ازالى كۇنى ايىلىن جيماعاندار ايىپسىز قالا بەرە مە؟
مەملەكەت باسشىسى نۇرسۇلتان نازارباەۆتىڭ جارلىعىمەن «كوكشەتاۋ-الماتى» باعىتىمەن ۇشىپ كەلە جاتقان اۋە كەمەسىنىڭ اپاتقا ۇشىراۋىنا بايلانىستى كەشە ەل تۇرعىندارى ازا تۇتتى.
مەملەكەت باسشىسى نۇرسۇلتان نازارباەۆتىڭ جارلىعىمەن «كوكشەتاۋ-الماتى» باعىتىمەن ۇشىپ كەلە جاتقان اۋە كەمەسىنىڭ اپاتقا ۇشىراۋىنا بايلانىستى كەشە ەل تۇرعىندارى ازا تۇتتى.
مەملەكەتتىك تەلەارنالار مەن راديو توراپتار ويىن-ساۋىقتىق باعدارلامالاردى كۇرت تىيىپ، قابىرعاسى قايىسقان وتباسىلاردىڭ قايعىسىنا ورتاقتاستى. بىراق كەيبiر كوممەرتسيالىق جانە كابەلدىك جەلىلەر ارقىلى تارايتىن ارنالار مەن «رۋسسكوە راديو»، «رەترو فم»، «تەنگري فم»، «اۆتوراديو»، «NS» جانە باسقا بىرقاتار راديولار ايىلىن جيعان جوق. كۇندەلىكتى داعدىسىمەن كوڭىل كوتەرىپ، ۇيرەنشىكتى جۇمىستارىن جالعاستىرا بەردى. نەگە؟ زاڭ بويىنشا تۋ تۇسىرىلگەن ساتتە بارلىق تەلەارنالار مەن راديولاردان ويىن-ساۋىقتىق، كوڭىلاشار باعدارلامالار توقتاتىلىپ، جارنامالار كورسەتىلمەۋى ءتيىس. «كوممەرتسيالىق حابار تاراتاتىن تەلە-راديولارعا بۇل زاڭنىڭ قاتىسى جوق، تەك مەملەكەتتىك ارنالار ازا تۇتسىن» دەپ، جالپىعا ورتاق اۋىرتپالىقتى ەشكىم ساۋدالاماعان شىعار. ولاردىڭ وسى مەملەكەتتە تۇراتىن قوعام مۇشەسى رەتىندە دە ارىستاي ازاماتتاردىڭ اجالى مەن قارالى ەلدىڭ باسىنداعى اۋىر قايعىعا سەلت ەتپەگەندەرى قالاي؟ جۇرەكتەرى اۋىرىپ، جاندارى اشىماعانى ما؟ قايعىنى ءبولىسۋدىڭ ورنىنا نەمكەتتى قاراعانى نەسى؟ ءبىر كۇن داڭعازا دۋماندى تىيا تۇرىپ، مارقۇمدار مەن ولاردىڭ قايعىدان قان جۇتىپ وتىرعان جانۇياسى مەن ەت جاقىندارىنا قۇرمەت كورسەتپەگەندەرىن قالاي تۇسىنەمىز؟! ولاردىڭ كوبى شەتەلدىك راديوستانسالاردىڭ، تەلەارنالاردىڭ بولىمشەسى بولعانىمەن، ءبارىبىر ءوز ونىمدەرىن قازاقستان اۋماعىندا تاراتىپ وتىر ەمەس پە؟ الدە ولار مۇنى تەك اتتوبەلىندەي اعايىننىڭ قايعى-قاسىرەتى دەپ ءبولىپ قاراي ما؟ جالپى، جان تارىققاندا جانىمىزدان تابىلماعانداردىڭ ارەكەتىن قالاي باعالاۋعا بولادى؟ ءبىزدىڭ ويىمىزشا، ازالى كۇنى ايىلىن جيماعاندارعا ءبىر شەكتەۋ قويىپ، ءتيىستى ورىندار تاراپىنان تىيىم سالىنۋى كەرەك ءتارىزدى...
قانشايىم بايداۋلەت
"ايقىن" گازەتى
