«سارىارقا» گازەتى (1917-1919). سەمەي قالاسىندا «الاش» باسپاحاناسىندا باسىلدى. 1917 جىلدىڭ ماۋسىم ايىنان باستاپ شىعا باستادى.

گازەت بەتتەرىندە الاش اسكەرىنىڭ شايقاستارى، سوعىستاعى ەرلىكتەرى تۋرالى جانە الاش اسكەرىنە ارنالعان ولەڭ-جىرلار دا باسىلىپ، جاۋىنگەرلەردى جىگەرلەندىرىپ، ەرلىككە شاقىردى. گازەتتىڭ 1919 جىلعى №83 سانىندا «الاش اسكەرى» دەگە ولەڭ جاريالانعان. ولەڭ اۆتورى بەكمۇحامەد سەركەباەۆ. قازاقستان عانا ەمەس الەمگە تانىلعان مۋزىكا سالاسىنىڭ مايتالمانى – ەرمەك سەركەباەۆتىڭ اكەسى، بايعالي سەركەباەۆ پەن جاميليا سەركەباەۆالاردىڭ اتاسى ەدى.

 «الاش اسكەرى»

الاشدىڭ نامىسىن ساقتايمىز،
وتاندى جات جۇرتقا ساتپايمىز،
جاۋ شىقسىن، تاۋ ءجۇرسىن، وق جاۋسىن،
ءبىر شىققان جولدان ەش قايتپايمىز.

كورپەمىز جامىلىس قار بولسىن،
توسەگىم قارا جەر ساز بولسىن،
بوگەلمەي توقتالماي اسارمىز،
مەيلى جولىمىز جار بولسىن.

قۇم، ءداريا، ىسقىتدا، شولدەردەن،
قيا تاس، اسقار تاۋ بەلدەردەن،
وتەرمىز، كەتەرمىز، ويعا الساق،
كوك تەڭىز كوز جەتپەس كولدەردەن.

ايانباي سوعىسقا كىرەرمىز،
دۇسپانعا قاسقىرداي تيەرمىز،
شەگىنىپ قورعالاۋ بىزگە ار،
قانىمىز الاشقا اق توگەرمىز.

ۇرانداپ شاقىرسا قالمايمىز،
ۇزاققا، جاياۋعا تالمايمىز،
ات مىنسەك، اسىنساق سايماندى،
كيىكدەي، ورعىعان وينايمىز.

ءبىز قورمال الاشتىڭ بالاسى،
ارداقتى كوزىنىڭ قاراسى،
كۇڭىرەنسىن، جاڭعىرسىن داۋىسدان،
ۇيىقتاعان قازاقدىڭ دالاسى.

ءبىز قىردىڭ بوس جۇرگەن قۇلانى،
ارقادا مەكەنى تۇراعى،
ىلەتىن قيادان قاز، ۇيرەك
اق يىق تۇيعىننىڭ قىرانى.

بەكمۇحامەد سەركەباەۆ.

(«سارىارقا». №83. 1919).

دايىنداعان اباي مىرزاعالي

Abai.kz