كەشەلى-بەرى الەۋمەتتىك جەلىلەردەن وقىپ وتىرمىن... 

تاۋەلسىزدىك كۇنىن كوڭىلسىز قارسى الىپ، بۇل كۇندى قايعىلى كۇن ەسەبىندە ءبىلىپ، قارا جامىلىپ جاتقاندار بار ەكەن. ءيا، جەلتوقسان ايىندا بولعان توتەنشە وقيعالاردى ەسكە الىپ، جازىقسىز توگىلگەن قاننىڭ سۇراۋىنا سالساق، راس، كەشە، بۇگىن، قازاقتىڭ قابىرعاسى قايىساتىن-اق كۇن. الايدا جەلتوقساندا بولعان كوتەرىلىستەردى ەسكە الايىقشى. سونىڭ ءبارى نە ءۇشىن بولدى؟ قازاقتىڭ ازاتتىعى ءۇشىن بولدى. 86-جىلى الاڭعا رۋحى اسقاق ازاماتتار شىقتى. ولار — قاس باتىرلار! الدە الاڭعا الاڭعاسىرلىعىمەن الدانىپ بارا سالعان اڭقاۋ بالالار ما ەدى ولار؟ قايتالاپ ايتامىن، ولار — باتىرلار، العادايلار!

جاڭاوزەندەگى دۇربەلەڭ شە؟ جاڭاوزەندە الاڭعا الشاڭ باسىپ بارعان باۋىرلارىمىز الدەكىمدەردىڭ جەتەگىنە ەرىپ، جەلىككەن جەلوكپەلەر مە ەدى؟ جوق. ولار دا — باتىرلار. ولار "ەلگە ەسە، تەڭدىك اپەردىك" دەپ قويىپ، الەۋمەتتىك تەڭسىزدىك جاساعان ارام نيەتتى الپاۋىتتارعا، تامىرىنان ءشىري باستاعان جۇيەگە قارسى شىقتى. بۇل قارسى شىعۋدىڭ ماقساتى "ەل بولايىق، ەلدىگىمىزدى ساقتايىق، قارعا-قۇزعىنعا جەم بولمايىقتىڭ" قامى ەدى عوي؟ ەندەشە، الدىڭعى اعا جەلتوقسانشىلاردىڭ كۇرەسىن تاۋەلسىزدىك ءۇشىن كۇرەس دەيىك تە، كەيىنگى جەلتوقسان، قاڭتار قايراتكەرلەرىنىڭ كۇرەسىن سول تاۋەلسىزدىكتى ساقتاپ قالۋعا ۇمتىلعان قاھارمانداردىڭ كۇرەسى دەپ بىلەيىك. سولاي ەكەن، دەمەك، جىلاپ-سىقتاپ، كۇڭىرەنە بەرۋدىڭ قاجەتى جوق. جىلاي بەرگەن ەلدىڭ رۋحى جاسي بەرەدى. رۋحى جاسىق ەلدىڭ ەلدىك قۇرۋى ەكىتالاي.

تاريحتان بايقادىم، اراعا جىلدار سالسا دا، باتىر بابالارىمىز جاۋىنان ەسەسى قايتىپ، ساعى سىنعان ايعا تۋرالاپ بارىپ جورىقتارعا اتتانىپ وتىرعان ەكەن. سول جورىقتاردىڭ بارىندە قازاقتىڭ مەيماناسى تاسىپ، مەرەيى ۇستەم بولىپ، جەرىن ازات ەتكەن.

جەلتوقسان دا سولاي. كۇرەسكە شىقتىق. جەڭىلدىك. قان-جوسا بولىپ قىرىلدىق، قانعا بوكتىك. ايتسە دە ءدۇر سىلكىنىپ ويانىپ، اياعىمىزعا قايتا تۇردىق. جەڭدىك!

بۇگىنگى ءبىز — ءبارىمىز تاۋەلسىزدىگىمىزدىڭ ءار كۇنى ءۇشىن ۇلكەن جاۋاپكەرشىلىك ارقالاپ جۇرگەن ۇرپاقپىز. كۇرەسپەن، تالاپپەن، جاۋاپكەرشىلىكپەن ەر جەتە بەرەتىن تاۋەلسىزدىگىمىزدىڭ بۋىنى بەكي تۇسەتىن كۇندەر الدا. سول كۇندەرگە امان-ەسەن جەتەيىك، اعايىن!

تاۋەلسىزدىك كۇنىن ەگەمەندىك العان كۇنگە اۋىستىرايىق دەيتىن ۇسىنىستار ايتىلىپ ءجۇر. بۇل جالپى مۇمكىن بە؟ حالىقارالىق تاجىريبەدە بار ما تاۋەلسىزدىك جاريالانعان كۇندى وزگە كۇنمەن، ايمەن، جىلمەن الماستىرعان ەلدەر؟ ونداي بولسا، ايتا وتىرساڭىزدار ارتىق ەتپەس ەدى.

داۋرەن قۋات

Abai.kz