حالىقارالىق اتوم قۋاتى جونىندەگى اگەنتتىگى رەسەيلىك اسكەر باسىپ العان زاپوروجە اتوم ەلەكتر ستانتسياسىنداعى جاعداي تۋرالى ەسەبىن جاريالادى.

وتكەن اپتاداعى تەكسەرۋ كەزىندە ينسپەكتورلار ستانتسيانىڭ بىرنەشە جەرى، سونىڭ ىشىندە وڭدەلگەن يادرولىق وتىن ساقتايتىن ورىن زاقىمدالعانىن انىقتادى.

ماگاتە ەسەبىنشە، بۇدان بولەك تۋربينالاردى مايلاۋعا ارنالعان سۇيىقتىق ساقتالعان تسيستەرنا; رەاكتور ورنالاسقان عيمارات ماڭىنداعى كەشەن; وقۋ كورپۋسى; ستانتسيانى قورعايتىن اپات جۇيەسى ورنالاسقان عيمارات; سونىمەن بىرگە رادياتسيا دەڭگەيىن باقىلاۋ جۇيەسى ورنالاسقان كونتەينەر بۇلىنگەن.

ساراپشىلار زاپوروجە اتوم ەلەكتر ستانتسياسى اۋماعىندا رەسەيلىك اسكەري تەحنيكا بولعانىن حابارلادى.

ەسەپتە ستانتسيادا "قاۋىپسىزدىك ايماعىن" بەلگىلەۋ قاجەتتىگى ايتىلعان. ماگاتە وسى ىسكە كومەكتەسۋگە دايىن. اگەنتتىك اتوم ستانتسياسىن اتقىلاۋدى دوعارۋعا شاقىرىپ، بۇنىڭ سوڭى "يادرولىق اپاتقا" ۇلاسۋى مۇمكىن ەكەنىن ەسكەرتتى.

زاپوروجە اەس-ىنە ءجيى وق اتىلىپ ءجۇر. ۋكراينا مەن رەسەي شابۋىلعا ءبىر-ءبىرىن ايىپتاپ وتىر.

ماگاتە ينسپەكتورلارى زاپوروجە اەس-ىنە 1 قىركۇيەكتە كىرىپ، ءتورت ساعاتتاي سوندا بولدى. اگەنتتىك ميسسياسىنىڭ التى مۇشەسى اپتا اياعىنا دەيىن ستانتسيادا قالسا، ەكەۋى تۇراقتى تۇردە سوندا بولادى.

Abai.kz