رەسەيدىڭ ۋكرايناعا سوعىس اشقانىنا 300 كۇن. كيەۆتى ءۇش كۇندە باسىپ الامىز دەگەن ماسكەۋدىڭ 300 كۇنگە سوزىلعان ءوز تىلدەرىمەن ايتساق "ارنايى وپەراتسياسى", شىنايى كوزقاراسپەن تاپسىرلەسەك سوعىسى ءالى جالعاسۋدا. 

300 كۇن. ءسوزسىز بۇل كۇنى سوعىسقا قاتىستى تاراپتار ءوز ناتيجەلەرىن كورسەتۋگە تىرىستى. پۋتين كرەملدىڭ سالتاناتتى سارايىنا كىل پروپاگانديست، سەپاراتيست، اسكەريلەردى شاقىرىپ، مەدال تاقتى، وردەن بەردى. جىلى زال، بىلعارى كرەسلودا وتىرىپ باياندامالارىن تىڭدادى، ماقتاۋلارىن ەستىدى.

ال زەلەنسكي شە؟ ول دا سوعىستىڭ 300 كۇندىگىنە قورىتىندى جاساۋدى. كيەۆتە وتىرىپ ەمەس، ۇرىس دالاسىنا بارىپ، ساربازداردى قولدادى. قازىرگى تاڭدا جۇمىر جەردەگى ەڭ قاۋىپتى قالا سانالاتىن باحمۋتقا بارىپ، ساربازدارمەن جولىقتى، قولدارىن قىسىپ، العىس ءبىلدىردى. قيراعان عيماراتتىڭ ىشىندە ولارعا ەرلىك توسبەلگىلەرىن توستەرىنە تاقتى. "پۋتين مەن زەلەنسكيدىڭ ايىرماشىلىعى دا وسىندا" دەپ الەمدىك پرەسسا جارىسا جازىپ جاتتى.

پەسكوۆ كەشە "پۋتين ارنايى وپەراتسيا ايماعىنا بارىپ، قولباسشىلارمەن كەزدەستى" دەگەندى ايتىپ قالدى. الايدا ول كەزدەسۋ قاشان بولعانىن ايتپادى. فوتو مەن ۆيدەو دا جاريالانبادى. سول سەبەپتى دە كەزدەسۋدىڭ بولعانىنا كوپشىلىك تاراپىنان كۇمان تۋىنداۋدا. حاركوۆ وبلىسىن ازات ەتكەندە، ليمانعا تۋ تىگىلگەن ساتتە، "ازوۆ" ساربازدارىن تۇتقىننان بوساتقاندا، حەرسوندى جاۋ قولىنان جۇلىپ العاندا زەلەنسكي ساربازدارمەن بىرگە بولدى، ارنايى قولداۋعا باردى. ال پۋتين ءالى بىردە-ءبىر مارتە ونداي ارەكەتكە بارعان ەمەس.

باحمۋتتان كەيىن زەلەنسكيدىڭ ۆاشينگتونعا باراتىنى بەلگىلى بولدى. بۇگىن ۋكراينا پرەزيدەنتى اقش-تا كونگرەسس الدىندا اۋقىمدى بايانداما جاسايدى دەپ كۇتىلۋدە. ارتىنشا ول بايدەنمەن جۇزدەسىپ، قارۋ-جاراق الۋ، ەكونوميكانى قولداۋ جانە سوعىسقا قاتىستى وزگە دە تاقىرىپتاردى تالقى ەتپەك. زەلەنسكي اقش-تىڭ قارۋ-جاراق ءوندىرىسى سالاسىنداعى الپاۋىتتارمەن دە كەزدەسۋ وتكىزەدى. بۇل ۋكراينا باسشىسىنىڭ اقشقا سوعىس باستالعالى جاساعان العاشقى ساپارى.

بۇگىن اقش بيلىگىنىڭ ۋكرايناعا كەزەكتى اسكەري كومەك پاكەتىن بولەتىنى جاريالاندى. قۇنى 1.8 ملرد دوللار. بۇل جولى اقش Patriot قورعانىس جۇيەسىن دە بەرمەك. باسقارىلمالى بومبالار دا كومەك پاكەتىنە كىرەدى.

Abai.kz