن قولدانۋ اقىماقتىڭ ءىسى ەمەس پە" دەيدى جۇرت. كامەرا جوق جەردە جاسالعان قىلمىستى تەز ارادا تاۋىپ العان فقق جىلدامدىعىنا جۇرت "تاڭدانىس" بىلدىرۋدە. مىڭداعان كامەرا بار، كرەملدىڭ جانىندا نەمتسوۆتى اتىپ كەتكەنىنە جەتى جىل بولسا دا، ناقتى قىلمىسكەرلەر ءالى تابىلمادى، ال ونى ءولتىردى دەپ سوتتالعاندار كەيىن قىلمىستى مويىنداۋدان باس تارتتى.

"ناتاليا پاۆلوۆنا ازوۆ پولكىنىڭ مۇشەسى" دەيدى فقق. الايدا "ازوۆ" ونىڭ وزىنە ەش قاتىسى جوقتىعىن رەسمي مالىمدەدى. رەسەي بيلىگى ەستونيا جىلدام ارادا ناتاليا پاۆلوۆنانى قايتارۋى قاجەت دەگەن تالاپ قويۋدا. "قايتارماسا قاتاڭ شەشىم قابىلدايمىز" دەيدى ادەتتەگىدەي قورقىتا-ۇركىتە.

ساراپشىلار رەسەي بيلىگى بۇل قىلمىستى قاساقانا ۇيىمداتىرۋى مۇمكىن دەيدى. باستى ماقسات "ازوۆ" پولكىنە جۇرگىزۋدى كوزدەپ وتىرعان تريبۋنالدى حالىقارالىق قاۋىمداستىق الدىندا لەگەتيمدى ەتۋگە تىرىسۋ.

Abai.kz