رەسەي پرەزيدەنتى ۆلاديمير ءپۋتيننىڭ ورتالىق ازيا رەسپۋبليكالارىنا ۇسىنعان «گاز ۇشتىك وداعى» ۇيىمىنا ەشكىم قىزىعۋشىلىق تانىتا قويمادى. قازاقستان سانكتسيالاردى ەسكەرىپ، كرەملدىڭ جاڭا جوباسىنان باس تارتقان، ەندى وزبەكستان دا باس تارتىپ وتىر.

«وزبەكستان كورشى ەلدەردەن گاز جانە ەلەكتر ەنەرگياسىن ساتىپ الۋ تۋرالى كەلىسسوزدەر جۇرگىزۋدە، بىراق «قانداي دا ءبىر وداق نە ۇيىم ارقىلى ەمەس»، - دەدى وزبەكستان ەنەرگەتيكا ءمينيسترى جورابەك مىرزاماحمۋدوۆ.

مىرزاماحمۋدوۆتىڭ سوزىنشە، وزبەكستان گاز تاپشىلىعىن كورىپ وتىرسا دا، «ۇلتتىق مۇددەسىنە، ەكونوميكاسى مەن تاۋەلسىزدىگىنە» قاۋىپ توندىرگىسى كەلمەيدى. وزبەكستان گازدىڭ جەتىسپەۋشىلىگىنەن بىرقاتار وڭىرلەردە ەلەكتر قۋاتىن قولدان ءوشىرىپ، تاشكەنت پەن فەرعانا القابىندا گاز قۇيۋ ستانتسيالارىنىڭ جۇمىسىن توقتاتقان.

«ءبىز گاز الۋ ءۇشىن وزگە ەلدىڭ ساياسي شارتتارىن ەشقاشان قابىلدامايمىز»، - دەپ اتاپ ءوتتى وزبەك ءمينيسترى. ول وزبەكستاننىڭ رەسەي جانە باسقا ەلدەردەن گازدى قولايلى باعاعا جانە كەلىسىمشارت نەگىزىندە ساتىپ الاتىنىن ايتادى.

«رەسەيدەن گاز جەتكىزۋ تۋرالى كەلىسىم جاسالعان كۇندە دە، ول وداق قۇرۋ دەگەندى بىلدىرمەيدى. وزبەكستاننىڭ رەسەيمەن ورتاق شەكاراسى جوق. سوندىقتان گازدى كورشى قازاقستان ارقىلى جەتكىزۋ تۋرالى كەلىسسوزدەر جۇرگىزىلەتىن بولادى. وسىنداي تەحنيكالىق كەلىسىمشارت بولادى»، - دەدى مىرزاماحمۋدوۆ.

«ۇشتىك گاز وداعىن» قۇرۋ يدەياسىن پۋتين قاراشا ايىنىڭ سوڭىندا قازاقستان پرەزيدەنتى قاسىم-جومارت توقاەۆتىڭ ماسكەۋگە رەسمي ساپارى كەزىندە ايتقان. ونىڭ ويىنشا، رەسەي گازى ورتالىق ازيا ارقىلى قىتاي نارىعىنا شىقپاق.

«رەسەي، قازاقستان، وزبەكستاندا كەڭەس زامانىنان بەرى ءبىرتۇتاس گاز تاسىمالداۋ جۇيەسى قالىپتاسقان. ءوزارا ىنتىماقتاستىقتى كەڭەيتۋ ءۇشىن بىزدە ۇلكەن مۇمكىندىكتەر بار»، - دەگەن ەدى رەسەيلىك ۆيتسە-پرەمەر الەكساندر نوۆاك.

پرەزيدەنت توقاەۆ ەلگە ورالعاننان كەيىن ەكى كۇن وتكەندە قازاقستان بۇل يدەيانى قابىلدامايتىنىن مالىمدەدى.

«ونى تالقىلاۋعا ءالى ەرتە، ويتكەنى بۇل ءالى يدەيا عانا. بىراق قازاقستان ءوز اۋماعىن سانكتسيالاردى اينالىپ ءوتۋ ءۇشىن پايدالانۋعا جول بەرمەيدى. سونىمەن قاتار، ءبىز ءوزىمىز حالىقارالىق ماسەلەلەردى شەشۋ ءادىسى رەتىندە سانكتسيالاردى قولدامايمىز»، - ءسىم باسشىسىنىڭ ورىنباسارى دەدى رومان ۆاسيلەنكو.

ايجان تەمىرحان

Abai.kz