كۇنى كەشە استانادا «امانات» پارتياسىنىڭ سيەزى ءوتءتى...

ۇزاق جىلداردان بەرى پارلامەنتتە دومينانت كۇشكە يە بولىپ كەلگەن «اماناتتىڭ» سيەزىندەگى باستى ينسايد – توراعا ەرلان قوشانوۆتىڭ پارتيانى جاڭا قۇرىلعان «ادىلەت» پارتياسىنا قوسۋ تۋرالى شەشىمى بولدى.

ەندى ەگجەي-تەگجەيلى جازايىق:

«امانات» پەن «ادىلەت» بىرىگەدى...

پارتيانىڭ XXVI سەزىندە: «بىرلەسىپ، پرو-پرەزيدەنتتىك كۇشكە اينالۋىمىز كەرەك. سول ارقىلى پرەزيدەنتتىڭ باستامالارىن جۇزەگە اسىرۋدى جالعاستىرۋىمىز كەرەك»، - دەگەن «امانات» پارتياسىنىڭ باسشىلىعى سيەز سوڭىندا «اماناتتىڭ» «ادىلەت» پارتياسىمەن بىرىگەتىنىن جاريالادى.

بۇل شەشىمدى سيەز دەلەگاتتارى ءبىراۋىزدان قولداعان. پارتيانىڭ پارلامەنتتىك مۇشەلەرىنىڭ سوزىنشە، بۇل ماسەلە وسىعان دەيىن ءوڭىر-وڭىرلەر جەكە-جەكە تالقىلانىپ، وڭىرلىك فيليالداردىڭ قۇپتاۋىنان وتكەن.

ەرلان قوشانوۆتىڭ ءوزى بولسا: «امانات» پەن «ادىلەتتىڭ» قوسىلۋى بۇل – ەشقانداي دا تاپسىرما ەمەس، بۇل – پارتيانىڭ ءوزىنىڭ ىشكى پروتسەسى، ىشكى شەشىمى. مەملەكەت باسشىسى بۇگىندە ەشبىر پارتياعا مۇشە ەمەس»، - دەيدى.

ال پارتيانىڭ پارلامەنتتەگى دەپۋتاتى ايدوس سارىم: «اماناتقا» قاتىستى ايماقتاردا ەل پىكىرى ەكىۇشتى. ونى پارتيا توراعاسى دا ءوز سوزىندە ايتىپ قالدى. ەگەر جاڭا ساياسي كەزەڭدى باستاعانىمىز راس بولاتىن بولسا، بۇنداي دا قادامعا بارۋ كەرەك شىعار»، - دەپ قايىردى.

پارتيانىڭ تاعى ءبىر دەپۋتاتى ەرلان سايروۆ: «شىنىن ايتۋ كەرەك، «امانات» پارتياسىنىڭ «ادىلەت» پارتياسىنا قوسىلۋى – ول نۇرسۇلتان نازارباەۆتىڭ ساياسي جۇيەسىمەن تولىق قوشتاسۋ. 1-ءشى شىلدەدەن باستاپ قازاقستان جاڭا ساياسي داۋىرگە ەنەدى. «امانات» پارتياسى ءۇش جىلدىڭ ىشىندە جاقسى جۇمىس ىستەدى. حالىقتىڭ الدىنداعى ءوزىنىڭ مىندەتتەرىن ورىندادى. بىراق، دەگەنمەن دە «اماناتتىڭ» ارتىندا نازارباەۆتىڭ قۇلاعى شىعىپ تۇرادى. سوندىقتان «امانات» پارتياسى «ادىلەت» پارتياسىنا قوسىلۋ جونىندە شەشىم قابىلدادى»، - دەدى.

بۇل پارتيا قاشان قۇرىلدى؟

1999 جىلدىڭ اقپانىندا ەكس-پرەزيدەنت نۇرسۇلتان نازارباەۆتىڭ كوماندالاستارى بيلىككە جاقىن كۇشتەردى ءبىر ورتالىققا بىرىكتىرۋ جانە ساياسي دومينانتتىلىقتى كۇشەيتۋ ماقساتىندا «وتان» دەگەن اتاۋمەن قۇردى.

سول كەزدەن باستاپ بۇل پارتيا – بيلىك پارتياسى سانالىپ كەلەدى جانە ساياسي اتاۋىن بىرنەشە مارتە وزگەرتكەن.

2006 جىلى «وتان» پارتياسى قۇرامىنا ەلدەگى بىرقاتار ساياسي ۇيىمداردى (سولاردىڭ ەڭ ءىرىسى – ەكس-پرەزيدەنت نازارباەۆتىڭ قىزى داريعا نازارباەۆانىڭ «اسار» پارتياسى) قوسىپ، ىرگەسىن كەڭەيتتى. جانە پارتيا اتاۋى «وتاننان» - «نۇر وتان» بولىپ وزگەرتىلدى. سودان بەرى بۇل پارتيا پارلامەنتتەگى ايقىن باسىمدىققا يە بولىپ كەلدى.

ال 2022 جىلعى قاندى ءھام قاسىرەتتى «قاڭتار تراگەدياسىنان» كەيىن پارتيا ىشىندە بىرقاتار اۋىس-تۇيىستەر جاسالدى. اۋقىمدى رەفورمالاردان سوڭ پارتيا اتاۋىن «امانات» دەپ وزگەرتكەن.

ەندى مىنە، بيىلعى جىلدىڭ 12 ماۋسىمىنداعى پارتيا سيەزىندە «امانات» پارتياسى ەلدە جاڭادان قۇرىلعان تاعى ءبىر تسەنتريستىك پارتيا – «ادىلەتتىڭ» قۇرامىنا قوسىلۋ تۋرالى شەشىم قابىلدادى. ءسويتىپ، 27 جىل بويى ساياسي ۇستەمدىك قۇرىپ كەلگەن ەلدەگى ەڭ ءىرى پارتيانىڭ ءداۋىرى اياقتالدى.

نۇرگەلدى ابدىعانيۇلى

Abai.kz