بۇگىن تۇركيانىڭ كۋندۋ قالاسىندا فۋتبولدان قازاقستان ۇلتتىق قۇراماسى مولدوۆا قۇراماسىمەن جولداستىق كەزدەسۋ وتكىزەدى. اتالمىش كەزدەسۋگە ءبىر كۇن قالعاندا باس كوماندامىزدا ءبىراز وزگەرىستەردىڭ بولعانى انىقتالدى.

كۋندۋ قالاسىندا اۋا رايى جانعا جاي­لى. تەرمومەتر باعانى +15 گرادۋستى كور­سە­تىپ تۇر. كەزدەسۋ كەزىندە دە اسپان اشىق، كۇن جىلى بولاتىنىن عالامتور بەتتەرىنەن بىلدىك. ءتىپتى 20 گرادۋسقا دەيىن جىلۋى دا مۇمكىن.

جالپى، كۋندۋ - تۇركياداعى جىلدام قارقىنمەن دامىپ كەلە جاتقان كۋرورتتى جاس قالالاردىڭ ءبىرى. جەرورتا تەڭىزىنىڭ جا­عالاۋىندا ورنالاسقان. انتاليادان 30 شاقىرىم، بەلەكتەن بەس شاقىرىم ارىدە جاتىر. ادەتتە، جىلدىڭ بۇل مەزگىلىندە كوبىنە كۇن اشىق. سوندىقتان دا بولار، ۇلت­تىق قۇرامامىز بيىل وقۋ-جاتتىعۋ جيى­نىن وسى قالادا وتكىزۋدى شەشىپتى. كو­مان­دا كۇنىنە ەكى مەزگىل جاتتىعۋدا. سون­داي-اق زالداردا اتلەتيكالىق گيمناستيكا­مەن اينالىسىپ، فيزيكالىق قالىپتارىن ساقتاپ ءجۇر.

وكىنىشكە قاراي، ۇلتتىق قۇرامامىز كۋن­دۋعا ءتورت كوزى تۇگەل جينالا المادى. قورعاۋشى مۇحتار مۇحتاروۆ پەن جارتىلاي قورعاۋشىلار اناتولي بوگدانوۆ پەن قازبەك گەتەريەۆتىڭ ازداعان جاراقاتتارى بار ەكەن، دارىگەرلەر بۇل ۇشەۋىنە جولداس­تىق كەزدەسۋگە قاتىسۋعا رۇقسات بەرمەدى. سونداي-اق دەنساۋلىعىنا بايلانىستى ۆالەري كوروبكيننىڭ دە الاڭعا شىقپاۋى مۇمكىن. ولاردىڭ ورنىنا باس باپكەر مي­روس­لاۆ بەرانەك جيىنعا ءبىر-اق ويىنشىنى شاقىرتتى. ول - «تاراز» فۋتبول كلۋبىنىڭ جاس قورعاۋشىسى ەلدوس احمەتوۆ. ەلدوس بۇ­عان دەيىن باس كوماندا ساپىندا ءبىر كەزدەسۋ وتكىزگەن. وسىدان تۋرا ءبىر جىل بۇرىن ان­تا­ليادا وتكەن جولداستىق كەزدەسۋدە لا­تىشتارعا قارسى ءساتتى ويناعان بولاتىن.

دەگەنمەن قارسىلاستار ساپىندا دا وزگەرىس بار. قازاقستاننىڭ «اقتوبەسىندە» ونەر كورسەتەتىن سەرگەي كوۆالچۋك جيىن­داردىڭ بىرىندە جاراقات الىپ قالىپتى. ونىڭ ورنىنا مولدوۆانىڭ باس باپكەرى يون كاراس ميلساميدەن جارتىلاي قورعاۋ­شى ماريان ستولەرۋدى جەدەل تۇردە شا­قىرت­تى. بۇل فۋتبولشى بۇعان باس كوماندا ساپىندا الاڭعا شىقپاعان ەكەن. مولدوۆا فۋتبولشىلارى انتاليادا جاتتىعۋ جيى­نىن 2 اقپاندا باستاپ كەتكەن.

جالپى، مولدوۆا قۇراماسىنىڭ بىزدەن مىقتىلىعى شامالى. ءتىپتى فيفا رەيتين­گىندە دە قازاقستان قۇراماسىنان الىسقا ۇزاي قويعان جوق. ياعني ءبىز 142-ورىندا بول­ساق، ولار - 128-ورىندا. تاياۋدا، ناق­تى ايت­ساق، وسى ايدىڭ باسىندا مولدو­ۆا فۋت­بول فەدەراتسياسىندا ۇلكەن كونگرەسس ۇي­ىم­داستىرىلىپ، پرەزيدەنتتىك سايلاۋ ءوتتى. كونگرەسس بارىسىندا 50-دەن استام جان­كۇيەر عيماراتتىڭ سىرتىن تورۋىلداپ، ەل فۋتبولىنىڭ باياۋ دامۋىنا بايلانىس­تى نارازىلىق شەرۋىن وتكىزدى. دەگەنمەن سوعان قاراماستان پاۆەل چەبانۋ بەسىنشى رەت قاتارىنان جەڭىمپاز اتانىپ، قاي­تادان ەل فۋتبولىنىڭ باسشىسى بولىپ سايلاندى.

ال ەندى قوس قۇرامانىڭ فۋتبولشى­لارىن سالىستىرىپ كورەيىك. الەم فۋتبول­شى­لارىنىڭ باعاسىن انىقتاۋمەن اينا­لىساتىن ەۋروپاداعى بەدەلدى transfer­markt.de سايتىنىڭ مالىمەتى بويىنشا، قازاقستاننىڭ ەڭ قىمبات ويىنشىسى - گەن­ريح شميدتگال. «گرويتەر فيۋرت» قور­عاۋشىسى 1,750 ميلليون ەۆرو تۇرادى. مول­دوۆانىڭ ەڭ قىمبات ويىنشىسى - الەكساندر ەپۋريانۋ. ماسكەۋدىڭ «دينا­موسىندا» ونەر كورسەتەتىن قورعاۋشىنىڭ نارىقتاعى باعاسى 3 ميلليون ەۆرو.

دەگەنمەن قوس قۇرامانىڭ قۇنى قان­شا­لىقتى بولسا دا، جاسىل الاڭدا كەزدەسۋ تاع­دىرىن فۋتبولشىلاردىڭ باعاسى ەمەس، شەبەرلىكتەرى شەشەدى. ەندەشە، جىگىتتەرى­مىزگە جارقىن ويىن مەن ساتتىلىك تىلەيمىز!

تransfermarkt.de سايتىنىڭ مالىمەتى بويىنشا، وسى جيىنعا شاقىرتىلعان مولدوۆا ۇلتتىق قۇراماسى فۋتبولشىلارىنىڭ نارىقتاعى باعالارى:

قاقپاشىلار: ستانيسلاۆ نەماشكو - 300 مىڭ €، سەرگەي پاششەنكو - 150 مىڭ €، ادريان نەگاي - ؟ €: بارلىعى - 450 مىڭ €.

قورعاۋشىلار: الەكساندر ەپۋريانۋ - 3 ملن €، يگور ارماش - 1,5 ملن €، ۆيكتور گولوۆاتەنكو - 650 مىڭ €، سەمەن بۋلگارۋ - 400 مىڭ €، پەتر راكۋ - 200 مىڭ €، يون جاردان - ؟ €: بارلىعى - 5, 750 ميلليون €.

جارتىلاي قورعاۋشىلار: الەكساندر گاتسكان - 2 ملن €، ستانيسلاۆ يۆانوۆ - 400 مىڭ €، الەكساندر ونيكە - 300 مىڭ €، الەكساندر سۋۆوروۆ - 300 مىڭ €، ارتۋر يونيتسە - 300 مىڭ €، ارتۋر پاتراش - 250 مىڭ €، سەرگەي گەورگيەۆ - 200 مىڭ €، الەكساندر پاششەنكو - 150 مىڭ €، ماريان ستولەرۋ - ؟ €: بارلىعى - 3,9 ميلليون €.

شابۋىلشىلار: يگور پيكاششۋك - 800 مىڭ €، يگور بۋگاەۆ - 400 مىڭ €، اناتولي دوروش - 250 مىڭ €، الەكساندر دەدوۆ - 200 مىڭ €، سەرگەي دادۋ - 100 مىڭ €: بارلىعى - 1,750 ميلليون €.

بارلىعى - 11,850 ميلليون ەۆرو.

تransfermarkt.de سايتىنىڭ مالىمەتى بويىنشا، وسى جيىنعا شاقىرتىلعان قازاقستان ۇلتتىق قۇراماسى فۋتبولشىلارىنىڭ نارىقتاعى باعالارى:

قاقپاشىلار: اندرەي سيدەلنيكوۆ - 200 مىڭ €، انتون تسيرين - 150 مىڭ €، الەكساندر موكين - 150 مىڭ €: بارلىعى - 500 مىڭ €.

قورعاۋشىلار: ۆيكتور دميتريەنكو - 350 مىڭ €، يۋري لوگۆينەنكو - 300 مىڭ €، قايرات نۇرداۋلەتوۆ - 250 مىڭ €، مارك گۋرمان - 200 مىڭ €، دميتري شومكو - 200 مىڭ €، الەكساندر كيروۆ - 150 مىڭ €، ەلدوس احمەتوۆ - ؟ €: بارلىعى - 1,450 ميلليون €.

جارتىلاي قورعاۋشىلار: جامبىل كوكەەۆ - 500 مىڭ €، مارات شاحمەتوۆ - 300 مىڭ €، باۋىرجان جولشيەۆ - 300 مىڭ €، ۇلان قونىسباەۆ - 200 مىڭ €، مارات حايرۋللين - 150 مىڭ €، پاۆەل شابالين - 150 مىڭ €، ماقسات بايجانوۆ - 100 مىڭ €: بارلىعى - 1,750 ميلليون €.

شابۋىلشىلار: تاڭات نوسەرباەۆ - 500 مىڭ €، سەرگەي وستاپەنكو - 300 مىڭ €، سەرگەي گريدين - 100 مىڭ €، تيمۋر بايجانوۆ - 50 مىڭ €: بارلىعى - 950 مىڭ €.

بارلىعى - 4, 650 ميلليون ەۆرو.

اۆتور: ءازيز ءجۇمادىل

"الاش ايناسى" گازەتى