قر ورتالىق سايلاۋ كوميسسياسى ءماجىلىس پەن ءماسليحاتتار سايلاۋىنا تۇسىگە رۇقساتى بار 7 ساياسي پارتيانى اتادى. ولار: «امانات» پارتياسى، «اق جول» دەموكراتيالىق پارتياسى، «اۋىل پارتياسى»، جسدپ، قحپ (بۇرىنعى كوممۋنيستىك پارتيا), «رەسپۋبليكا» پارتياسى مەن «بايتاق» پارتياسى.

قازىرگى ۋاقىتتا بىرنەشە ساياسي پارتيا سايلاۋعا قاتىساتىنىن مالىمدەپ ۇلگەردى.

اۋىل پارتياسى:

«اۋىل» حالىقتىق-دەموكراتيالىق پاتريوتتىق پارتياسى ءوز قاتارىندا تەك اۋىل شارۋاشىلىعى قىزمەتكەرلەرىن عانا ەمەس، جالپى اۋىلعا جاناشىر ازاماتتاردىڭ كوپشىلىگىن بىرىكتىرەدى. ءبىزدىڭ قاتارىمىزدا اگرارلى سەكتور، ءبىلىم جانە مەديتسينا، الەۋمەتتىك سالا قىزمەتكەرلەرى، عالىمدار مەن زيالى قاۋىم وكىلدەرى بار. قازاقستاندىقتاردىڭ جارتىسىنا جۋىعى اۋىلدا تۇرادى.

اۋىلدى، اۋىلدى اۋماقتاردى دامىتۋ، اۋىل شارۋاشىلىعىن وركەندەتۋ ءبىزدىڭ مەملەكەتىمىزدىڭ ازىق-تۇلىك قاۋىپسىزدىگىنىڭ نەگىزى بولىپ ەسەپتەلەدى. بۇل - ءبىزدىڭ پارتيانىڭ باستاپقى جانە وزگەرمەيتىن ساياسي باعىتى. سوندىقتان «اۋىل» حالىقتىق-دەموكراتيالىق پاتريوتتىق پارتياسى پارلامەنتتىڭ تومەنگى پالاتاسى مەن ماسليحاتتارعا سايلاۋ وتكىزۋدى قۇپتايدى.

ءبىز قازاقستاندا پارتيالىق ءورىستىڭ كەڭەيگەنى مەن ساياسي كۇشتەر اراسىنداعى باسەكەلەستىكتىڭ دامىپ كەلە جاتقاندىعىن كورىپ وتىرمىز. بۇل ءبىزدى قورقىتپايدى، كەرىسىنشە، ىنتالاندىرادى. سەبەبى ءبىزدىڭ ءوزىمىزدىڭ ساياسي پلاتفورمامىز بار. «اۋىل» پارتياسىنىڭ اۋىل جانە اۋىلدى اۋماقتاردى دامىتۋ كونتسەپتسياسىنا قوساتىن ءوزىنىڭ ۇسىنىستارى بار. سوندىقتان ءبىز جاڭا سايلاۋ تسيكلىندە ادال جانە اشىق كۇرەسكە دايىنبىز»، - دەدى پارتيا توراعاسى.

بايتاق پارتياسى:

«بايتاق» ماجىلىسكە بارادى! سونىمەن بىلتىر كۇزدەن بەرى ەل اراسىندا ايتىلىپ جۇرگەن جايت، اقيقاتقا اينالدى. كەشە مەملەكەت باسشىسى توقاەۆتىڭ ارنايى شەشىمىمەن پارلامەنتتىڭ ءماجىلىسى جانە بارلىق ءماسليحات جۇمىسىن توقتاتتى. ياعني تارادى. كەزەكتەن تىس ءماجىلىس ءھام ءماسليحات سايلاۋى الداعى ناۋرىزدىڭ 19 جۇلدىزىنا بەلگىلەندى. دۇرىس. بۇلدا ءبىر جاڭا قازاقستان قۇرۋ جولىنداعى ساياسي رەفورمانىڭ ءبىر تارماعى. جاڭا قازاقستانعا جاڭا دەپۋتاتتارمەن، جاڭا پار ت يالاردىڭ ساياساتقا ارالاسۋىمەن بارعان ءجون. دۇرىس قادام! الداعى سايلاۋ بۇرىنعىلاردان وزگەرەك. قازىرگى جاعدايعا بايلانىستى، الداعى سايلاۋ ارالاس پارتيالىق-ماجوريتارلىق جۇيە بويىنشا وتپەك. سونداي-اق، قازاقستان حالىق اسسامبلەياسى ماجىلىسكە دەپۋتاتتار ۇسىنبايدى. سايلاۋ دوداسىنا ەلىمىزدە تىركەلگەن جەتى پارت -يا: «امانات»، «اق جول»، قازاقستان حالىق پ-سى، جالپىۇلتتىق سوتسيال-دەموكراتيالىق پ-سى، «اۋىل»، «بايتاق» جانە «Respublica» تۇسپەك. وسى ورايدا ءبىز بايتاقتىقتاردا وسى الامان باسەكەدە ءوز باعىمىزدى سىناپ، پارلامەنتكە وتۋگە تىرىسپاقپىز. راس، ەلىمىزدە ەكولوگيا ماسەلەسى اقساپ جاتىر. جاعداي سىن كوتەرمەيدى. سوندىقتان ءتۇيىنى مول ەكولوگيا ماسەلەلەرىن پارلامەنت مىنبەرىننەن كوتەرمەك ويدامىز»، - دەدى پارتيا باسشىسى ازاماتحان ءامىرتاي.

جسدپ:

«ءبىز، جالپىۇلتتىق سوتسيال-دەموكراتيالىق پارتيا – ەلىمىزدەگى ساياسي وزگەرىستەر ءۇشىن كۇرەسۋگە دايىن جالعىز وپپوزيتسيالىق كۇشپىز.

وتكەن پارلامەنتتىك سايلاۋ ناۋقانىندا داۋىس بەرۋدىڭ ءادىل وتۋىنە كۇمان كەلتىرىپ، ءوز كانديداتتارىمىزدى ۇسىنباي، سايلاۋعا بويكوت جاريالاۋدى شەشتىك. ەندى جاعداي وزگەردى، زاڭنامالىق شارتتار مەن بيلىك جۇيەسىنىڭ ءوزى وزگەردى. سوندىقتان دا، ەلىمىزدىڭ بولاشاعى الدىنداعى جاۋاپكەرشىلىكتى تۇسىنە وتىرىپ، بىزدىڭ پارتيا الداعى سايلاۋ ناۋقانىنا قاتىسۋ تۋرالى شەشىمىن قابىلدادى.

ەلىمىز ءومىردىڭ بارلىق سالالارىندا جۇيەلى پروبلەمالارمەن بەتپە-بەت كەزدەسۋدە. ساياسي جانە ەكونوميكالىق رەسۋرستارعا قول جەتكىزۋ ازاماتتارىمىزدىڭ كوپشىلىگىنە شەكتەۋلى. بايلار مەن كەدەيلەر اراسىنداعى الشاقتىق بۇرىن-سوڭدى بولماعان مولشەرگە جەتتى. ءبىز مەملەكەتتىمىزدىڭ قازىرگى قوعامدىق-ساياسي جانە ەكونوميكالىق ساياساتىن قابىلدامايمىز جانە قابىلداعىمىز دا كەلمەيدى. بىز سايلاۋعا قوعامدا جىلدار بويى جيىلعان ماسەلەلەردى شەشۋ، ازاماتتاردىڭ قۇقىقتارىن كەڭەيتۋ جانە ساياسي جۇيەنى دەموكراتيالاندىرۋ ماقساتىندا قاتىسامىز»، - دەپ مالىمدەدى جسدپ تورالقاسى.

2023 جىلدىڭ 19 ناۋرىزى كۇنى وتەتىن ءماجىلىس پەن ءماسليحاتتار سايلاۋىنا قاتىساتىنىن رەسمي تۇردە ءۇش پارتيا مالىمدەدى. ال قالعان پارتيالار الداعى ۋاقىتتا رەسمي مالىمدەمە جاساپ قالۋى مۇمكىن.

Abai.kz