قازاقستاندىقتار وڭتۇستىك كورەياعا جۇمىسقا اتتانار الدىندا مىندەتتى دايىندىقتان وتەدى، دەپ حابارلايدى ەڭبەك مينيسترلىگى. ۇمىتكەرلەردى ىرىكتەۋ الماتىدا EPS ورتالىعى اشىلعاننان كەيىن باستالادى.

«بۇل جەردە كورەي ءتىلىن ءبىلۋ بويىنشا EPS-TOPIK تەستىلەۋى، كاسىبي داعدىلاردى باعالاۋ، سونداي-اق جۇمىسكەرلەردى كورەيا رەسپۋبليكاسىنا كەتپەس بۇرىن مىندەتتى دايارلاۋ ۇيىمداستىرىلادى. ىرىكتەۋ كەزىندە ءبىلىمى، جۇمىس تاجىريبەسى جانە بار كاسىبي سەرتيفيكاتتارى ەسكەرىلەدى»، — دەپ حابارلادى ۆەدومستۆودان.

ىرىكتەۋ باللدىق جۇيە بويىنشا جۇرگىزىلەدى. كانديداتتار قاتارىنا 18 بەن 39 جاس ارالىعىنداعى ازاماتتار جىبەرىلەدى. بۇل رەتتە ۇمىتكەردىڭ سوتتالعاندىعى، وڭتۇستىك كورەيادان دەپورتاتسيالانۋ نەمەسە ەلگە كىرۋگە تىيىم سالۋ فاكتىلەرى، سونداي-اق قازاقستاننان شىعۋعا شەكتەۋلەرى بولماۋى ءتيىس.

قازاقستاندىقتار EPS باعدارلاماسى شەڭبەرىندە وڭتۇستىك كورەيادا ءۇش جىلعا دەيىن جۇمىس ىستەي الادى. جۇمىسپەن قامتۋ مەرزىمى ودان ءارى ءبىر جىل ون ايعا دەيىن ۇزارتىلۋى مۇمكىن.

Abai.kz