21 قىركۇيەكتەن باستاپ قازاقستانعا رەسەيدەن كەلگەن اۆتوكولىكتەر اعىنى 20%-عا ءوستى، دەپ حابارلادى قر مەملەكەتتىك كىرىستەر كوميتەتى. 

"2022 جىلدىڭ 21 قىركۇيەگىنەن باستاپ  قازاقستان رەسپۋبليكاسىنا رەسەي فەدەراتسياسىنان كەلگەن جەڭىل اۆتوكولىك قۇرالدارىنىڭ سانى 20% - عا ءوستى", - دەلىنگەن حابارلاما.

كوميتەتتىڭ مالىمدەۋىنشە، قازاقستان-رەسەي شەكاراسىندا جەڭىل اۆتوكولىكتەردىڭ كەپتەلىسى بايقالادى، اسىرەسە اقتوبە، اتىراۋ، باتىس قازاقستان جانە قوستاناي وبلىستارىندا قاتتى كەپتەلىس بولىپ جاتىر.

ايتا كەتەيىك، 21 قىركۇيەكتە رەسەيدە جارتىلاي موبيليزاتسيا جاريالانعاننان كەيىن قازاقستانعا كەلگىسى كەلەتىن رەسەي ازاماتتارىنىڭ سانى كۇرت كوبەيدى. 23 قىركۇيەكتە قر ۇقك شەكارا قىزمەتى شەكاراداعى جاعدايدى ەرەكشە باقىلاۋعا العانىن حابارلادى.

Abai.kz