رەسەيگە قارسى سانكتسيالار قازاقستان ەكونوميكاسىنا كەرى اسەرىن تيگىزۋدە، دەپ مالىمدەدى سىرتقى ىستەر ءمينيسترى مۇحتار تىلەۋبەردى جاپوندىق NHK تەلەارناسىنا.

"رەسەي مەن قازاقستان اراسىندا تەرەڭ ەكونوميكالىق قاتىناس ورناعان، قازاقستان ەكونوميكاسىنا رەسەيگە قارسى سانكتسيالار كەرى اسەرىن تيگىزدى. قازاقستان رەسەيگە قارسى سانكتسيالارعا قاتىسپايدى ءارى كومپانيالاردىڭ ءارتۇرلى جولدارمەن سانكتسيانى اينالىپ ءوتۋ ايماعىنا دا اينالمايدى. قازاقستان مەن رەسەي اراسىنداعى قازىرگى قارىم – قاتىناستى جالعاستىرامىز", - دەپ جاۋاپ بەردى مينيستر تەلەارنانىڭ رەسەي مەن ۋكراينا اراسىنداعى سوعىستىڭ قازاقستانعا اسەرى تۋرالى سۇراعىنا.

ءسىم باسشىسى سوعىسىپ جاتقان ەكى ەلدىڭ دە قازاقستانمەن دوستىق قارىم-قاتىناستا ەكەنىن ايتتى. ول توقاەۆتىڭ ەكى تاراپتى بەيبىت جانە ديپلوماتيالىق كەلىسسوزگە شاقىرعانىن اتاپ ءوتتى.

"قازاقستاننىڭ كولىك جانە لوگيستيكا ءۇشىن ترانزيتتىك پۋنكت رەتىندە دامۋ الەۋەتىنە ەرەكشە نازار اۋدارىلادى. مەنىڭ ويىمشا، بۇل شەتەلدىك ينۆەستيتسيانى تارتىپ، ەۋروپا مەن ازيانى بىرىكتىرەتىن ورتالىققا اينالادى", – دەدى ءسىم باسشىسى.

تىلەۋبەردى رەسەيدەگى سانكتسيالارعا بايلانىستى ءوز قىزمەتىن توقتاتقان كوپتەگەن شەتەلدىك كومپانيالاردى قازاقستاننان كەڭسەلەرىن اشۋدى ۇسىندى.

Abai.kz