قازاقستاندىق ءانشى، كومپوزيتور، پروديۋسەر، مادەنيەت قايراتكەرى جانە تانىمال ءانشى ديماش قۇدايبەرگەننىڭ اكەسى قانات ايتباەۆ مەكتەپتەردەگى «قازاق ءتىلى» ءپانىن «قازاق ءتىلى – مەملەكەتتىك ءتىل» ساباعى دەپ وزگەرتۋدى ۇسىندى.

قانات ايتباەۆ:

«ەلىمىزدەگى مەكتەپتەردەگى وقۋ كەستەسىندە قازاق ءتىلى ساباعىن جاي عانا «قازاق ءتىلى» دەمەي «قازاق ءتىلى - مەملەكەتتىك ءتىل ساباعى» دەپ اتاعان ءجون.

بۇلاي اتاۋ - مەكتەپ قابىرعاسىنان باستاپ قازاق ءتىلىنىڭ مەملەكەتتىك ءتىل ەكەندىگىن، ونىڭ اسا ماڭىزدىلىعىن كۇندەلىكتى وسكەلەڭ ۇرپاقتىڭ ساناسىنا سىڭىرەدى.

كىتاپتىڭ مۇقاباسىندا «قازاق ءتىلى» دەپ جازىلعان مەملەكەتتىك ءتىل ساباعىنا نەمقۇرايلى قاراۋدىڭ نەمەسە ءجوندى قاتىسپاي، ناشار باعا الۋدىڭ قانداي بولاتىنىن ويلاپ كورىڭىز؟

بۇل - مەملەكەتكە، مەملەكەتتىك تىلگە قۇرمەتسىزدىك جانە ساۋاتسىزدىق بولادى ەمەس پە؟

قاي بالا ونداي قاتاردا جۇرگىسى كەلەدى؟

مەملەكەتتىك ءتىل ساباعىنان تاپسىرىلاتىن ەمتيحاندا قويىلاتىن باعا وقۋشىنىڭ جوعارى وقۋعا ءتۇسۋى ءۇشىن قاجەتتى ەڭ ماڭىزدى كورسەتكىشتەردىڭ ءبىرى بولۋعا ءتيىس.

وسى باعىتپەن جۇرسەك، ءانۇراندى بالاباقشا كەزىنەن جاتتاپ وسكەندەي بالالار مەملەكەتتىك تىلگە دە ۇلكەن قۇرمەتپەن قاراۋدى ۇيرەنەدى»، - دەپ جازدى.

بۇل ۇسىنىسقا قاتىستى ءسىزدىڭ پىكىرىڭىز قانداي؟ Abai.kz اقپاراتتىق پورتالىنىڭ الەۋمەتتىك جەلىدەگى پاراقشاسىندا ويلارىڭىزبەن بولىسە الاسىزدار...

سىلتەمە: قانات ايتباەۆ: «قازاق ءتىلى – مەملەكەتتىك ءتىل» ءپانى بولسىن!

Abai.kz