ناۋرىزدىڭ ون توعىزىندا وتەتىن ءماجىلىس پەن ءماسيليحات سايلاۋىنىڭ ەل نازارىن اۋدارعان باستى ەرەكشەلىگى – دەپۋتاتتىقتان ۇمىتكەرلەرگە ماجوريتارلىق جۇيەمەن ساياسي باسەكەگە تۇسۋگە مۇمكىندىك بەرىلگەندىگى ەكەندىگى ءمالىم. سول سەبەپتى دە كەزەكتى ساياسي ناۋقاننىڭ جۇرت اراسىنداعى اڭىسى جوعارى بولىپ تۇر.

بۇرىننان بەرى بيلىكتەن شەتقاقپاي كورىپ، پارتياسىن تىركەتە الماي كەلە جاتقان ساياسي بەلسەندىلەر، قوعامنىڭ ءار سالاسىندا جۇرسە دە، ماماندىعى ءار قالاي بولسا دا، ازاماتتىق بەلسەندىلىك تانىتىپ، قازىرگى ينتەرنەت داۋىرىندە الەۋمەتتىك جەلى ارقىلى ەلگە تانىمال بولعان تۇلعالار ەل ءۇمىتىن ارقالاۋعا جاپپاي نيەت تانىتىپ وتىر. كۇنى ەرتەڭ ۇمىتكەرلەردى تىركەۋدى تامامدايتىن ءبىر مانداتتى وكۋرگتەرگە بارىپ، قۇجاتىن وتكىزىپ، العاشقى ساتىدان سۇرىنبەي ءوتىپ، قۋانىشىن شۇيىنشىلەپ جاتقاندارى بار.

ولاردىڭ اراسىندا ەسكى وپپوزيتسيا وكىلدەرى ەرمۇرات باپي، رىسبەك سارسەنباي، ولاردىڭ ورىنىن باسۋدان دامەلى «حاق» قوزعالىسىنىڭ جەتەكشىسى توعجان قوجالى، تىركەلمەگەن «قازاقستان دەموكراتيالىق پارتياسىڭ» ينگا يمانباي باستاتقان بەلسەندىلەرى، ونەر ادامدارىنان «ەكس-ءمينيسترى ارىستانبەك مۇقاماديۇلىنىڭ ۇستىنەن مەن ارىز جازدىم» دەگەن تۇڭعىشباي جامانقۇلوۆ، ەرلان قاريننىڭ باتاسىن الىپ، قۇرعان «امانات» ۇيىمىن وزگەگە اماناتتاپ، ماجىلىسكە بارۋعا بەكىگەن تانىمال زاڭگەر ابزال قۇسپان، ايدىك مۇحتار تايجان مەن ارمان شوراەۆتى، ماجىلىستەگى ورىندى وزگەلەرگە قالدىرىپ، ماسيليحاتتاعى ورىنعا ۇمتىلىپ جاتقان تانىمال ۇستازدار ءومىر شىنىبەك، اياتجان احمەتجاندى اتاۋعا بولادى.

ەسكى جۇيەدەن شارشاعان جۇرت پارلامەنتتەن كورگىسى كەلەتىن وسىناۋ تانىمال تۇلعالاردىڭ جولى تاقتايداي داڭعىل دەپ ايتا المايمىز. اكىمشىلىك كەدەرگىلەر، اقپاراتتىق شابۋىلدار. ەكونوميكالىق قولبايلاۋ كۇن سايىن الدىنان شىعۋدا. ەڭ العاش «6 قاڭتار» اتتى بلوك قۇرىپ، ءماجىلىس سايلاۋىنا تۇسەتىندەرىن مالىمدەگەن تورتتىكتىڭ ىشىنەن دينارا ەگەۋباەۆا مەن ارايلىم نازار العاشقى ساتىدان وتسە، ءالنۇر يلياسوۆ «وتەلمەگەن شارتتى جازاسى بار بولۋى سەبەپتى»، دۋمان مۇقامەتكارىم «8 اي تۇراقتى تىركەۋدە بولماعانى ءۇشىن» ۇمىتكەرلىكتەن شەتتەتىلگەن. ەكەۋى دە سوتقا شاعىمدانىپ ۇلگىردى. زاڭدى شەمىشكەشە شاعاتىن ابزال قۇسپان دا ءوزىن كەيبىرەۋلەردىڭ «الدە ءبىر ءدىني اعىمنىڭ سويىلىن سوعادى» دەپ ورىنسىز قارالاپ جاتقانىن جازۋدا. ءبىرى ورىسشا پوست جازىپ، ورىس پراپاگانداسىنا قارسى كۇرەس اشقان، ەندى ءبىرى ورىس ءتىلدى بيلىككە قۇقىعى تاپتالعان ادامداردىڭ ءۇنىن جەتكىزىپ جۇرگەن ارمان شوراەۆ پەن دينارا ەگەۋباەۆانى «قازاقتىڭ مۇددەسىن قورعاعان سەنىڭ نە تەڭىڭ؟!» دەپ قومسىنىپ، ساياسي الاماندى اقىندار ايتىسىمەن شاتاستىرىپ العاندار دا جەتىپ ارتىلادى. ءومىر شىنىبەك ۇستازدىڭ قولداۋشىلارى مەن دەمپارتيا بەلسەندىلەرى دە دەپۋتاتتىقتان ۇمىتكەرلىك جارنانى تولەۋ ءۇشىن كوپتەن جىلۋ سۇراۋدا.

پارلامەنت سايلاۋىنا تۇسەتىن جەتى پارتيا ءماجىلىس پەن ءماسليحات سايلاۋىنا تۇسەتىن كانديداتتارىنىڭ ءتىزىمىن جاريالاپ ۇلگىردى. ولارعا پارتيالىق تىزىممەن دە، ماجوريتارلىق جۇيەمەن دە ساياسي دوداعا تۇسۋگە بىردەي مۇمكىندىك جاسالىپ وتىر. دەمەك «ەكى الىپ، بيگە شىعادى» دەگەن ءسوز.

ءبارىن ايت تا ءبىرىن ايت، اق نيەت، اقپاراتتىق قولداۋدان باسقا دىمى جوق تاۋەلسىز ۇمىتكەرلەرگە جەرگىلىكتى جەرلەردە پارتيا شتابى، قۇرامىندا قالتاسى قالىڭ ازاماتتار بار اتالمىش پارتيالار ەڭ ۇلكەن باقتالاس بولايىن دەپ تۇر.

Abai.kz