جەكسەنبى, 5 اقپان 2023
الاساپىران 2565 0 پىكىر 10 قازان, 2022 ساعات 13:47

بوپساداعى بەلارۋس، سوققى استىنداعى ۋكراينا

ۋكراينا سوعىسى جاڭا ماسشتابقا ءوتۋ قاۋپى ارتتى. سوعىستا بۇعان دەيىن ءوز اۋماعىنا رەسەي اسكەرى ورنالاسىپ، ۋكراينا جەرىنە زىمىران جانە اۋە شابۋىلىن جاساۋعا رۇقسات بەرگەن بەلارۋس ەندى اشىق سوعىسقا كىرىسۋى مۇمكىن دەيدى ساراپشىلار. 

بەلارۋس بۇل سوعىستىڭ ءبىر قاتىسۋشىسى سانالادى. ول تىكەلەي ۋكرايناعا شابۋىل جاساماسا دا، اگرەسسوردى اشىق جاقتاۋشى رەتىندە سانكتسيالىق قىسىمعا ۇشىراۋدا. لۋكاشەنكو اراعا جەتى اي سالىپ، ءبىر اپتا بۇرىن بەلارۋستىڭ بۇل سوعىسقا قاتىسىپ جاتقانىن مالىمدەدى. ء"بىز ەشكىمدى ولتىرگەن جوقپىز، بىراق ءبىز بۇل ارنايى وپەراتسياعا قاتىسۋدامىز" دەدى ول.

"بەلارۋس اسكەرى ۋكراينا سوعىسىنا ارالاسۋ قاۋپى ەسەلەپ ارتتى" دەيدى باتىستىق ساراپشىلار. لۋكاشەنكو 7 ايدان استام ۋاقىت بويى ءپۋتيننىڭ بوپساسىنا كونبەي، ۋاقىت سوزىپ كەلەدى. الايدا وتكەن اپتادا ءبىراز وزگەرىس بولدى.

بەلارۋس ءسىم ۋكراينا ەلشىسىن شاقىرىپ الىپ، قارسىلىق نوتاسىن تابىستادى. سونداعى ايتقانى، “ۋكراينا بىزگە شابۋىل جاساۋعا دايىندالۋدا” دەيدى. ارينە بۇل اقىلعا قونىمسىز، كيەۆكە ەكى فرونتتا سوعىسۋ وتە قيىن ەكەنىن بەس جاستاعى بالا دا بىلەدى. ونىڭ ۇستىنە ۋكراينانىڭ بار ماقساتى ءوز اۋماعىن دەوككۋپاتسيالاۋ. بولدى. باسقا ماقسات جوق.

كۇنى كەشە بەلارۋس قورعانىس مينيسترلىگى “قاجەت بولسا 500 مىڭ ادامدى موبيليزاتسيالاي الامىز” دەدى. بەلارۋس جەرىنە رەسەيدىڭ موبيليزاتسيالانعاندارىنان 20 مىڭ ادام ورنالاسپاق. سونداي-اق يراننىڭ كاميكادزە دروندارى دا بەلارۋس جەرىنە اكەلىنۋدە. ساراپشىلار بەلارۋس وڭتۇستىگى مەن باتىسىنا اسكەرىن توپتاستىرىپ جاتقانىن ايتادى. ال ۋكراينا بەلارۋس جاقتان بولۋى ىقتيمال شابۋىلعا دايىندالىپ، ماڭىزدى جولداردى مينالاۋ، كوپىرلەردى جارۋ جۇمىستارىن ىسكە اسىرۋدا.

ۋكراينا ءوزىنىڭ ءتورت ايماعىن ازات ەتۋ وپەراتسياسىن كۇشەيتتى. وسى ساتتە بەلارۋس اسكەرى سوعىسقا قوسىلسا، وندا كيەۆ وبلىسىنا تونەتىن قاۋىپتى ەسكەرىپ، وڭتۇستىكتەگى جانە شىعىستاعى اسكەردىڭ ءبىر بولىگىن ۋكراينا سولتۇستىگىنە جىلجىتۋى مۇمكىن. بۇل ءسوزسىز ازات ەتۋ وپەراتسياسىنىڭ قارقىنىن تومەندەتەدى. رەسەيدىڭ حەرسوندى جوعالتۋ قاۋپى ارتقان سايىن، بەلارۋستىڭ سوعىسقا قوسىلۋ قاۋپى دە ارتۋدا. پۋتين لۋكاشەنكونى كوندىرىپ، بالكي ماجبۇرلەپ الەك.

بەلارۋستىڭ سوعىسقا كىرۋىنەن بولەك، قىرىم كوپىرىنە جاسالعان سوققىعا بايلانىستى ۋكرايناعا رەسەي زىمىرانمەن سوققى جاساۋدا. كيەۆ، لۆوۆ، جيتومير، حاركوۆ، زاپوروجە سوققى استىندا قالدى. قازا تاپقاندار مەن جارالانعاندار سانى كوپ دەيدى ۋكراينا بيلىگى. نىسانداردىڭ بارلىعى دەرلىك بەيبىت تۇرعىندارعا تيەسىلى، ال اسكەري نىساندار زارداپ شەكپەگەن. مەكتەپ، كوشە، جاياۋ جۇرگىنشىلەر جولاعى مەن بالالار الاڭىنا زىمىراندار تۇسۋدە.

اسحات قاسەنعالي

Abai.kz

0 پىكىر