ءپۋتيننىڭ "يادرولىق قارۋ قولدانامىن، انە باستىم، مىنە باسقالى وتىرمىن" دەگەن قوقان لوققىسىنان ابدەن زارەزاپ بولعان ۆاشينگتون وتكەندە كرەملگە جاۋاپ جازىپ جىبەرىپتى.
"سەن يادرولىق قارۋ قولدانساڭ، ءبىز وعان جاۋاپ رەتىندە سەندەگى انانى جارتى ساعاتتا يا مىنانى ءبىر كۇندە فىشت قىلامىز، جاقسىلىقپەن قويا قويسايشى كوكە" دەپتى.

"ارتىن اپات قىلامىز" دەدى كەڭەسشى دج سالليۆان، ودان سوڭ بلينكەن شىعىپ "جو جوق، سۋپەر اپات قىلامىز" دەپ ناقتىلاپتى.

قالاي دەسە دە دجوزەف بايدەن نەگىزى مىقتى ساياساتكەر. ونى جالتاق دەپ ايتۋعا كەلمەس. ونىڭ قولىندا 300 ميلليوننان استام حالىقتىڭ تاعدىرى تۇر، ياعني امەريكاندىقتاردىڭ.
شىعىس ەۋروپاداعى ءبىر ەل ءۇشىن (ۋكراينا) ول ءوز حالقىنىڭ تاعدىرىن تارازى باسىنا تەڭ سالا الا ما. ارينە جوق.
مەنىڭشە كوپتى كورگەن قارت سونى الاڭ قىلادى. بۇل جانجالدان شەگەتىن زيانىن دا ءبىلىپ وتىر.
بىراق ۋكراينانى دا تاستامادى.
ارتىنا قارايلاي قارايلاي ونىڭ تاۋەكەلىنە دە بەل بايلادى.
بايدەننىڭ سايلاۋشىلارى بار. ونىڭ سايلاۋشىلارى بۇنىڭ سىرتتاعى ارەكەتىن تۇسىنبەۋى مۇمكىن.
نەلىكتەن ايدالاداعى شىعىس ەۋروپاداعى (ۋكراينا) ەل ءۇشىن ونىڭ حالقى يادرولىق زىمىرانداردىڭ استىندا قالىپ وپات بولۋى كەرەك دەگەندەي...

ول سولاي ەندى، ءىس جۇزىندە ءبىراز امەريكاندىقتار ءۇشىن ۋكراينا — ايدالاداعى ەل. نەگىزى امەريكاداعى سايلاۋشىلاردىڭ جارتىسى عانا بايدەندىكى. ەلەكتوراتتتىڭ جارتىسى ءداستۇرلى تۇردە رەسپۋبليكاندىقتاردا بولادى.
سايلاۋعا تۇسەتىن بايدەن، رەپۋتاتسيا سونىكى، سوسىن اقش تا كەز كەلگەن ساياساتكەر ءار قادامىن اڭداپ باسادى دەگەندەي... ال بايدەن قىرىق جىل ستاجى بار سۇرلەنگەن ساياساتكەر، سۇيەگى ساق ادام.
سودان ونى جالتاق دەپ ايتۋعا كەلمەس..

بۇ جەردە اقش مەمل حاتشىسى — ەنتوني بلينكەندى قورعانىس ءمينيسترى للويد ءوستيندى ەرەكشە ايتا كەتسە بولادى. جالپى ەكەۋىنە ىرزامىن مەن.

بۇگىنگى كۇننىڭ ەكى قىرعيى - وسى ەكەۋى. ولاردى نەگىزى "قىرعي" دەيدى نەمەسە بۇل اتاۋدىڭ ءسال اۋىتقىعان تارجىمەسىمەن ياسترەب دەسەك بولادى.
اقش تا سىرتقى ساياساتتا باتىل ساياسات جۇرگىزەتىن مىقتىلاردى سوناۋ زاماننان بەرى "ياسترەب" دەيدى. شىن مانىندە سىرتتاعى اق ءۇي دۇشپاندارىنا وتە قاتال، تاۋەكەلشىل بەزبۇيرەك ادامدار بۇلار. بۇلاردىڭ بۇنداي بەزبۇيرەكتىگىنەن امەريكاندىقتاردىڭ وزدەرى دە قورقادى. ستاۆكانى كوتەرىپ تاستاپ كۇل بولماساڭ ءبۇل بول دەپ وتىرا بەرەدى.
قازىر دە پۋتينمەن قاتتى ەرەگىسىپ وتىر. "سەندە دە بار يادرو مەندە دە بار" دەپ وقشانتايىن سارتىلداتىپ وتىر.
ءبىر جاعىنان ونى دا تۇسىنۋگە تىرىسامىن، پۋتينمەن باسقا اڭگىمە جۇرمەيدى.

بۇلاردىڭ ءار مالىمدەمەلەرىن قالت جىبەرمەي قاداعالاپ وتىرامىن.
ءىس جۇزىندە ۋكراينانى قازىر جەتەكتەپ سۇيرەپ كەلە جاتقان ۆاشينگتونداعى ەكى باستى تۇلعا — وسى ەكەۋى. بايدەن "ال تارتىڭدار" دەپ بۇل ەكەۋىنە بوجىسىن ۇستاتتى.
ودان سوڭ وستين مەن بلينكەن العى شەپكە ويقاستاپ شىعىپ جارقىلداۋدا.
اۋەل باستان بۇل رەسەيمەن بوپ جاتقان تايتالاسقا بىلەگىن سىبانا كىرىستى.
اقش — سۋپەردەرجاۆا. بايدەننىڭ كومانداسى بۇل كۇرەستە سونىڭ بارلىق تەتىكتەرىن ىسكە قوستى. ۆاشينگتوننىڭ اسكەري، ەكونوميكالىق، عىلىمي، قارجى، مادەني، ساياسي ماشيناسى وت الدى.

ۋكراينانىڭ اۋىزىنا ءبارىن شايناپ بەرىپ جانتايسا دەمەپ وتىر. توبەسىندەگى سپۋتنيگىنە قاراپ قۇندى مالىمەتتەرىنە شەيىن بەرىپ وتىر.
رامشتاين مەن لەند ليز — ءوستيننىڭ مويىنىندا.
قالعانى وسى بلينكەندە. ەكى جارتى ءبىر ءبۇتىن بوپ بۇلار قازىرگى ۋكراينانى — ۋكراينا قىلىپ وتىر.

باياعىدا اقش — سوۆەت قىرعيقاباق سوعىسى تۇسىندا ۆاشينگتونداعى باستى كەيىپكەرلەردىڭ ءبىرى اتاقتى زبيگنەۆ بزەجينسكي بولاتىن.
جارىقتىق بزەجينسكي اقش تاعى ياسترەبتەردىڭ تورەسى ەدى. وتە اقىلدى، ينتەللەكتۋال، كەمەڭگەر كىسىلەردىڭ ءبىرى ءتىن. ءبىراز ۋاقىت اقش تىڭ سىرتقى ساياساتىن اشسا الاقانىندا، جۇمسا جۇدىرىعىندا ۇستادى بۇل پولياك.
شىنى كەرەك، سوۆەتتىڭ مولاسىن ءوز قولىمەن قالاپ، كورىن قازعان ادامداردىڭ ءبىرى وسى بزەجينسكي ەدى.
جاتپاي تۇرماي قاي جەردەن سوۆەت وكىمەتىنە سوققى جاساسام دەپ ونىڭ وسال جەرلەرىن ىزدەۋ دە ونىڭ باستى قىزمەتى بولاتىن.
كورەيا، اۋعانستان، شىعىس ەۋروپا، اراپ ايماعى... بارىندە بزەجينسكيدىڭ قولى كورىنىپ تۇراتىن.
كوممۋنيستەر ودان ابدەن زارەزاپ بوپ بزەجينسكيدىڭ اتىن ەستىگەندە زارەلەرى ءزار تۇبىنە كەتۋشى ەدى ول كەزدە.
قازىرگى بلينكەننىڭ كەيبىر ارەكەتىن كورگەندە، "ۆاشينگتوندا زبيگنەۆ بزەجينسكيدىڭ لايىقتى ءىزباسارى قالعان ەكەن اۋ" دەپ ءسۇيسىنىپ كەتەمىن.

قىسقاسى، "ياسترەبتەر" ولمەپتى، بار ەكەن. تاريح ساحناسىندا ارپالىسىپ جاتىر.

ولجاس ءابىل

Abai.kz