ساشا بارون كوەن قازاقستاندىقتاردان كەشىرىم سۇراپ، بورات وبرازىنىڭ شىنايى قازاقستانعا ەش قاتىسى جوعىن مالىمدەدى.

بريتانيالىق كوميك ساشا بارون كوەن Happy Sad Confused پودكاستىندا بەرگەن سۇحباتىندا ءوزىنىڭ تانىمال كەيىپكەرى بورات ساعديەۆكە قاتىستى پىكىر ءبىلدىردى. اكتەر بورات وبرازىنىڭ ارقاسىندا رەنجىگەن بارشا قازاقستاندىقتاردان كەشىرىم سۇراپ، بۇل كەيىپكەردىڭ شىنايى قازاقستانمەن، ونىڭ مادەنيەتىمەن نەمەسە حالقىمەن ەشقانداي بايلانىسى جوقتىعىن باسا ايتتى.

كوەن مانسابىنىڭ باسىندا، بورات ءرولىن العاش سومداي باستاعان كەزدە قازاقستان ەلشىلىگىنەن رەسمي شاعىم تۇسكەنىن ەسكە الدى.

«شاعىم وتە ورىندى ەدى. مەن ونى مۇقيات وقىپ شىقتىم. وندا شامامەن "بۇعان قالاي ءداتىڭىز باردى؟" دەگەن ماعىناداعى سوزدەر جازىلعان بولاتىن»، — دەدى كوميك.

سونداي-اق اكتەر قازاقستاندىقتاردىڭ تىلدىك ەرەكشەلىگى مەن سويلەۋ مانەرىنەن مۇلدە بەيحابار ەكەنىن مويىندادى.

«قازاقستاندىقتاردان كەشىرىم سۇرايمىن. مەن سىزدەردىڭ اكتسەنتتەرىڭىزدى اينىتپاي كەلتىرە المايمىن، ونى ءتىپتى بىلمەيمىن دە. سىزدەر بوراتقا مۇلدە ۇقسامايسىزدار. مەن ويدان شىعارىلعان اكتسەنتپەن سويلەيمىن، سەبەبى ورتالىق ازيا حالىقتارىنىڭ سويلەۋ مانەرىن جاقسى بىلمەيمىن. وتىنەمىن، رەنجىمەڭىزدەر. مەن سىزدەرگە تەك زور قۇرمەتپەن قارايمىن»، — دەپ قوستى كوەن.

اكتەردىڭ ايتۋىنشا، كومەديالىق جوبالاردىڭ نەگىزگى نىساناسى قازاقستان ەمەس، كەيىپكەرمەن تىلدەسكەن امەريكالىقتاردىڭ ناداندىعى بولعان.

«بۇل تۋىندىلاردىڭ قازاقستانعا ەشقانداي قاتىسى بولعان جوق. باستى ماقسات — مەن سويلەسكەن ادامداردىڭ تانىم-تۇسىنىگىنىڭ تايازدىعىن كورسەتۋ ەدى. ولار بۇرىن-سوڭدى ەستىپ بىلمەگەن ەل تۋرالى كەز كەلگەن اقىلعا سىيمايتىن ساندىراققا وڭاي سەنىپ قالا بەردى»، — دەپ ءتۇسىندىردى اكتەر.

بورات تۋرالى العاشقى فيلم ەكرانعا 2006 جىلى شىقتى. وندا قازاقستان ويدان شىعارىلعان، نامىسقا تيەتىن داستۇرلەر مەن كەرى تارتپا ستەرەوتيپتەر ارقىلى بۇرمالانىپ كورسەتىلدى. سول سەبەپتى فيلم ەلدە كەڭ پروكاتقا جىبەرىلگەن جوق. 2020 جىلى جارىق كورگەن ەكىنشى ءبولىمى دە قوعامدا ۇلكەن نارازىلىق تولقىنىن تۋدىرعان بولاتىن.

2026 جىلدىڭ قازان ايىندا ساشا بارون كوەن ءوزىنىڭ «Ali G: Who Iz I?» اتتى جاڭا كومەدياسىنىڭ ترەيلەرىندە بورات وبرازىن قايتادان كورسەتتى. ترەيلەردەگى ساتيرالىق ساحنادا كەيىپكەر قازاقستان بۇل ءفيلمدى ەلدەگى «ەكى كينوتەاتردىڭ ەشقايسىسىندا» كورسەتپەيتىنىن ايتىپ قالجىڭدايدى.

Abai.kz