سايلاۋ رەسمي جاريالانىپ، پارتيالار مەن ءوزىن-ءوزى ۇسىنۋشىلار سانى ارتتى. پارتياسىنىڭ ساياستىنا كوڭىلى تولمايتىندار، پارتيادان قۋىلعاندار مەن ءوز ەركىمەن پارتيادان كەتكەندەر دە كوبەيدى. 

سايلاۋدىڭ بولعانىنان بولادىسى قىزىق قوي. سايلاۋ قارساڭىندا پارتياسىنىڭ يميدجىنە كەرى اسەرى بار سۇحبات بەرىپ، رەسەيدىڭ باسقىنشى ساياساتىن اشىق قولداپ، ۋكراينا بيلىگىن ايىپتاي سويلەگەن ازامات ابىلداەۆتىڭ "اق جول" پارتياسىنان شىعارىلىپ، وسك تاراپىنان دەپۋتاتتىق مانداتىنىڭ كەرى قايتارىلۋى بۇل سايلاۋعا دەگەن قىزىعۋشىلىقتى ارتتىرا ءتۇستى.

ەندى مىنە، تاعى ءبىر پارتيانىڭ بەلدى مۇشەسى، بۇرىنعى كوممۋنيستەردىڭ اتىنان پرەزيدەنتتىك سايلاۋعڭا دا تۇسكەن، كوپشىلىككە تانىس جامبىل احمەتبەكوۆ پارتيادان كەتكەنىن مالىمدەدى. بۇگىندە ول پارتيا قازاقستان حالقى پارتياسى (قحپ) دەپ اتالادى.

جامبىل احمەتبەكوۆ ءوزىنىڭ Facebook پاراقشاسىنا بىلاي دەپ جازدى. "وسى مالىمدەمەنى جاساي وتىرىپ قحپ قاتارىنان ءوز ەركىممەن شىعاتىنىمدى جاريالايمىن، - بۇل مەنىڭ 24.01 كۇنى پارتيا قاتارىنان شىعاتىنىمدى ايتقان ساتتە جازعان مالىمدەمەمنىڭ ءبىر تسيتاتاسى. مەن بۇل پارتيادا قۇرىلعان ساتتەن باستاپ قىزمەت ەتۋدەمىن دەسەم دە بولادى. پارتيا بۇل مەنىڭ ءومىرىم. مەن پارتيادا قاتارداعى پارتيا مۇشەسىنەن باستاپ، پارتيا حاتشىسىنا دەيىن كوتەرىلدىم.  ءماجىلىستىڭ V, VI, VII شاقىرىلىمىنداعى دەپۋتاتى بولدىم، پارتيا اتىنان ەكى مارتە پرەزيدەنتتىك سايلاۋعا قاتىستىم. ءبىز قاراپايىم ازاماتتاردىڭ قۇقىقتارى مەن مۇددەسىن قورعايتىن پارتيا قۇرىپ، جۇمىس ىستەدىك. ءبىزدىڭ كوماندامىز پارتيانى ءۇش مارتە ماجىلىسكە اكەلدى. قازىرگى ءبىرىنشى باسشىلىق تاراپىنان ءدال وسىنداي ناتيجەگە قول جەتكىزۋگە ۇلكەن كۇمانمەن قارايمىن", - دەيدى احمەتبەكوۆ.

احمەتبەكوۆ پارتيانىڭ ەل ازاماتتارىنىڭ قۇقىعى مەن مۇددەسىن قورعاپ، العا جىلجۋىن قولدايتىنىن، الايدا "جاڭا باسشىلىقتىڭ كاسىبيلىكتەن الىس ارەكەتىن قۇپتامايتىنىن" ايتتى.

"پارتيا قۇرامى جاڭا مۇشەلەرمەن تولىعۋدا دەپ دەيدى ولار. بىراق ولاردىڭ كەلۋىمەن بىرگە، ءبىز ودان دا كوپ ادامداردان ايىرىلدىق – ەلىمىزدىڭ اۋدان، وبلىس، قالالارىنداعى ۇيىمداردان كوپتەگەن جاقسى، شىنشىل، ءوز يدەيامىزعا بەرىلگەن ادامدار كەتىپ جاتىر، شىن مانىندە جۇمىس ىستەيتىن دەپۋتاتتار فراكتسيادان كەتىپ قالدى. ولاردىڭ سوڭىنان ەرەتىندەر كوپ ەدى. مەن بۇل جايلى جاڭا باسشىلىققا ايتتىم، الايدا ولار ەستىمەگەن كەيىپ تانىتتى. مەن ولارمەن جۇمىس ىستەپ، ءبىر پارتيادا بولا المايمىن. پارتيا ىدىراپ جاتىر. بۇل بۇگىن ءوزى باس تارتىپ جاتقان تۇلعالارعا كەشە ودا جىرىن ارناعان دارىنسىز باسشىلىقتىڭ جۇمىسىنىڭ ناتيجەسى. بىراق بارلىعى دا حالىقتىڭ ەسىندە. مەن اۋىل-ايماقتى ارالاپ جۇرگەنىمدە، اۋىل حالقى بۇرىنعى قازاقستاننىڭ وكىلى سانالاتىن جاڭا باسشىلىققا بايلانىستى پارتياعا داۋىس بەرمەيتىنىن ايتۋدا. پارتيا سايلاۋدا جەڭىلەدى. پارتيانىڭ نەگىزىن قالاۋشىلاردىڭ ءبىرى جانە ارداگەرى رەتىندە شىعىپ بارامىن، ىشتەي وكىنىش تە بار", - دەدى ول.

جامبىل احمەتبەكوۆ 2019 جىلى پرەزيدەنتتىك سايلاۋعا پارتيا اتىنان تۇسكەن بولاتىن.

Abai.kz