پرەزيدەنت قاسىم-جومارت توقاەۆتىڭ وتكەن جولداۋىندا مەملەكەت پەن حالىق, ءار ازامات ءۇشىن كوپتەگەن ماڭىزدى دۇنيەلەر تىلگە تيەك بولدى. سونىڭ ەڭ باستىسى – بۇدان بىلاي پرەزيدەنتتى تەك 1 مەرزىمگە، 7 جىلعا سايلاۋ تۋرالى شەشىم. بۇنى حالقىمىز كوپتەن كۇتكەنى انىق ەدى. دامىعان ەلدەردە ءبىر رەت ەل باسقارعان ادام ەكىنشى مارتە قايتا وتىرا قويمايدى. سونىڭ ارقاسىندا بيلىك ءبىر ادامنىڭ قولىنا وتپەيدى، ادىلدىك ورنايدى. مىنە، وسى جولدى ۇستانا الساق، كەلەشەكتە ءبىز دە دەموكراتياسى مىعىم ورناعان مەملەكەتتەردىڭ قاتىرىنا قوسىلاتىن بولامىز. مۇنداي ەلدە ءار ازامات ءوز ەرتەڭىنە سەنىم ارتىپ، ەمىن-ەركىن ءومىر ءسۇرىپ، كەلەشەك ءۇشىن جۇمىلىپ ارەكەت ەتە الاتىنى داۋسىز.

قوعامدا «نەگە 7 جىل، 5 جىل دا جەتكىلىكتى ەدى عوي?» دەگەن ساۋال تۋىنداۋدا. بىراق, مەن ءۇشىن 7 جىلدىق مەرزىم دۇرىس سەكىلدى. ويتكەنى 5 جىلدىڭ ىشىندە باسشى العا قويعان ماقسات-مىندەتتەرىن ورىنداپ ۇلگەرە الماۋى مۇمكىن. مىسالى، بۇرىن ءبىر وبلىسقا اكىم كەلەدى، ماقسات-مىندەتتەرىن ايقىنداپ الادى، سونى ەندى ىسكە اسىرعالى بىلەك سىبانىپ جاتقاندا ورنىنا باسقا ءبىر اكىم كەلەتىن. جاڭاسى بۇرىنعىنىڭ جولىن جالعاستىرمايتىنى انىق قوي. ونىڭ دا ءوز باستاماسى بولادى. بۇل دا سول سياقتى دۇنيە. ەل باسقارعان ادامعا 7 جىلدىق مۇمكىندىك بەرگەنىمىز ءجون. وسى ۋاقىتتىڭ ىشىندە ءوزىن كورسەتە الۋى ءتيىس. باعاسىن بەرەتىن ءار كەزدە دە – حالىق. شىنىندا 7 جىل اسا ۇزاق تا مەرزىم ەمەس. 20 جىلدان استام ۋاقىتتىڭ ىشىندە ءبىر ەمەس، ءۇش پرەزيدەنت اۋىستىرامىز. ەسەسىنە ءبىر ادام بيلىكتى قولىنا الىپ، بولىسكە سالىپ وتىرمايدى. سوندىقتان بۇل باستامانى ادىلەت جولىنا تۇسۋگە باعىتتالعان بەتبۇرىس رەتىندە باعالايمىن.

كەنجەعالي مىرجىقباەۆ

Abai.kz