جۇما, 29 ناۋرىز 2024
انە، كوردىڭ بە؟ 3071 25 پىكىر 25 قاراشا, 2022 ساعات 12:49

جاقيانوۆ پەن نازارباەۆا كۇش بىرىكتىرە مە؟

«قاسىرەتتى قاڭتار» وقيعاسى ساياساتتان ءوز ەركىمەن كەتكەنى بار، بيلىك كۇشتەپ كەتىرگەندەرى بار، كوپتەگەن ەكس-ساياسي بەلسەندىلەردىڭ قايتا باس كوتەرۋىنە جول اشتى. ءار قايسىسى حال-قادىرىنشە ءجيى سۇحبات بەرىپ، ەل الدىنا شىعىپ، ۇيىم قۇرىپ، ساياساتتىڭ كورىگىن قىزدىرىپ جاتىر.

ولاردىڭ قاتارىندا بيزنەس پەن بيلىكتەگى ارىپتەستىگىن «قاراجىرا كومىر كەنىن» بىرگە يگەرۋدەن باستاعان قاجىگەلدين مەن جاقيانوۆ تا بار. قاجىگەلدين و باستان پرەزيدەنت توقاەۆقا قولداۋشى بولىپ كەلەدى. «توقاەۆقا شتاتتان تىس كەڭەسشى بولىپتى»، «ۇزاق جىلدان بەرى ەۋروپادا تۇرىپ كەلە جاتقان ەكس-مينيستر جەمقورلاردىڭ شەتەلگە جاسىرعان بايلىقتارىن ەلگە قايتارۋعا كومەك قولىن سوزىپ ءجۇرىپتى» دەگەن اقپاراتتار شىققان.

ال جاقيانوۆتىڭ ۇستانىمى باسقاشالاۋ كورىنەدى. جاقىنداعى ءبىر سۇقباتىندا: «نازارباەۆ كەزىندەگى شەنەۋنىكتىڭ ءبارىن ءبىر شىبىقپەن ايداۋعا بولمايدى. داريعا نازارباەۆا ساياساتقا ارالاسىپ، «سۋپەر پرەزيدەنتتىك جۇيەدەن باس تارتىپ، پارلامەنتتىك جۇيە قۇرايىق» دەپ باستاما كوتەرسە، قولداۋىمىز كەرەك»، - دەپتى.

جاقيانوۆتىڭ توقاەۆقا كوزقاراسىنىڭ توركىنىن ءتۇسىنۋ ءۇشىن 2000 جىلداردىڭ باسىنداعى ساياسي اتموسفەرانى ەسكە الۋعا تۋرا كەلەدى. جاقيانوۆ «قازاقستاننىڭ دەموكراتيالىق تاڭداۋى ۇيىمىن» قۇرىپ، سول كەزدە ۇكىمەتتى باسقارىپ وتىرعان توقاەۆ جاقيانوۆ جاقتاستارىنىڭ ارەكەتىن «كيندەر سيۋپريزگە» بالاعانى بەلگىلى. ارتىنان جاقيانوۆ ءىستى بولىپ، اباقتىدان ءبىر-اق شىققان. داريعانىڭ ەكس-كۇيەۋى راحات اليەۆ بيزنەس پەن ساياسي ەليتاعا تىزەسىن باتىرىپ، مارقۇم التىنبەك سارسەنباەۆ ۇلكەن قىزبەن سوتتاسقان. سونداي ساياسي تەكەتىرەستەردىڭ بەل ورتاسىندا جۇرگەن جاقيانوۆتىڭ تارازىنى تەڭ ۇستايمىن دەسە دە، بىرەۋىنە باسىمدىق بەرەمىن دەسە دە، ەركى وزىندە.

داريعا نازارباەۆانىڭ كەزىندە نە ماقساتپەن «اسار پارتياسىن» قۇرعانى دا، قايتادان «نۇر وتانعا» قوسىلعانى دا جۇرتتان قۇپيا كۇيدە قالدى.

«قاڭتار وقيعاسىنان» كەيىن كوپ كوزىنە مۇلدە كورىنبەي، ءوز ەركىمەن مانداتىن تاپسىرعانى عانا ايتىلدى. ازىرگە دەيىن ءىز-دەرەگى جوق. جۇرت الدىندا ايتقان باستامالارى، «قازاقستاندىقتارعا ءتورتىنشى ءتىل رەتىندە قىتاي ءتىلىن ۇيرەنۋگە كەڭەس بەرۋى» دە، كوپ بالالى انالارعا «مەن ساعان بالا تاپ دەگەم جوق، قالاي تۋساڭ، سولاي اسىرا» دەگەن ماعىنادا ايتقان سىني سوزدەرى كوپتىڭ كوڭىلىنەن شىققان جوق.

دەموكراتياشىلدار سەركەسى دەگەن ماقتاۋلى اتاعى بار جاقيانوۆتىڭ ەكس-پرەزيدەنتتىڭ قىزىنىڭ ساياسات پەن بيزنەستە جەتىستىككە قالاي جەتكەنىن بىزدەن گورى جاقسى بىلسە دە، ودان دەموكراتيالىق ساياسي باستاما، تىڭ يدەيا كۇتكەنى بىزگە تۇسىنىكسىز.

الداعى كوكتەمدە ەلدە پارلامەنت سايلاۋى وتەتىنى بەلگىلى. كەزىندە جاقيانوۆتار دەموكراتيانىڭ كورىگىن قىزدىرىپ جۇرگەندە مارقۇم التىنبەك سارسەنباەۆتىڭ جانىندا جۇرگەن ايدوس سارىم جاقىنداعى ءبىر سۇقباتىندا: «قازاقستاندا پارتيا قۇرۋ ءۇشىن كەم دەگەندە 5 ميلليون دوللارىڭ بولۋ كەرەك»، - دەپ اعىنان جارىلعان. ونداي قارجى ەكس-پرەزيدەنت كەزىندە بايىعان بيزنەسمەندەر مەن شەنەۋنىكتەردە بولماسا، ينتەرنەت داۋىرىندە ساياسي بەلسەندىلىگى ويانعان جاڭا بۋىندا جوق ەكەنى اقيقات.

قازىرگى كۇندە «بايتاق» باستاعان ءۇش پارتيانىڭ الدىن الا تىركەۋدەن وتكەنى ءمالىم بولدى. «نامىس پارياسىنىڭ» جەتەكشىسى سانجار بوقاەۆتىڭ كەزىندە «اسارلاتىپ» جۇرگەن جىگىت ەكەنى بەلگىلى. جاقياانوۆ تا سونى مەڭزەگەن سياقتى.

قورىتا ايتقاندا، جاقىندا وتكەن پرەزيدەنت سايلاۋىنا ەنجارلىق تانىتقان ەكس-دەموكراتپەن ەكس-پرەزيدەنتتىڭ قىزىنىڭ الداعى پارلامەنت سايلاۋىنا بايلانىستى ۇستانىمدارى توعىسىپ، ورتاق ءتىل تابىسىپ قالاتىن ءتۇرى بار.

Abai.kz

25 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1572
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2267
عيبىرات

قايسار رۋحتى عازيز جان

مۇحتار قۇل-مۇحاممەد 3569