سايلاۋالدى ناۋقاننىڭ سيپاتى بىرتىندەپ وزگەرىپ كەلەدى. وڭىرلەرگە ساپارلار، ەڭبەك ۇجىمدارىمەن كەزدەسۋلەر جانە اۋقىمدى فورۋمدارمەن قاتار، پارتيالار قارسىلاستارىنىڭ مالىمدەمەلەرىنە پىكىر ءبىلدىرىپ، اشىق ساياسي پىكىرتالاسقا جيىرەك شىعا باستادى. 7 تامىز كۇنى پارتيالار ەلدىڭ ءار وڭىرىندە بىرقاتار سايلاۋالدىءىس-شارا وتكىزدى.

«ادىلەت» پارتياسىنىڭ رەسپۋبليكالىق شتابى شىمكەنتتە جۇمىسىن جالعاستىرىپ، وندا باستاۋىش پارتيا ۇيىمدارىنىڭ رەسپۋبليكالىق فورۋمى ءوتتى. فورۋمعا ەلىمىزدىڭ تۇكپىر-تۇكپىرىنەن كەلگەن 3500-دەن استام باستاۋىش ۇيىم وكىلدەرى قاتىستى. پارتيا توراعاسى ايبەك دادەباي سايلاۋالدى ناۋقاننىڭ بارىسى تۋرالى بايانداپ، پارتيا مۇشەلەرىنىڭ سانى 800 مىڭنان اسقانىن ايتتى. ونىڭ مالىمەتىنشە، بۇگىندە 3545 باستاۋىش ۇيىم (شامامەن 650 مىڭ مۇشەسى بار), 20 وڭىرلىك جانە 226 اۋماقتىق شتاب جۇمىس ىستەيدى. ناۋقانعا 30 مىڭعا جۋىق سەنىمدى وكىل تارتىلعان. كانديداتتار تسيفرلاندىرۋ، الەۋمەتتىك ساياسات جانە وزگە دە باعىتتاردى قامتيتىن سايلاۋالدى باعدارلامانىڭ جەكەلەگەن بولىمدەرىن تانىستىردى.

سونداي-اق شىمكەنت قالاسىنىڭ مادەنيەت جانە ونەر سالاسى وكىلدەرىمەن جەكە كەزدەسۋ ءوتتى. وندا كىتاپ وقۋ مادەنيەتىن دامىتۋ، تەاترلار مەن كرەاتيۆتى يندۋستريانى قولداۋ ماسەلەسى تالقىلاندى. سونىمەن بىرگە ۇلتتىق مادەني قۇندىلىقتاردى قورعاۋ جانە كونستيتۋتسيالىق نەگىزدەردى ساقتاۋ ماسەلەسى قوزعالدى.

جالپىۇلتتىق سوتسيال-دەموكراتيالىق پارتيانىڭ توراعاسى اسحات راحىمجانوۆ جۋرناليستەرمەن كەزدەسۋدە قازاقستان حالىق پارتياسىن سايلاۋ ناۋقانى باستالار الدىندا پارتيا توراعاسىن اۋىستىرعانى ءۇشىن سىنعا الدى.

پارتيانىڭ الماتى وبلىستىق فيليالى قوناەۆ – جاڭا ارنا – زارەچنىي – ارنا – الاتاۋ باعىتى بويىنشا اۆتوكەرۋەن ۇيىمداستىردى. پارتيا بەلسەندىلەرى مەن كانديدات ر. ءجۇسىپوۆا پاۆلودار وبلىسىنىڭ اققۋلى اۋىلىنىڭ تۇرعىندارىمەن كەزدەستى. اقمولا وبلىستىق فيليالىنىڭ وكىلدەرى ساندىقتاۋ اۋدانىنداعى بالكاشين مادەنيەت ۇيىندە جەرگىلىكتى تۇرعىندارمەن جۇزدەستى. سونىمەن قاتار جەزقازعان قالاسىنىڭ تۇرعىندارىمەن دە كەزدەسۋ ءوتتى.

اقتوبە وبلىستىق فيليالى مۇلىك يەلەرى بىرلەستىكتەرىنىڭ (ميب) توراعالارىنىڭ قاتىسۋىمەن ولاردىڭ دامۋ پەرسپەكتيۆالارىنا ارنالعان اشىق ديالوگ ۇيىمداستىردى. سولتۇستىك قازاقستان وبلىسىنىڭ قىزىلجار اۋدانىندا، كوكشەتاۋ جانە رۋدنىي قالالارىندا پارتيا مۇشەلەرى تۇرعىندار اراسىندا ءتۇسىندىرۋ جۇمىسىن جۇرگىزىپ, ۇگىت-ناسيحات ماتەريالدارىن تاراتتى.

ارالدان باستالىپ, قىزىلوردا جانە تۇركىستان وبلىستارى ارقىلى وتكەن «بايتاق» پارتياسىنىڭ ەكولوگيالىق كەرۋەنى جامبىل وبلىسىنا جەتتى. پارتيا مالىمەتىنشە، بۇل ساپار وڭىرلەردەگى تابيعاتتى قورعاۋ جانە ەكولوگيالىق قاۋىپسىزدىك ماسەلەلەرىنەارنالدى.

استانادا كانديدات ساۋلە قامىتبەكوۆا Center Concrete تەمىربەتون بۇيىمدارى زاۋىتى مەن Integrate Clinic مەديتسينالىق ورتالىعىنىڭ ۇجىمىمەن كەزدەستى. كەزدەسۋدە قۇرىلىستاعى ەنەرگيا ۇنەمدەۋ تەحنولوگيالارى مەن ەكولوگيانىڭ ادام دەنساۋلىعىنا اسەرى تالقىلاندى.

پەتروپاۆلدا كانديدات الماز جاكيشەۆ «مارحابات» تۇزەتۋ بالاباقشاسىنا بارىپ، ينكليۋزيۆتى ءبىلىم بەرۋ مەن بالالاردىڭ ەكولوگيالىق قاۋىپسىزدىگى ماسەلەسىن كوتەردى.

قازاقستان حالىق پارتياسى بىرنەشە وڭىردە تۇرعىندارمەن جانە  ەڭبەك ۇجىمدارىمەن كەزدەسۋ وتكىزدى. اتاپ ايتقاندا، جامبىل وبلىسى بايزاق اۋدانىنداعى تۇيمەكەنت اۋىلىنىڭ تۇرعىندارىمەن، الماتى وبلىسى شەلەك اۋىلىنداعى ەڭبەكشىقازاق اۋداندىق اۋرۋحاناسىنىڭ ۇجىمىمەن، تەمىرتاۋداعى №7 كىتاپحانا قىزمەتكەرلەرىمەن، شامامەن 700 ادام ەڭبەك ەتەتىن «يمستالكون» اق ۇجىمىمەن، كومىر رازرەزى مەن ەلەكتر ستانتسياسىندا 4,5 مىڭعا جۋىق ادام جۇمىس ىستەيتىن «ەۋرازيالىق ەنەرگەتيكالىق كورپوراتسيا» اق قىزمەتكەرلەرىمەن، سونداي-اق تۇركىستان وبلىسى جەتىساي اۋدانىنىڭ تۇرعىندارىمەن جۇزدەستى.

ۇلىتاۋ وبلىسىندا پارتيا شتابىنىڭ وكىلدەرى جەزقازعان كوپبەيىندى اۋرۋحاناسىنىڭ ۇجىمىمەن جانە «قازترانسويل» كاسىپورنىنىڭ قىزمەتكەرلەرىمەن كەزدەستى. وسكەمەندە پارتيا كانديداتتارى مەن بەلسەندىلەرى قالا تۇرعىندارىمەن ترامۆاي ىشىندە بەيرەسمي كەزدەسۋ وتكىزدى.

تالدىقورعاندا وتكەن ۇكىمەتتىك ەمەس ۇيىمداردىڭ الەۋمەتتىك جوبالار كورمەسىندە قحپ كانديداتى يرينا سميرنوۆا جسدپ-نى سىنعا الىپ، قارسىلاس پارتيانىڭ باعدارلاماسىندا ازاماتتىق سەكتوردى قولداۋ ماسەلەسى جوق ەكەنىن ايتىپ، جسدپ-نى «ءبىر ادامنىڭ پارتياسى» دەپ اتادى.

«اۋىل» پارتياسى سولتۇستىك قازاقستان وبلىسىندا ەڭبەك ۇجىمدارى جانە اۋىل تۇرعىندارىمەن بىرقاتار كەزدەسۋ وتكىزدى. پارتيا وكىلدەرى قۇس فابريكاسىندا، قايتا وڭدەۋ كاسىپورنىندا، ياكور اۋىلىنداعى ۆەتەرينارلىق پۋنكتتە جانە «ەسىل سۋ» فيليالىندا بولدى. كەزدەسۋلەر بارىسىندا سالالىق ماسەلەلەرمەن قاتار، اۋىلداعى كادر تاپشىلىعى بىرنەشە رەت كوتەرىلدى.

شىعىس قازاقستان وبلىسىندا پارتيا توراعاسى قايرات ايتۋعانوۆ كانديداتتارمەن بىرگە ينكليۋزيۆتى قوعام وكىلدەرىمەن، مۇمكىندىگى شەكتەۋلى ازاماتتارمەن جانە ەرەكشە قاجەتتىلىگى بار بالالاردىڭ اتا-انالارىمەن كەزدەستى. وندا قولجەتىمدى ورتا، ينكليۋزيۆتى ءبىلىم بەرۋ جانە كاسىبي دايارلىق ماسەلەسى تالقىلاندى.

سەمەي قالاسىندا اباي وبلىستىق شتابىنىڭ جەتەكشىسى قايرات سماعۇلوۆ پەن كانديدات بالنۇر احمەتوۆا KondiZ كونديتەر فابريكاسىنىڭ ۇجىمىمەن كەزدەسۋوتكىزدى.

«اق جول» پارتياسى قۇرىلتاي دەپۋتاتتىعىنا كانديدات رەتىندە اقتوبە وبلىسىنان كاسىپكەر، پارتيانىڭ وبلىستىق فيليالىنىڭ توراعاسى ءارى جەرگىلىكتى ءماسليحات دەپۋتاتى ۇلان قوزىباقوۆتى تانىستىردى.

پارتيانىڭ رەسپۋبليكالىق سايلاۋالدى شتابى ءتورايىم دانيا ەسپاەۆانىڭ جەتەكشىلىگىمەن الماتى وبلىسى قاراساي اۋدانىنداعى شامالعان اۋىلىنىڭ تۇرعىندارىمەن كەزدەستى. كەزدەسۋ بارىسىندا سايلاۋالدى باعدارلامانىڭ نەگىزگى باعىتتارى تانىستىرىلىپ، اۋىل تۇرعىندارىنىڭ سۇراقتارىنا جاۋاپ بەرىلدى.

شتاب سونداي-اق وسى اۋدانداعى ماكارون ونىمدەرىن شىعاراتىن ANSAR FOODS جشس-نا بارىپ، ەڭبەك ۇجىمىمەن كەزدەسۋ وتكىزدى.

سونىمەن قاتار پارتيا Respublica وكىلدەرىنىڭ سىنىنا ۇشىرادى. پارتيا كانديداتى ەربولات مۇحامەدجان سايلاۋالدى ۋادەلەر ناقتى ناتيجەمەن دالەلدەنۋى ءتيىس ەكەنىن ايتىپ، بۇل پىكىرىن «اق جول» پارتياسىنا باعىتتادى.

Respublica پارتياسى شىمكەنت قالاسىندا ەڭبەك ۇجىمدارىمەن كەزدەسۋىن جالعاستىردى. ۇگىت جۇمىسىنا پارتيا تەڭ توراعاسى قۋانىش شونباي دا قاتىستى. دەلەگاتسيا Alutech كاسىپورنى مەن MDS Doors جشس-نا بارىپ، جۇمىسشىلارمەن ەڭبەككە سالىناتىن سالىق جۇكتەمەسى، وتاندىق وندىرۋشىلەردى قولداۋ جانەالەۋمەتتىك-ەكونوميكالىق ماسەلەنى تالقىلادى.

قالادا كاسىپكەرلەردىڭ, ونەركاسىپ وكىلدەرىنىڭ, جاستاردىڭ جانە پارتيا بەلسەندىلەرىنىڭ قاتىسۋىمەن سايلاۋالدى فورۋم ءوتتى. وندا پارتيانىڭ تەڭ توراعالارى مەن كانديداتتارى باعدارلامانىڭ نەگىزگى باعىتتارىن تانىستىردى.

سونىمەن قاتار ReTalks فورماتىنداعى اشىق پىكىرتالاس الاڭى ۇيىمداستىرىلىپ، وعان بيزنەس وكىلدەرى، جاستار جانە قوعام بەلسەندىلەرى قاتىستى.

دەلەگاتسيا ەلىمىزدەگى 80 جىلدان استام تاريحى بار، ەكسپورتقا 130-عا جۋىق ءونىم ءتۇرىن شىعاراتىن «شىمكەنتماي» اق-نا دا بارىپ، كاسىپورىن ۇجىمىمەن كەزدەستى. كەزدەسۋدە وتاندىق ءوندىرىستى قولداۋ جانە تسيفرلىق تەحنولوگيالاردى دامىتۋماسەلەسى ءسوز بولدى.

وسىلايشا, 7 تامىز كۇنى پارتيالار وڭىرلەردەگى سايلاۋشىلارمەن كەزدەسۋلەرىن جالعاستىرىپ، ءبىر-ءبىرىنىڭ مالىمدەمەلەرىنە اشىق پىكىر بىلدىرە باستادى. ەلدىڭ ءار وڭىرىندە وتكىزىلگەن سايلاۋالدى ءىس-شاراسىمەن قاتار، اقپاراتتىق كۇن تارتىبىندە پارتياارالىق پىكىرتالاس تا ايقىن كورىنىس تاپتى.

Abai.kz