نازارباەۆ رەجيمىنىڭ قۇرباندارى دا اقتالۋى ءتيىس!
مەملەكەتتىك كەڭەسشى ەرلان قارين پرەزيدەنتكە ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيا ماتەريالدارىنىڭ نەگىزىندە دايىندالعان كوپتومدىقتى تانىستىرىپتى.
ءسوز جوق، ۇلت ءۇشىن اسا قاجەت دۇنيە.
اسىرەسە، قوعامىمىز بەن سانامىزدى دەسوۆەتتەندىرۋ، دەكوممۋنيزمدەندىرۋ مەن دەوتارلاندىرۋ اسا وزەكتى بوپ تۇرعان قازىرگى جاۋاپتى كەزەڭدە مۇنداي شارۋانىڭ قولعا الىنعانى ابدەن دۇرىس. بالكىم، ەسكى بولشەۆيزمدى ەسىركەپ، سوۆەتتەردى ساعىنىپ، لەنين-ستالين سەكىلدى جاساندى پۇتتارعا ءالى دە تابىنىپ جۇرگەندەردىڭ اۆگي اتقوراسىنا اينالعان ميى مەن وي-ساناسىن تازارتۋعا بۇل ارحيۆتەر اقيقاتى ءوز اسەرىن تيگىزەر مە ەدى. ورتامىزدا جۇرگەن ءبىراز «ۆاتنيكتەردەن» دە ارىلار ما ەدىك.
بىراق «ا» دەگەن سوڭ، «ءا» دەۋ كەرەك قوي.
بىلۋىمشە، وسى ماتەريالدار نەگىزىنەن كەشەگى سوۆەت داۋىرىنە قاتىستى. كەزىندە، سول كوميسسيا قۇرىلعاندا «قازاقستان تاۋەلسىزدىك العان ۋاقىتتان بۇگىنگى كۇنگە دەيىن كەزەڭدى دە قوسۋ كەرەك» دەپ تالاپ قويعانبىز. ويتكەنى نۇرسۇلتان نازارباەۆ تابانى كۇرەكتەي وتىز جىل باسقارعان تۇستا دا ساياسي قۋعىن-سۇرگىن بولدى ەمەس پە؟!
قازىرگى جاستار دەموكراتيالىق ۇستانىمدارى ءۇشىن قازا تاپقان زامانبەك نۇرقادىلوۆتى، التىنبەك سارسەنباەۆ پەن ونىڭ وققاعارلارىن، جۇمباق جاعدايدا ومىردەن وتكەن بيلىكتىڭ سىنشىلارى باتىرحان دارىمبەت پەن اسحات ءشارىپجانوۆ تۋرالى بىلە بەرمەيدى.
نازارباەۆ رەجيمىنە اشىقتان-اشىق قارسى شىعىپ، سوتتالىپ، تۇرمەدە وتىرىپ شىققاندار قانشاما؟!
ساياسي كوزقاراستارى ءۇشىن قۋدالانىپ، شەتەل اسىپ كەتكەندەر شە؟
سوتتالىپ، ساياسي بەلسەندىلىگىنە تۇساۋ سالىنعاندار شە؟
ءارتۇرلى ارانداتۋلار ۇيىمداستىرىلىپ، قوقان-لوققى جاسالىپ، ۇرىپ-سوعىلعانى قانشاما؟!
ءبىز كوبىنەسە ورتالىقتا جۇرگەن ازاماتتار تۋرالى ايتامىز، ال اۋىل-ايماقتا ءجۇرىپ، ءوزىنىڭ ساياسي كوزقاراسى ءۇشىن قۋعىن-سۇرگىنگە ۇشىراعان اعايىن قانشاما؟!
ءبارىن تىزە بەرسە، بىرنەشە توم بولارى ءسوزسىز.
سولاردىڭ ارقايسىسىنا قاتىستى رەسمي تۇردە قىلمىستىق ءىس قوزعالىپ، جاريا جانە جابىق سوتتار ءوتتى. ونىڭ ءبارى ەسكى قازاقستاننىڭ ارحيۆتەرىندە ساقتاۋلى.
«سۋدىڭ دا سۇراۋى بار» ەمەس پە؟
مەنىڭشە، جاڭا قازاقستان يدەياسى 30 جىل ىشىندە بولعان جاڭاشا ساياسي قۋعان-سۇرگىن قۇرباندارىن اقتاۋدان باستالۋى قاجەت!
سوندا جاڭا قازاقستاننىڭ ىرگەتاسى مورالدىق جاعىنان تازا ءارى مىقتى بولادى!
سولاي اقتالسا، ماسەلەن، الىستا جۇرگەن ەكس-پرەمەر اكەجان قاجىگەلدين مەن بەلگىلى مەديامەنەدجەر سەرىك مەدەتبەكوۆ سەكىلدى قازاققا كەرەك ازاماتتار ەلگە ورالىپ، جاڭا قازاقستاننىڭ ۋىعىن قاداپ، شاڭىراعىن كوتەرۋگە ات سالىسار ما ەدى.
جانە دە ول اسا ماڭىزدى شارۋانى ەرتەڭگە قالدىرماي، بۇگىننەن باستاۋ قاجەت. ويتكەنى سول تەپەرىشتى كورگەن ازاماتتار مەن سول ىستەردىڭ كۋالارى ءالى دە ارامىزدا ءجۇر.
ايتپەسە، ەرتەڭ كەش بولۋى مۇمكىن.
PS. ايتپاقشى، بىزدەرگە قارسى قىلمىستىق ىستەر قوزعاعان پروكۋرورلار مەن ۇكىم شىعارعان سۋديالار دا ارامىزدا ءجۇر. سولار دا كوزى تىرىسىندە ءوز جازاسىن السا، بولاشاق پوگوندىلار مەن مانتيالىلارعا ۇلكەن ساباق بولار ەدى...
ءامىرجان قوسان
Abai.kz
