پرەمەر-ءمينيستردىڭ ورىنباسارى التاي كولگىنوۆ اقتوبە وبلىسىنا جۇمىس ساپارى اياسىندا «اۋىل اماناتى» اۋىل حالقىنىڭ تابىسىن ارتتىرۋ جوباسىنىڭ، «اۋىلدىق دەنساۋلىق ساقتاۋدى جاڭعىرتۋ»، «جايلى مەكتەپ» ۇلتتىق جوبالارىنىڭ ىسكە اسىرىلۋ بارىسىمەن تانىستى.

ۆيتسە-پرەمەر التاي كولگىنوۆ اۋىل حالقىنىڭ تابىسىن ارتتىرۋعا باعىتتالعان جوبانىڭ العاشقى قاتىسۋشىلارىمەن كەزدەستى. «اۋىل اماناتى» باعدارلاماسىنا اقتوبە وبلىسىنداعى 24 اۋىلدىق وكرۋگتىڭ 43 مىڭعا جۋىق تۇرعىنى قاتىسادى. بۇل قۇس شارۋاشىلىعى باعىتى بويىنشا 2 200-گە جۋىق جوبانى، وسىمدىك شارۋاشىلىعى بويىنشا 342, شاعىن بيزنەس سالاسىندا 224, كووپەراتيۆتەردى جاراقتاندىرۋدى كوزدەيتىن 24 جوبانى جانە ت. ب. ىسكە اسىرۋعا مۇمكىندىك بەرەدى.

اقتوبە وبلىسى اكىمدىگىنىڭ دەرەكتەرىنە سايكەس، باعدارلامانى ىسكە اسىرۋ جۇمىسسىزدار سانىن 41,4%-عا، اتاۋلى الەۋمەتتىك كومەك الۋشىلار سانىن 49,3%-عا قىسقارتۋعا مۇمكىندىك بەرەدى. وتباسىنىڭ ورتاشا تابىسى 192%-عا ارتادى.

التاي كولگىنوۆ مەملەكەت باسشىسىنىڭ تاپسىرماسىمەن 2023 جىلدان باستاپ اۋىل حالقىنىڭ تابىسىن ارتتىرۋ جوباسى وڭىرلەردىڭ ەرەكشەلىگى مەن الەۋمەتتىك-ەكونوميكالىق دامۋىن ەسكەرە وتىرىپ، بۇكىل ەل اۋماعىن قامتيتىنىن اتاپ ءوتتى. وسى ماقساتتا رەسپۋبليكالىق بيۋدجەتتەن 50 ملرد تەڭگەدەن استام قارجى ءبولىندى. باعدارلاماعا قاتىساتىن اۋىل تۇرعىندارى جىلدىق 2,5% جەڭىلدىكپەن شاعىن نەسيە الا الادى.

التاي كولگىنوۆ «اۋىل اماناتى» جوباسى اياسىندا وتىنىمدەردى قابىلداۋ، جانە وقىتۋ ورتالىعىنىڭ جۇمىس بارىسىمەن تانىستى.

سونىمەن قاتار ەل وڭىرلەرىندە «اۋىلدىق دەنساۋلىق ساقتاۋدى جاڭعىرتۋ»، «جايلى مەكتەپ» ۇلتتىق جوبالارىن ىسكە اسىرۋ باستالدى.

ۆيتسە-پرەمەر التاي كولگىنوۆ حرومتاۋ اۋداندىق اۋرۋحاناسىندا بولدى. اتالعان اۋرۋحانا بازاسىندا ۇلتتىق جوبا اياسىندا اۋدانارالىق ورتالىق اۋداندىق اۋرۋحانا اشۋ جوسپارلانۋدا. قازىر اۋرۋحانا 45 مىڭنان استام ادامعا قىزمەت كورسەتەدى جانە اقتوبەدەن 90 شاقىرىم جەردە ورنالاسقان. تەرى ارقىلى كورونارلىق ارالاسۋلار ورتالىعىن، ينسۋلت ورتالىعىن، 2-دەڭگەيلى تراۆماتولوگيالىق جانە حيرۋرگيالىق كومەك كورسەتەتىن بولىمشەلەردى اۋدانارالىق ورتالىق اۋرۋحانادا اشۋ مەديتسينالىق قىزمەت كورسەتۋ ساپاسىن ەداۋىر جاقسارتۋعا جانە ولاردىڭ سانىن كەڭەيتۋگە، حالىقتى ەكى ەسە قامتۋعا مۇمكىندىك بەرەدى. وسىلايشا، جاقىن ماڭداعى اۋدانداردىڭ تۇرعىندارىنا مەديتسينالىق كومەك قولجەتىمدى بولماق.

جيىنعا اتىراۋ، قىزىلوردا، باتىس قازاقستان، ماڭعىستاۋ وبلىستارى اكىمدەرىنىڭ ورىنباسارلارى، دەنساۋلىق ساقتاۋ، ەڭبەك جانە حالىقتى الەۋمەتتىك قورعاۋ، وقۋ-اعارتۋ، اۋىل شارۋاشىلىعى، مادەنيەت جانە سپورت، ۇلتتىق ەكونوميكا ۆيتسە-مينيسترلەرى جانە ت.ب. قاتىستى.

«ءبىزدىڭ الدىمىزدا حالىقتىڭ ءال-اۋقاتىن ارتتىرۋ مىندەتى تۇر. بىرقاتار وڭىردە مەملەكەت باسشىسىنىڭ تاپسىرماسىمەن اۋىل حالقىنىڭ تابىسىن ارتتىرۋ جوباسىن ىسكە اسىرۋ باستالدى. بيىل «اۋىل اماناتى» جوباسى ەلىمىزدىڭ بارلىق وڭىرىندە جۇزەگە اسىرىلاتىن بولادى. بۇل جاڭا تۇراقتى جۇمىس ورىندارىن قۇرۋعا، جەرگىلىكتى ونىمدەردى شىعارۋعا، ااك الۋشىلار سانىن قىسقارتۋعا، جالپى اۋىلدار مەن وڭىرلەردىڭ تارتىمدىلىعىن ارتتىرۋعا مۇمكىندىك بەرەدى»، — دەدى التاي كولگىنوۆ.

سونىمەن قاتار بالالاردىڭ ساپالى ءبىلىم الۋى ءۇشىن ينفراقۇرىلىم سالۋ قاجەت، تۇرعىندار ءۇشىن مەديتسينالىق قىزمەتتەر قولجەتىمدى بولۋى ءتيىس.

«بيىل وڭىرلەر 300 العاشقى مەديتسينالىق-سانيتارلىق كومەك كورسەتەتىن نىسان، 221 جايلى مەكتەپ سالۋعا كىرىسۋى قاجەت. وڭىرلەردىڭ اكىمدىكتەرى قۇرىلىستى ۋاقىتىلى باستاپ، سالىنىپ جاتقان وبەكتىلەردىڭ ساپاسىن باقىلاۋعا، جوبالاردى ىسكە اسىرۋعا ۇلكەن جاۋاپكەرشىلىكپەن قاراۋى ءتيىس. سۇرانىس قاتاڭ بولادى. جەتەكشىلىك ەتەتىن ورىنباسارلار جەكە جاۋاپ بەرەدى. بۇل الەۋمەتتىك نىساندار وڭىرلەرگە، اۋىل تۇرعىندارىنا قاجەت»، — دەدى التاي كولگىنوۆ.

بۇعان دەيىن ۆيتسە-پرەمەر جامبىل وبلىسىندا بولىپ، وندا الماتى، تۇركىستان، جەتىسۋ وبلىستارىنىڭ اكىمدىكتەرىنىڭ الدىنا ۇلتتىق جوبالاردى ساپالى ىسكە اسىرۋ بويىنشا مىندەتتەر قويعان بولاتىن.

Abai.kz