رەسپۋبليكا سارايىندا الماتى قالاسىنىڭ اكىمى ەربولات دوساەۆ، وقۋ-اعارتۋ ءمينيسترى اسحات ايماعامبەتوۆ جانە عىلىم جانە جوعارى ءبىلىم ءمينيسترى ساياسات نۇربەكتىڭ قاتىسۋىمەن EdCrunch Reload 2022 حالىقارالىق كونفەرەنتسيا باستالدى.

ءىس-شاراعا 25 ەلدەن 350 ساراپشى قاتىسقان. ولاردىڭ ىشىندە يزرايل، فينليانديا، وزبەكستان، ءازىربايجان، ارمەنيا ەلىنىڭ عىلىم جانە ءبىلىم مينيسترلەرى، سونىمەن قاتار، الەمدىك دەڭگەيدەگى جيىرمادان استام جەتەكشى ۋنيۆەرسيتەتتىڭ رەكتورلارى بار.

EdCrunch سپيكەرلەرى اراسىندا Minerva يننوۆاتسيالىق ۋنيۆەرسيتەتىنىڭ نەگىزىن قالاۋشى بەن نەلسون، General Assembly وقىتۋ جانە يننوۆاتسيالار جونىندەگى ۆيتسە-پرەزيدەنتى دەۆيد پوركارو، لوندون كورولدىك كوللەدجىنىڭ گەنەتيكا پروفەسسورى روبەرت پلومين، الەمدەگى العاشقى Lab of Misfits نەيروديزاين ستۋدياسىنىڭ نەگىزىن قالاۋشى بو لوتتو جانە ءبىلىم بەرۋ سالاسىنداعى كوپتەگەن باسقا حالىقارالىق ساراپشى بار. القالى جيىنعا قازاقستان اتىنان مەكتەپ ديرەكتورلارى، جوو رەكتورلارى، مۇعالىمدەر، تاربيەشىلەر جانە وفلاين جانە ونلاين فورماتتا قاتىسقان 20 مىڭنان استام ادام جينالدى.

كونفەرەنتسيا بارىسىندا ساراپشىلار وقىتۋدىڭ گيبريدتى فورماتى، مەكتەپ جاسىنا دەيىنگى بالالاردىڭ ينتەللەكتىسىن دامىتۋ، تسيفرلىق ترانسفورماتسياعا بەيىمدەلۋ، Big Data پايدالانۋ مۇمكىندىكتەرى، ءبىلىم بەرۋ كەڭىستىگىن جوبالاۋ جانە ت.ب. ماسەلەنى تالقىلادى.

23 جانە 24 قاراشادا كونفەرەنتسيا كۇندەرى ءىس-شارا قوناقتارى ءۇشىن EdCrunch Expo ينتەراكتيۆتى كورمەسى ۇيىمداستىرىلدى، ونىڭ اياسىندا وفلاين جانە ونلاين رەجيمدە جاڭا EdTech ونىمدەرىمەن، ولاردىڭ اۆتورلارىمەن تانىسىپ، كەزدەسۋ وتكىزۋگە، جەتكىزۋشىلەر مەن سەرىكتەستەر تابۋعا بولادى.

Abai.kz