جەكسەنبى, 5 اقپان 2023
بيلىك 997 0 پىكىر 23 قاراشا, 2022 ساعات 17:57

«سامۇرىق-قازىنا» اتىراۋ وبلىسىندا ىسكە اسىرىلعان ينكليۋزيا جوبالارىن تانىستىردى

«سامۇرىق-قازىنا» قورى مەملەكەت باسشىسىنىڭ تاپسىرمالارىن ورىنداي وتىرىپ، ينكليۋزيۆتى جوبالاردى دامىتۋ اياسىندا اۋقىمدى جۇمىس جۇرگىزۋدە: ولاردىڭ قاتارىندا كوپبالالى انالاردى، ەرەكشە بالالاردى، مۇگەدەكتىگى بار ادامداردى قولداۋ.

«سامۇرىق-قازىنا» كومپانيالار توبى تەك اتىراۋ وبلىسىندا سوڭعى بەس جىلدا 1 ميلليارد تەڭگەدەن استام سوماعا 19 الەۋمەتتىك جوبانى ىسكە اسىردى. جوبالار ءوڭىر تۇرعىندارى ءۇشىن ماڭىزدى ماسەلەلەردى شەشۋگە جانە ۇكىمەتتىك ەمەس ۇيىمداردىڭ الەۋمەتتىك باستامالارىن قولداۋعا باعىتتالعان. بيىل وڭىردە 375,5 ملن تەڭگە سوماسىنا 7 جوبا ماقۇلداندى.

بۇگىن كومپانيالار توبى اتىنان قايىرىمدىلىق جوبالاردىڭ بىرىڭعاي وپەراتورى – «Samruk-Kazyna Trust» الەۋمەتتىك جوبالاردى دامىتۋ قورى قوعام ءۇشىن ىسكە اسىرىلعان باستامالاردى حالىق نازارىنا ۇسىندى.

ءباسپاسوز تۋرى سويلەۋ قابىلەتى بۇزىلعان، اۋتيزم، تسەرەبرالدى سال اۋرۋى جانە داۋن سيندرومى بار بالالاردى جان-جاقتى دامىتۋمەن اينالىساتىن، جاڭارتىلعان «زەيىن-اتىراۋ» ەرەكشە بالالاردى دامىتۋ ورتالىعىنا بارۋدان باستالدى. بيىل جوباعا «سامۇرىق-قازىنا» قورى كۇردەلى جوندەۋ جۇمىستارىمەن قاتار، جيھازدار مەن جابدىقتاردى جاڭارتۋدى قارجىلاندىردى، سونداي-اق 50 ەرەكشە بالاعا تەگىن وڭالتۋ كۋرستارىنا سەرتيفيكات تابىستالدى. جوبانىڭ قۇنى 27 ميلليون تەڭگەدەن اسادى.

جينالعان كوپشىلىك تۋردىڭ ەكىنشى نىسانى بالالارعا ارنالعان كەشەندى وڭالتۋ، دياگنوستيكا جانە كەڭەس بەرۋ قىزمەتتەرىن كورسەتەتىن «قامقورلىق» وڭالتۋ ورتالىعىنا باردى. ورتالىق جىلىنا 600 بالانى تەگىن قابىلدايدى. ايتا كەتەيىك، «سامۇرىق-قازىنا» قورىنىڭ قولداۋىمەن «قامقورلىق» جوباسى اياسىندا 2020 جىلدان باستاپ قازاقستاننىڭ بارلىق وڭىرىندە 15 وڭالتۋ ورتالىعى، 16 ينكليۋزيانى قولداۋ كابينەتى جانە 7 ەرتە ارالاسۋ ورتالىعى اشىلدى، ولاردى تولىق جابدىقتاۋ ءۇشىن 3 ملرد تەڭگەدەن استام قاراجات ءبولىندى.

قور ءاردايىم الەۋمەتتىك وسال ساناتتاعى ازاماتتاردى قولداۋعا ەرەكشە نازار اۋدارىپ كەلەدى. بۇل باعىتتا اتىراۋ وبلىسىنىڭ ىسكەر ايەلدەر قاۋىمداستىعىنىڭ جوباسى كورسەتىلدى، جوبا شەڭبەرىندە جالعىزباستى جانە كوپبالالى انالار، جۇمىسسىز ايەلدەر وزدەرىنىڭ قارجىلىق تاۋەلسىزدىگىن قامتاماسىز ەتۋ ءۇشىن كاسىبي داعدىلار مەن ناقتى كومەك الا الادى. قاۋىمداستىق ۇيىمداستىرعان كۋرستار 100 ايەلگە ارنالعان. ولار وقۋدان كەيىن ءوز ءىسىن اشۋ ءۇشىن تاۋار تۇرىندە گرانت الىپ، 50%-ى ءوز بيزنەسىن اشۋعا مۇمكىندىك يەلەنەدى دە، 30%-ى جۇمىسقا ورنالاسادى. جوبانىڭ بيۋدجەتى 48 ملن تەڭگەنى قۇرادى.

پرەسس-تۋر باعدارلاماسىنداعى سوڭعى نىسان «مالەنكايا سترانا» الەۋمەتتىك قالاشىعى بولدى. وندا مۇمكىندىگى شەكتەۋلى جانداردى وڭالتۋ ءۇشىن ەڭبەك تەراپياسى، يپپوتەراپيا ادىستەرى پايدالانىلادى، سونىمەن بىرگە شارۋاشىلىقتى جۇرگىزۋ ءۇشىن «جاسىل تەحنولوگيا» قولدانىلادى.

بيىل «سامۇرىق-قازىنا» قورى  شاعىن گيبريدتى جەل-كۇن ەلەكتر ستانتسياسىن جانە شارۋاشىلىق عيماراتتار مەن اكىمشىلىك ءۇي-جايلارعا ارنالعان كونۆەكتورلىق جىلىتقىشتاردى ساتىپ الۋ ءۇشىن «اتىراۋ». مالەنكايا سترانا» قب باستاماسىنا قولداۋ كورسەتتى. بولاشاقتا وسى قۇرىلعىلاردىڭ ارقاسىندا الەۋمەتتىك قالاشىقتا ەلەكترمەن جابدىقتاۋ تولىعىمەن اۆتونومدى بولادى. جوبانىڭ قۇنى 37,5 ملن تەڭگەنى قۇرادى.

ءباسپاسوز تۋرىنا قاتىسۋشىلار اتىراۋداعى «سامۇرىق-قازىنا» قورىنىڭ الەۋمەتتىك جوبالارىنا جوعارى باعا بەرىپ، ءوز اسەرلەرىمەن ءبولىستى:

«ءار ادامنىڭ مىندەتى – بالالارىنا جاقسى تاربيە بەرىپ، اياققا تۇرىپ كەتۋىنە  كومەكتەسىپ، لايىقتى ادامدى تاربيەلەپ شىعۋ. بۇگىن وسى ورايدا، مەملەكەت پەن «سامۇرىق-قازىنا» قورى تاراپىنان اتقارىلىپ جاتقان جۇمىستاردى كورىپ، قۋانىپ وتىرمىز. مۇمكىندىگى شەكتەۋلى بالالارعا ارنالعان يگى ىستەرىڭىز ءۇشىن ەرەكشە العىس بىلدىرگىم كەلەدى»، - دەپ ويىمەن ءبولىستى اتىراۋ قالاسى ارداگەرلەر كەڭەسىنىڭ توراعاسى كەڭەس قوسىباەۆ.

«ۇكىمەتتىك ەمەس ۇيىم وكىلدەرى «سامۇرىق-قازىنا» قورىنىڭ وڭىرىمىزدە جۇزەگە اسىرىپ جاتقان الەۋمەتتىك جوبالارىن مۇقيات قاداعالاۋدامىز. بۇگىنگى قوردىڭ جۇمىسى اشىق ءارى تۇسىنىكتى بولعانىنا قۋانىشتىمىز. بۇگىنگى ءباسپاسوز تۋرى قوردىڭ بيىلعى جۇمىس ناتيجەلەرىن كورسەتتى، ءبىز شارادان ەرەكشە بالالارعا، الەۋمەتتىك وسال ساناتتاعى ايەلدەرگە، مۇمكىندىگى شەكتەۋلى جاندارعا ارنالعان وزەكتى جوبالاردى كورىپ وتىرمىز. بۇل قوردىڭ يميدجىنە وڭ اسەر ەتەدى جانە حالىقتىڭ سەنىمىن ارتتىرادى»، - دەپ اتاپ ءوتتى «اقپارات» قب توراعاسى، اتىراۋ وبلىسى قوعامدىق كوميسسياسىنىڭ مۇشەسى گۇلجان ەلەشەۆا.

اتىراۋ قالاسىندا جۇزەگە اسىرىلعان الەۋمەتتىك نىساندار بويىنشا ءباسپاسوز تۋرىنا «سامۇرىق-قازىنا» اق پورتفەلدىك كومپانيالارىنىڭ وبلىستىق فيليالدارىنىڭ باسشىلارى دا قاتىستى. قوردىڭ قايىرىمدىلىق قىزمەتىن جۇزەگە اسىرۋ كەزىندە قور كومپانيالار توبىنىڭ كاسىپورىندارى ورنالاسقان وڭىرلەرگە ەرەكشە نازار اۋدارىلادى.

«جۇيەلىك قايىرىمدىلىق كوپتەگەن ادامدارعا كومەكتەسۋگە مۇمكىندىك بەرەدى. ءبىزدىڭ مىندەتىمىز-جەرگىلىكتى جەرلەردە «سامۇرىق-قازىنا» اق بىرىڭعاي قايىرىمدىلىق وپەراتورى ارقىلى الەۋمەتتىك ماڭىزدى جوبالاردىڭ باعىتىن انىقتاۋ جانە جەرگىلىكتى ۇەۇ - عا كومەكتەسۋ»، - دەپ ءبولىستى «KEGOC» اق باتىس فيليالىنىڭ مەترولوگيا قىزمەتىنىڭ باسشىسى ابزال باقيتوۆ.

باق وكىلدەرىنىڭ نازارىنا: 24 جانە 25 قاراشادا الەۋمەتتىك نىساندار بويىنشا ءباسپاسوز تۋرى ماڭعىستاۋ وبلىسىندا جالعاسادى، ونداعى جۇرتشىلىقتىڭ نازارىنا جاڭاوزەن جانە اقتاۋ قالالارىنداعى «سامۇرىق-قازىنا» كومپانيالار توبى اتىنان قارجىلاندىرىلعان جوبالار ۇسىنىلادى.

 

Abai.kz

0 پىكىر