قازاقستان 2027 جىلى استانادا وتەتىن دزيۋدودان الەم چەمپيوناتىنىڭ تۋىن رەسمي تۇردە قابىلداپ الدى، دەپ حابارلايدى «24KZ».

كەلەسى الەم چەمپيوناتىن قابىلدايتىن ەل رەتىندە قازاقستانعا حالىقارالىق دزيۋدو فەدەراتسياسىنىڭ (IJF) تۋىن تابىستاۋ ءراسىمى باكۋدە الەم چەمپيوناتى اياسىندا ءوتتى.

حالىقارالىق دزيۋدو فەدەراتسياسىنىڭ باس حاتشىسى ليزا اللان IJF تۋىن قازاقستان دزيۋدو فەدەراتسياسىنىڭ پرەزيدەنتى قۋانىشبەك ەسەكەەۆكە تابىستادى.

دزيۋدودان الەم چەمپيوناتى 2027 جىلعى 7-14 ماۋسىم ارالىعىندا استانادا وتەدى. ول 2028 جىلى لوس-اندجەلەستە وتەتىن وليمپيادا ويىندارىنا ىرىكتەۋدىڭ نەگىزگى كەزەڭدەرىنىڭ ءبىرى بولماق. الەم چەمپيوناتى اياسىندا سپورتشىلار وليمپياداعا بەرىلەتىن جولدامالاردى ءبولۋ كەزىندە ەسكەرىلەتىن ماڭىزدى رەيتينگتىك ۇپايلار ءۇشىن كۇرەسەدى.

«قازاقستاندا دزيۋدودان الەم چەمپيوناتىن وتكىزۋ – وتاندىق سپورت ءۇشىن ايرىقشا ماڭىزدى وقيعا ءارى حالىقارالىق سپورت قاۋىمداستىعىنىڭ بىزگە دەگەن جوعارى سەنىمىنىڭ بەلگىسى. بۇل ءبىز ءۇشىن ۇلكەن مارتەبە عانا ەمەس، سونىمەن قاتار زور جاۋاپكەرشىلىك. ءبىزدىڭ مىندەتىمىز – چەمپيوناتتى حالىقارالىق دزيۋدو فەدەراتسياسىنىڭ تالاپتارىنا ساي، ەڭ جوعارى دەڭگەيدە وتكىزۋ. ۇلتتىق قۇرامانى دايىنداۋعا ەرەكشە كوڭىل بولەمىز. ءوز جانكۇيەرلەرىنىڭ الدىندا، تاتاميدە ونەر كورسەتۋ سپورتشىلارىمىزعا قوسىمشا جاۋاپكەرشىلىك جۇكتەيدى. ءبىز لايىقتى ناتيجەلەرگە قول جەتكىزەمىز دەپ ۇمىتتەنەمىز جانە بارلىق قاجەتتى جاعدايدى جاسايمىز. دايىندىق جۇيەسىن جەتىلدىرىپ، ساپالى جاتتىعۋ ۇدەرىسىن ۇيىمداستىرىپ، سپورتشىلاردىڭ حالىقارالىق جارىستارعا قاتىسۋىنا مۇمكىندىك بەرەمىز. الدا اۋقىمدى ءارى كەشەندى جۇمىس تۇر. ءبىز الداعى چەمپيوناتتى قازاقستاننىڭ الەمدىك سپورت ارەناسىنداعى ورنىن نىعايتۋعا عانا ەمەس، ەلىمىزدە دزيۋدونى ودان ءارى دامىتۋعا دا پايدالانۋدى كوزدەپ وتىرمىز»، – دەدى قازاقستان دزيۋدو فەدەراتسياسىنىڭ پرەزيدەنتى قۋانىشبەك ەسەكەەۆ.

2027 جىلى قازاقستان ءوز تاريحىندا دزيۋدودان الەم چەمپيوناتىن ەكىنشى رەت قابىلدايدى. بۇعان دەيىن ەلىمىزدە الەمدىك دودا 2015 جىلى وتكەن. سونىمەن قاتار 2023 جىلدان 2026 جىلعا دەيىنگى ءتورت جىل بويى قازاقستان حالىقارالىق دزيۋدو فەدەراتسياسىنىڭ (IJF) رەسمي كۇنتىزبەسىنە ەنگەن ءارى وليمپيادا ويىندارىنا ىرىكتەۋ جۇيەسىندە ماڭىزدى ورىن الاتىن بەدەلدى حالىقارالىق Qazaqstan Barysy Grand Slam ءتۋرنيرىن ۇيىمداستىردى. وسىنداي جوعارى دەڭگەيدەگى جارىستاردى وتكىزۋ قازاقستاننىڭ الەمدىك دزيۋدوداعى ورنىن نىعايتىپ كەلە جاتقانىن جانە ەلىمىزدىڭ ءىرى حالىقارالىق سپورتتىق ءىس-شارالاردى قابىلداۋعا دايىن ەكەنىن كورسەتەدى.

Abai.kz