قر پرەمەر-ءمينيسترى و. بەكتەنوۆ پەن قر پرەزيدەنتى اكىمشىلىگىنىڭ باسشىسى ر. سكليارعا!

قۇرمەتتى ولجاس ابايۇلى!

قۇرمەتتى رومان ۆاسيلەۆيچ!

مەن سىزدەردەردىڭ اتتارىڭىزعا ارنايى حات جازىپ، اتاجۇرتىنا كوشىپ كەلىپ، وسى جىلدىڭ اقپان ايىنان بەرى قاتاڭ اتقارىلا باستاعان «قانداس مارتەبەسىن بەرۋ نەمەسە ۇزارتۋ» مەملەكەتتىك كورسەتىلەتىن قىزمەتتەرى بويىنشا پيلوتتىق جوبانى ىسكە قوسۋ جانە ىسكە اسىرۋ تۋرالى بىرلەسكەن بۇيرىقتىڭ كەسىرىنەن قازاقستان رەسپۋبليكاسىنىڭ ازاماتتىعىن الا الماي وتىرعان 430 ەتنيكالىق قازاق  وتباسىنىڭ ءتىزىمىن جولداپ وتىرمىن.

ولاردىڭ قۇجاتتان الماي قالۋىنىڭ سەبەبى ەكەۋ-اق!

ول – اتالعان «بىرلەسكەن بۇيرىقتىڭ» شارتتارىنىڭ زاڭسىزدىعى ءارى شەكتەن تىس اۋىرلىعى!!!

وسىعان دەيىن وسى ماسەلە تۋرالى پرەزيدەنتكە، پەزيدەنت اكىمشىلىگىنە، ۇكىمەتكە بىرنەشە مارتە حات جازدىم.

پرەزيدەنتكە جازعان ««پيلوتتىق جوبا» نە دەيدى، كونۆەنتسيا مەن كونستيتۋتسيا نە دەيدى؟!» اتتى حاتىمنىڭ قاسىم-جومارت اعانىڭ قولىنا تيگەنى، ول كىسىنىڭ ءتيىستى تاپسىرما بەرگەنى تۋرالى اقوردادان حابار الدىم.

بىراق، ءالى ناتيجەسى بولىڭقىراماي تۇر.

مىنە، بۇگىن تاعى قالام الىپ، سىزدەردىڭ اتتارىڭىزعا تاعى ارنايى «اشىق حات» جازۋىما تۋرا كەلدى!..

قۇرمەتتى ولجاس ابايۇلى!
قۇرمەتتى رومان ۆاسيلەۆيچ!

مەملەكەتتىڭ قانداستار مەن قونىس اۋدارۋشىلاردى ۇكىمەت بەلگىلەگەن وڭىرلەرگە قونىستاندىرۋى – ستراتەگيالىق ماڭىزعا يە وتە ماڭىزدى ساياسات!

مەن بۇل ساياساتتى ءجۇز ەمەس، ەكى ءجۇز پايىز قولدايمىن!

بىراق، مەن ءۇش مينيسترلىك قابىلداعان پيلوتتىق جوبادان كوشىپ كەلۋشىلەردى ۇكىمەت بەلگىلەگەن وڭىرلەرگە قونستاندىرۋ سىندى ىزگى نيەتتى كورىپ تۇرعان جوقپىن.

كەرىسىنشە، بۇل بىرلەسكەن بۇيرىقتان قانداستارىمىزدى ماجبۇرلەۋ ارقىلى ۇلى كوشتى توقتاتۋ پيعىلى مەن مۇندالاپ تۇر!

ءتىپتى، باسقا وبلىستار مەن قالالاردى بىلاي قويىپ، ۇكىمەت بەلگىلەگەن وڭىرلەردىڭ وزىنە كوشىپ كەلگەن قانداستارىمىزدىڭ ءوزى جارتى جىلدان بەرى نە قۇجاتتانا الماي، نە وڭىرلىك كۆوتاعا قول جەتكىزە الماي، سورلاپ قالدى...

انە، «ادام قۇقىقتارى مەن بوستاندىقتارى اركiمگە تۋمىسىنان تيەسىلى، ولار اجىراتۋعا جانە ايىرۋعا بولمايتىن دەپ تانىلادى، قازاقستان رەسپۋبليكاسىنىڭ قولدانىستاعى قۇقىعىنىڭ مازمۇنى مەن قولدانىلۋى وسىعان قاراي ايقىندالادى» -, دەپ جاڭا كونستيتۋتسيانىڭ 15-بابىندا تايعا باسقان تاڭباداي اشىق جازۋلى تۇر!

ۇنەمى ايتىپ كەلە جاتىرمىن، بۇگىن تاعى قايتالايمىن، شەكارا سىرتىندا قالعان قانداستارىمىزدىڭ تاريحي وتانا كوشىپ كەلۋى، تۇرعىلىقتى جەرىن ەركىن تاڭداۋى، قازاقستان رەسپۋبليكاسىنىڭ ازاماتتىعىن الۋى – ولارعا تۋمىسىنان تيەسىلى قۇقىقتار مەن بوستاندىقتار!

سونداي-اق، كونستيتۋتسيانىڭ 24-بابىنا ساي، زاڭدا بەلگىلەنگەن جاعدايلاردى قوسپاعاندا، قازاقستان رەسپۋبليكاسىنىڭ اۋماعىندا زاڭدى تۇردە جۇرگەن ءار ادامنىڭ ەل اۋماعىندا ەركiن ءجۇرiپ-تۇرۋعا جانە تۇرعىلىقتى جەرىن ەركىن تاڭداۋعا قۇقىعى بار.

ولاردى بۇل  قۇداي بەرگەن، زاڭمەن بەكىتىلگەن قۇقىقتارى مەن بوستاندىقتارىنان اجىراتۋعا جانە ايىرۋعا ەشكىمنىڭ ەشقاشان حاقىسى جوق!!!

ال، كوشىپ كەلۋشىلەردى ۇكىمەت بەلگىلەگەن وڭىرلەرگە قونستاندىرۋ – مەملەكەتتىك ساياسات!

مەملەكەتتىك ساياسات – ادام قۇقىعىن شەكتەمەۋى ءتيىس!!

«حالىقتىڭ كوشى-قونى تۋرالى» قازاقستان رەسپۋبليكاسىنىڭ 2011 جىلعى 22 شىلدەدەگى №477-IV زاڭىنىڭ 20-بابىنىڭ 5) تارماعى ارقىلى 2023 جىلى 19 ساۋىردە قويىلعان وڭىرلىك شەكتەۋ مەن وسى پيلوتتىق جوبا – اتاجۇرتىنا ورالعان قانداستارىمىزدىڭ جوعارىدا ايتىلعان كونستيتۋتسيالىق قۇقىقتارى مەن بوستاندىقتارىن تاس-تالقان ەتتى.

ءسويتىپ، قازاقستان مەملەكەتتى زاڭمەن ەمەس، تۇسىنىكپەن باسقاراتىن ەلگە اينالعانداي اسەر قالدىردى.

ادام قۇقىعىن شەكتەيتىن مۇنداي جاعداي تاۋەلسىز قازاقستاننىڭ تاريحىندا بولماعان. كەشەگى ستالين زامانىندا بولعان!

بۇل – زاڭ ۇستەمدىك قۇرعان ادىلەتتى قازاقستان ءۇشىن ۇيات ارەكەت! بۇل – ءبىر!

ەكىنشى، قازىر «زاڭ مەن ءتارتىپ!» قاعيداتى سالتانات قۇرعان زامان!

وسى «بىرلەسكەن بۇيرىقتى» سىزدەرگە قابىلداۋعا ءماجبۇر ەتكەن ىقپالدى ادامدار ويلاۋى مۇمكىن، «قانداستار تۋرالى پرەزيدەنتكە جاعىمسىز اقپارات بەرىپ، وسىلاي پيوتتىق جوبا قابىلداتىپ، اتاجۇرتىنا ورالعان ەتنيكالىق قازاقتاردىڭ قۇجاتتانۋ پروتسەسسىن بارىنشا قيىنداتساق، ۇلى كوش توقتايدى...»،-دەپ!

قاتتى قاتەلەسەدى!

بۇل – بارىپ تۇرعان اقىماقتىق جانە شەكتەن شىققاندىق!

ۇلى كوش ماڭگى توقتامايدى!

سالىق زيمانوۆ سىندى پايعامبار تەكتى اتالارىمىز باستاپ، تۇڭعىش پرەزيدەنت نۇرسۇلتان نازارباەۆ قوستاپ، شەكارا سىرتىندا قالعان ەتنيكالىق قازاقتاردىڭ تاعدىرىن تاۋەلسىز قازاقستاننىڭ موينىنا ارتىپ، ولاردىڭ قۇقىقتىق جانە الەۋمەتتىك ماسەلەسىن تاۋەلسىزدىكتىڭ ءبىرىنشى كۇنى ماڭگىلىككە شەگەلەپ تۇرىپ شەشىپ قويعان بولاتىن!

سەنبەسەڭىزدەر، قاراڭىزدار:

«قازاقستان رەسپۋبليكاسىنىڭ مەملەكەتتiك تاۋەلسiزدiگi تۋرالى» قازاقستان رەسپۋبليكاسىنىڭ كونستيتۋتسيالىق زاڭىنىڭ (1991 جىلعى 16 جەلتوقساندا قابىلدانعان) 7-بابىندا: «قازاقستان رەسپۋبليكاسىنىڭ ءوز ازاماتتىعى بار. باسقا مەملەكەتتەردە تۇراتىن رەسپۋبليكا تەرريتورياسىن تاستاپ شىعۋعا ءماجبۇر بولعان بارلىق قازاقتاردىڭ سول مەملەكەتتەردiڭ ازاماتتىعىمەن بiرگە، ەگەر بۇل ولار ازاماتى بولىپ وتىرعان مەملەكەتتەردىڭ زاڭدارىنا قايشى كەلمەيتiن بولسا، قازاقستان رەسپۋبليكاسىنىڭ ازاماتتىعىن الۋ حۇقى تانىلادى»،-دەپ جازىلعان!

اتالعان كونستيتۋتسيالىق زاڭدا تاعى: «قازاقستان رەسپۋبليكاسى كوشi-قون پروتسەستەرiن رەتتەپ وتىرادى. قازاقستان رەسپۋبليكاسى جاپپاي قۋعىن-سۇرگiن، كۇشتەپ ۇجىمداستىرۋ كەزەڭدەرiندە، ادامگەرشiلiككە جات وزگە دە ساياسي شارالار ناتيجەسىندە رەسپۋبليكا تەرريتورياسىنان كەتۋگە ءماجبۇر بولعان ادامدار مەن ولاردىڭ ۇرپاقتارىنىڭ، سونداي-اق بۇرىنعى وداقتاس رەسپۋبليكالار تەرريتورياسىندا تۇراتىن قازاقتاردىڭ ءوز تەرريتورياسىنا قايتىپ ورالۋى ءۇشiن جاعداي جاسايدى.» جانە «قازاقستان رەسپۋبليكاسى رەسپۋبليكا شەگiنەن تىس جەرلەردە تۇراتىن قازاقتاردىڭ ۇلتتىق-مادەني، رۋحاني جانە تiلدiك قاجەتتەرىن قاناعاتتاندىرۋعا قامقورلىق جاسايدى، ولار ازاماتى بولىپ وتىرعان مەملەكەتتەرمەن جاسالعان شارتتار نەگiزiندە بۇل ازاماتتاردىڭ مۇددەلەرiن قورعايدى»، - دەگەن قاسيەتتى نورمالار بار!

كونستيتۋتسيانى، كونستيتۋتسيالىق زاڭدار مەن زاڭداردى جىلىنا ەمەس، ايىنا ەمەس، اپتاسىنا، ءتىپتى كۇنىنە وزگەرتە بەرۋگە بولادى.

ال، «قازاقستان رەسپۋبليكاسىنىڭ مەملەكەتتiك تاۋەلسiزدiگi تۋرالى» قازاقستان رەسپۋبليكاسىنىڭ كونستيتۋتسيالىق زاڭى (1991 جىلعى 16 جەلتوقساندا قابىلدانعان) ەشقاشان وزگەرمەيدى!

ول – ماڭگىلىك ەلىمىزبەن بىرگە ماڭگى جاسايتىن زاڭ!

كەرەك بولسا، 18-بابىندا جازۋلى تۇر، جاڭا كونستيتۋتسيانىڭ ءوزى «قازاق سوۆەتتىك سوتسياليستىك رەسپۋبليكاسىنىڭ مەملەكەتتiك ەگەمەندiگi تۋرالى» دەكلاراتسيا مەن وسى «قازاقستان رەسپۋبليكاسىنىڭ مەملەكەتتiك تاۋەلسiزدiگi تۋرالى» قازاقستان رەسپۋبليكاسىنىڭ كونستيتۋتسيالىق زاڭىنىڭ نەگىزىندە جاسالادى!

سول ءۇشىن دە بۇل كونستيتۋتسيالىق زاڭنىڭ ورنى بولەڭ، رولى زور!

مەن جوعارىدا «قازىر «زاڭ مەن ءتارتىپ!» قاعيداتى سالتانات قۇرعان زامان!» دەگەن ءسوزدى بوسقا ايتىپ وتىرعان جوقپىن. اتا زاڭنىڭ ماڭدايىندا جارقىراپ تۇرعان «زاڭ مەن ءتارتىپ!» قاعيداتىنىڭ ناعىز جۇمىس ىستەيتىن جەرى – ءدال وسى تۇس ەدى!

وكىنىشكە وراي، قازىر «قازاقستان رەسپۋبليكاسىنىڭ مەملەكەتتiك تاۋەلسiزدiگi تۋرالى» قازاقستان رەسپۋبليكاسىنىڭ كونستيتۋتسيالىق زاڭىنىڭ بۇل نورمالارىنىڭ بىرەۋى ورىندالىپ جاتقان جوق!

كەرىسىنشە، مىنە، التى ايدىڭ ءجۇزى بولدى، «بىرلەسكەن بۇيرىق» ارقىلى «قازاقستان رەسپۋبليكاسىنىڭ مەملەكەتتiك تاۋەلسiزدiگi تۋرالى» زاڭنىڭ 7- جانە 8-باپتارى ورەسكەل بۇزىلىپ، اتاجۇرتىنا ورالعان قانداستارىمىزدىڭ قۇقىعى شەكتەلىپ جاتىر!

پرەزيدەنتىمىزدىڭ «زاڭ مەن ءتارتىپ!» دەگەن قاسيەتتى قاعيداتى جاڭا كونستيتۋتسيادان كورىنىس تاپپاي جاتىپ، جەلگە ۇشۋدا...

ەگەر، وسى «قازاقستان رەسپۋبليكاسىنىڭ مەملەكەتتiك تاۋەلسiزدiگi تۋرالى» زاڭنىڭ وسى ولشەمىنە سالساق، بىرلەسكەن بۇيرىق ارقىلى اتاجۇرتىنا ورالعان ەتنيكالىق قازاقتاردىڭ قازاقستان رەسپۋبليكاسىنىڭ ازاماتتىعىن الۋ قۇقىعىن شەكتەۋ – بۇل – مەملەكەتتىڭ تاۋەلسىزدىگىنە قاساقانا قارسى جاسالعان اسا اۋىر قىلمىس بولىپ ەسەپتەلەدى!!!

قۇرمەتتى ولجاس ابايۇلى!
قۇرمەتتى رومان ۆاسيلەۆيچ!

مەن وتە جاقسى بىلەمىن، كەيبىر وبلىستارداعى حالىقتىڭ سانى شامادان تىس ارتىپ كەتكەندىكتەن، ۇكىمەتكە قولايسىزدىقتار تۋدىرىپ جاتىر.

بىراق، بۇل ماسەلەگە تەك قانا اتاجۇرتىنا ورالعان قانداستارىمىزدى ايىپتى ەتۋ – ادىلەتسىزدىك بولار ەدى.

جۇرتقا كىنا ارتقاننان گورى، ەل بولىپ، جۇرت بولىپ، بۇل ماسەلەنى وڭتايلى شەشۋ جولىن تاپقان الدەقايدا ساۋاپتى ءارى ابىرويلى جۇمىس بولماق!

بۇل ماسەلەنى شەشۋدىڭ جالعىز جولى – سول – كەمىندە ەلۋ جىلدىق كەشەندى جوبا جاساپ، كوشىپ كەلۋشىلەر مەن قونىس اۋدارۋشىلاردى ۇكىمەت بەلگىلەگەن وڭىرلەرگە جاپپاي قونستاندىرۋ.

قازىرگى تاڭدا، ماڭعىستاۋ وبلىسىنداعى حالىقتىڭ شامادان تىس ارتىپ كەتۋى – ءبارىمىزدى الاڭداتۋدا.

بىراق، بۇل ايماقتىڭ حالقىنىڭ اتالعان وڭىرلەرگە لاپ ەتىپ كوشە جونەلۋى – قيىن!

ولاردى قانداستار قۇساتىپ ماجبۇرلەسەڭ، سوڭى دۇربەلەڭگە اينالۋى بەك مۇمكىن!

ەگەر، سىزدەر ماڭعىستاۋ حالقىنىڭ ءبىر بولىگىن ۇكىمەت بەلگىلەگەن وڭىرلەرگە كوشىرەمىن دەسەڭىزدەر، وندا وسى ماڭعىستاۋدىڭ تۋماسى، ەكس-دەپۋتات، كورنەكتى مەملەكەت جانە قوعام قايراتكەرلەرى ەدىل جاڭبىرشىن مەن سامات مۇساباەۆتى سولتۇستىك قازاقستان مەن پاۆلودارعا وبلىس اكىمى ەتىپ تاعايىنداپ، ەكەۋىنە بەلگىلى دارەجەدە مۇمكىندىك بەرسەڭىزدەر، بۇل شارۋا العا جىلجيدى!

وزدەرىڭىز جاقسى بىلەسىزدەر، بۇل ەكى جىگىتتىڭ ەكەۋى دە ەلگە تانىلعان وتە بىلىكتى ازاماتتار!

ماعان سەنىپ قويىڭىزدار، مىنەزى وزگەشە، جاراتىلىسى بولەك ماڭعىستاۋ حالقىنىڭ ءتىلىن تەك وسى ەكى تۇلعا قانا تابادى جانە ولاردى ۇكىمەت ايقىنداعان وڭىرلەرگە كوشۋگە كوندىرە بىلەدى.

ال، قانداستارىمىزعا كەلسەك، جوعارىدا ايتتىق، وڭىرلىك شەكتەۋ مەن وسى پيلوتتىق جوبا ولاردىڭ كونستيتۋتسيالىق قۇقىعىن شەكتەۋگە اپارىپ سوقتىرادى! سول ءۇشىن، ولاردى ۇكىمەت ايقىنداعان وڭىرلەرگە قونستاندىرۋ ءۇشىن، وتباسىنىڭ بۇتىندىگىن ساقتاۋ شارتى استىندا، وزگە وبلىستار مەن ۇلكەن قالالارعا كوشىپ كەلۋشىلەردىڭ قونىستانۋىن شەكتەيتىن ارنايى زاڭ كەرەك!

سوندا، اتا زاڭىمىزدىڭ 24-بابىنداعى «زاڭدا بەلگىلەنگەن جاعدايلاردى قوسپاعاندا، قازاقستان رەسپۋبليكاسىنىڭ اۋماعىندا زاڭدى تۇردە جۇرگەن ءار ادامنىڭ ەل اۋماعىندا ەركiن ءجۇرiپ-تۇرۋعا جانە تۇرعىلىقتى جەرىن ەركىن تاڭداۋعا قۇقىعى بار», - دەگەن نورما بۇزىلمايدى! اتالعان زاڭ وسى باپتاعى «زاڭدا بەلگىلەنگەن جاعدايلاردى قوسپاعاندا...» دەگەن ەسكەرتپە ءۇشىن كەرەك!

سونىمەن بىرگە، ۇكىمەت ايقىنداعان وڭىرلەرگە قونىستانعان قانداستارىمىزدىڭ قۇجاتتانۋ، وڭىرلىك كۆوتاعا قول جەتكىزۋ پروتسەسسىن بۇرىنعىدان دا بارىنشا جەڭىلدەتۋ كەرەك!

ەسەسىنە، ول وڭىرلەردەن قايتا كوشىپ كەتكەندەرگە قولدانىلاتىن اكىمشىلىك جازانى مەيىلىنشە اۋىرلاتقان ءجون.

مىسالى، ۇكىمەت بەرگەن وڭىرلىك كوۆوتا مەن وزگە دە قاراجاتتى ءۇش ەسەلەپ قايتارىپ الۋ سىندى شارالار قولدانىلسا، ەش ارتىق بولمايدى...

ەگەر، سىزدەر مۇمكىندىك بەرسەڭىزدەر، مەن وسى كوشى-قون ساياساتىمەن ۇزاق جىلدان بەرى تىنباي اينالىسىپ كەلە جاتقان وتە تاجىريبەلى مامان، بەلسەندى ازامات رەتىندە، وسى ماسەلەنى شەشۋ ءۇشىن كومەكتەسۋگە 24/7 دايىنمىن!

سۋرەتتەر: wikipedia.org, nur.kz سايتتارىنان الىندى.

قۇرمەتتى ولجاس ابايۇلى!
قۇرمەتتى رومان ۆاسيلەۆيچ!

430 وتباسى – از سان ەمەس، مىڭ نەمەسە ودان دا كوپ ادام!

بۇل – مەنىڭ قولىما تۇسكەندەرى عانا.

ال، پيلوتتىق جوبانىڭ كەسىرىنەن جالپى قۇجاتتانا الماي وتىرعان قانداستارىمىزدىڭ سانى بۇدان الدەقايدا كوپ، ءتىپتى ەكى-ءۇش ەسە ارتىق بولۋى مۇمكىن;

تىزىمدىككە قاراپ وتىرساق، ولاردىڭ ءبىرازى كوپبالالى وتباسىلار ەكەن;

وزدەرىنىڭ ايتۋلارىنا قاراعاندا، «قانداس» مارتەبەسىن الىپ ۇلگىرگەندەرى دە جەتەرلىك كورىنەدى;

ءبىر ءبولىمى ۇكىمەت ايقىنداعان وڭىرلەرگە قونىستانعاندار بولىپ شىقتى;

جوعارىدا ايتتىم، سوعان قاراماستان، ونداي ساناتتاعى وتباسىلار دا قۇجاتتانا الماي، وڭىرلىك كۆوتاعا قولى جەتپەي داعدارىپ وتىر;

ءبىرازىنىڭ ۆيزاسىنىڭ، «قانداس» مارتەبەسىنىڭ جانە وزگە دە قۇجاتتارىنىڭ مەرزىمى ءوتىپ كەتكەن;

وزدەرىن قويا تۇرىپ، مەكتەپ جاسىنداعى بالالىنا ۆيزا راسىمدەتە الماي جاتقاندارى قانشاما؟!

ەندى وسى ماسەلەنى شەشۋگە كەلسەك، ۇكىمەتتىڭ الدىندا ەكى تاڭداۋ تۇر: نە زاڭ، نە پيلوتتىق جوبا!

ۇكىمەت تەز شەشىم قابىلداپ، وسى ەكى جولدىڭ بىرەۋىن تاڭداۋى كەرەك!

ەگەر، ۇكىمەت «قازاقستان رەسپۋبليكاسىنىڭ مەملەكەتتiك تاۋەلسiزدiگi تۋرالى» قازاقستان رەسپۋبليكاسىنىڭ كونستيتۋتسيالىق زاڭىن تاڭداسا، وندا بىردەن پيلوتتىق جوبانىڭ كۇشىن جويىپ، قۇجاتتانا الماي وتىرعان قانداستارىمىزدىڭ ماسەلەسىن بۇرىنعى تارتىپپەن شەشۋى ءتيىس!

بۇل تاڭداۋ – بۇگىنگى كۇننىڭ – قاسىم-جومارت توقاەۆ جولعا قويعان ادىلەتتى قازاقستان يدەاسى مەن زاڭ مەن ءتارتىپ قاعيداتىنىڭ تالابى!

ال، ۇكىمەت ءۇش مينيسترلىكتىڭ پيلوتتىق جوباسىن تاڭداسا، وندا مەملەكەتتە زاڭ جۇمىس ىستەمەيدى دەگەن ءسوز، بىرلەسكەن بۇيرىقتىڭ كەسىرىنەن قۇجاتتانا الماي وتىرعان نەشە جۇزدەگەن وتباسىن سەرگەلدەڭگە سالماي، كەلگەن ەلدەرىنە كەرى قايتارۋى كەرەك!!

بۇل تاڭداۋ – ادىلەتتى قازاقستان يدەاسى مەن زاڭ مەن ءتارتىپ قاعيداتىن تۇبىرىمەن جوققا شىعارۋ دەگەن ءسوز!

مۇنى باسقاشا ايتۋ، باسقاشا ءتۇسىندىرۋ مۇمكىن ەمەس!!!

ەندەشە، ارداقتى باۋىرلارىم، ەندىگى تاڭداۋ سىزدەردىڭ قۇزىرلارىڭىزدا!!!

ارينە، ءبىر-ەكى جەيدەنى بۇرىن توزدىرعان جاناشىر اعالارىڭىز رەتىندە، مەن بۇل كەلەڭسىزدىكتىڭ «ستاليندىك رەپرەسسيا» سەكىلدى «بەكتەنوۆ پەن سكلياردىڭ پيلوتتىق جوباسى» دەگەن جامان اتپەن تاريحقا قالعانىن ەشقاشان قالامايمىن!!!

ەسەسىنە، «ءبىز بىرلىگى بەكەم، ءبىرتۇتاس ۇلت رەتىندە الەمدىك وركەنيەتتىڭ شىڭىن باعىندىرىپ، بارشاعا بىردەي مۇمكىندىك بەرەتىن جانە بارلىق ازاماتتىڭ جان-جاقتى دامۋىنا جول اشاتىن مەملەكەتتى – ادىلەتتى قازاقستاندى قۇرامىز!»، - دەپ انتقا بەرگىسىز جىگىتتىك ءسوزىن ايتىپ، اعىنان اقتارىلىپ جاتقان مەنىڭ قاسىم-جومارت اعامدى دا ۇياتقا قالدىرمايتىنداي، مەملەكەتتى دە شەرمەندە قىلمايتىنداي ەتىپ، ەكەۋىڭىزدىڭ وڭ ءارى ءتيىمدى شەشىم قابىلداۋعا ىقپال ەتەتىندەرىڭىزگە سەنىمدىمىن!

ساداعالارىڭ كەتەيىن، باۋىرلارىم!

سىزدەردەن وتىنەرىم: ەڭ قۇرىعاندا، قاسىم-جومارت اعا پرەزيدەنت بولىپ تۇرعان كەزدە ۇلى كوشكە كەدەرگى جاساتپاڭىزدارشى!

قاسەكەڭدى ءوزىنىڭ تۋعان حالقىنىڭ الدىندا ۇياتقا قالدىرامىز عوي...

ماعان سول قابىلداعان شەشىمدەرىڭىزدى ايتىپ، ءوز قولدارىڭىزبەن جاۋاپ بەرۋلەرىڭىزدى جانە مەنى جەكە-جەكە قابىلداۋلارىڭىزدى سۇرايمىن!!!

قۇرمەتپەن، اۋىت مۇقيبەك،

ەرەن ەڭبەگى ءۇشىن مەدالىنىڭ،

قۇرمەت وردەنىنىڭ يەگەرى.

Abai.kz